قىرعىزستانداعى جاعدايدى تۇراقسىزداندىرۋعا باعىتتالعان كەز كەلگەن ارەكەت ءساتسىز اياقتالادى. بۇل تۋرالى ەل پرەزيدەنتى سادىر جاپاروۆ ايتتى.

ول بۇرىنعى جەمقورلىق سحەمالارى جويىلعاننان كەيىن تابىس كوزىنەن ايىرىلعان كەيبىر توپتىڭ بلوگەرلەر مەن ارانداتۋشىلار ارقىلى جالعان اقپارات تاراتىپ، قوعامدا نارازىلىق تۋدىرۋعا تىرىسىپ جاتقانىن مالىمدەدى.

«ولاردىڭ اراسىندا ءىرى سىبايلاس جەمقورلىق ىستەرى بويىنشا ۇستالىپ، سوت شەشىمىمەن مەملەكەت پايداسىنا ءىرى سومالار مەن نىسانداردى وتكىزگەن تۇلعالار بار. سونداي-اق كولەڭكەلى تابىس كوزدەرىن جوعالتقاندار جانە قىزمەتىمەن كەتكەن سوڭ جەكە پايداسى ءۇشىن وشپەندىلىك تانىتىپ جۇرگەندەر دە جەتەرلىك. ياعني، بۇلار — جەكە مۇددەسى ءۇشىن رەنجىگەن ادامدار»،- دەدى سادىر جاپاروۆ.

مەملەكەت باسشىسى بۇرىنعى ءالسىز مەملەكەتتىڭ ەندى جوق ەكەنىن اتاپ ءوتتى.

«بىرىنشىدەن، ءبىز ەشقانداي توڭكەرىسكە جول بەرمەيمىز. ەكىنشىدەن، بۇرىنعى ءالسىز مەملەكەت قازىر جوق، قازىر ەلىمىز مىقتى. ۇشىنشىدەن، حالىق كىمگە سەنۋ كەرەكتىگىن، كىمنىڭ بيلىك باسىندا بولۋى ءتيىس ەكەنىن جاقسى بىلەدى. ەندى توڭكەرىستەردى تەك تۇسىڭىزدە عانا كورەسىزدەر. توناۋ، اشكوزدىك پەن توڭكەرىس ارقىلى بايىپ كەتۋ — مۇنىڭ ءبارى ەندى تەك ءتۇس بولىپ قالسىن»،- دەدى پرەزيدەنت.

جاپاروۆ حالىققا جاساعان ۇندەۋىندە جۇرگىزۋشى كۋالىگىن اقشا بەرىپ ساتىپ الۋ مۇمكىن بولمايتىنىن دا جەتكىزدى.

«بۇدان بىلاي جەمقورلىققا جول بەرىلمەيدى. اقشا بەرىپ كۋالىك الۋعا بولاتىن كەزەڭ ۇمىتىلسىن. ەندى جۇرگىزۋشى كۋالىكتەرى تەك ءبىلىم، ەڭبەك جانە ادالدىقتىڭ ارقاسىندا عانا بەرىلەدى. اركىم مۇنى ءوز بىلىمىمەن جانە تىنىمسىز ەڭبەگىمەن الۋى ءتيىس»،- دەدى پرەزيدەنت.

Abai.kz