بۇگىن، 17 قاراشادا، الماتىدا حالىقارالىق ستۋدەنتتەر كۇنى اتالىپ ءوتىپ جاتىر. مەرەكە اياسىندا قالادا ستۋدەنتتەردىڭ بەلسەندى ءومىرى مەن جاستار الەۋەتىن دامىتۋعا ارنالعان ALMATY STUDENT’S WEEK 2025 اپتالىعى ۇيىمداستىرىلدى.

11 قاراشادان باستاپ الماتى قالاسىنىڭ اكىمدىگى جوعارى وقۋ ورىندارىمەن بىرلەسىپ جاستاردىڭ شىعارماشىلىق، زياتكەرلىك جانە الەۋمەتتىك الەۋەتىن اشۋعا باعىتتالعان كەشەندى ءىس-شارالار ۇيىمداستىردى. اپتالىقتىڭ بارلىق باعدارلاماسى ستۋدەنتتەردىڭ تىكەلەي قاتىسۋىمەن جۇزەگە اسىرىلىپ، ولاردىڭ باستاماشىلدىعىن جانە ازاماتتىق ۇستانىمىن ايقىن كورسەتتى.

قالاداعى 35 جوعارى وقۋ ورنىندا 150-دەن استام ءىس-شارا ءوتىپ، 40 مىڭنان استام ستۋدەنتتى قامتىدى. شىعارماشىلىق كەشتەر، ينتەللەكتۋالدىق ويىندار، سپورتتىق جانە ەكولوگيالىق اكتسيالار، قايىرىمدىلىق باستامالارى ءار كۇننىڭ وزىندىك تاقىرىپتىق باعىتى بولدى. اسىرەسە، پرەزيدەنت قاسىم-جومارت توقاەۆتىڭ «ادىلەتتى قازاقستان ادال ازاماتتان باستالادى» دەگەن يدەياسىن ىلگەرىلەتۋگە ەرەكشە ءمان بەرىلدى.

«زاڭ جانە ءتارتىپ» جانە «تازا قازاقستان» اكتسيالارى اياسىندا Taza Campus چەللەندجى، StudSport وليمپيادا جۇلدەگەرلەرىنىڭ دارىستەرى، Jas IQ زياتكەرلىك ويىندارى، كينوكورسەتىلىمدەر مەن اكۋستيكالىق كەشتەر ءوتتى. سونىمەن بىرگە «الماتىنىڭ ۇزدىك ستۋدەنتتىك توبى» انىقتالىپ، بايقاۋدىڭ جۇلدە قورى 1 ميلليون تەڭگە بولدى.

بۇگىن اپتالىق Jana Beles ۇلكەن فەستيۆالىمەن جانە قالالىق Student Life كتك ستۋدەنتتىك ويىندارىنىڭ فينالدىق كەزەڭىمەن اياقتالادى.

ايتا كەتەيىك، شاھارداعى 35 جوعارى وقۋ ورنىندا 210 مىڭنان استام ستۋدەنت ءبىلىم الىپ ءجۇر. الماتى ەلدەگى ەڭ ءىرى ءبىلىم بەرۋ ورتالىعى، جاس بۋىندى جاڭا بەلەسكە ىنتالاندىراتىن ءبىلىم قالاسى.

Abai.kz