قازاقتىڭ: «ءاپ-ادەمى ءان ەدى، پۇشىق شىركىن قور قىلدى», - دەگەن ءسوزىن ارتىندا ىرىڭى مەن جىرىڭى قالعان ەكسپو ىسىنە قاراتا ايتسا بولاتىنداي...

كەزىندە ەسكى بيلىكتىڭ شاشباۋىن كوتەرگەن باق: «بيىلعى جىل ەل جىلناماسىندا ايرىقشا ارىپتەرمەن جازىلاتىن ايتۋلى وقيعالارعا تولى بولدى دەسەك، ولاردىڭ كوش باسىندا تورتكۇل دۇنيەنىڭ نازارىن قازاق ەلىنە بۇرعان ايتۋلى وقيعا – ەكسپو-2017 حالىقارالىق كورمەسى تۇرعانى تالاسسىز. ءۇش ايعا سوزىلعان جاھاندىق شارا مەملەكەتىمىزدى الەمدىك قاۋىمداستىققا جاڭا قىرىنان تانىتىپ قانا قويماي، ەلىمىزدىڭ الەۋمەتتىك-ەكونوميكالىق ورىستەۋىنە، مادەني دامۋىنا تىڭ سەرپىن بەردى. كورمە اياقتالعان سوڭ كوپتىڭ كوكەيىندە «ەكسپو ەلىمىزگە نە بەردى؟» دەگەن ساۋال تۋىندادى. بۇل سۇراقتىڭ قويىلارى ءاۋ باستا-اق بەلگىلى ەدى»، - دەپ داڭعازالادى.

ارادا 8 جىل وتكەندە وسى ساۋال قايتا تالقىعا ءتۇسىپ وتىر. اتاپ ايتقاندا: ءماجىلىس دەپۋتاتى ەرمۇرات باپي وسى كوكتەمدە پارلامەنت ءماجىلىسىنىڭ پلەنارلىق وتىرىسىندا «ەكسپو ىسىنە» قاتىستى دەپۋتاتتىق ساۋال جولداعان ەدى. وسىلايشا، ەكسپو-نىڭ اقشاسىن انىعىندا كىم تالان-تاراجعا سالعانىنا قاتىستى سەڭ قوزعالدى.

ءماجىلىس دەپۋتاتى ەرمۇرات باپي بۇل ماسەلەنى دەپۋتاتتىق ساۋالدارىندا بىرنەشە رەت كوتەرگەنىمەن، «ەسپولوۆتىڭ ۇرلىقتاعى ءرولىن تەكسەرۋ» تۋرالى تالاپتار ءار جولى ۇنسىزدىككە تاپ بولعان.

ارادا از ۋاقىت وتكەندە، قولعا العان ءىسىنىڭ وڭعا باسقانىن ايتىپ، سۇيىنشىلەگەن ءماجىلىس دەپۋتاتى: «ەندىگى تۇيسىك قانداي؟ ەگەر ەكسپو-نىڭ قارجىسىن اپتا سايىن بىرنەشە «قىتايسكي سومكەمەن» قىمقىرعان (كۋاگەرلەردىڭ ءسوزى) اسەل قۇرمانباەۆانىڭ اعاسى ايدوس ەسپولوۆقا قاتىستى قىلمىستىق ءىس قوزعالعانى راس بولسا، «جاڭا قازاقستان» جاڭا ساتىعا كوتەرىلدى دەگەن ءسوز. اقسارباس! ىسكە ءسات!»، -دەپ جازدى.

«استانا ەكسپو-2017» كومپانياسىنىڭ بۇرىنعى كەڭەسشىسى ايدوس ەسپولوۆ ەكى كۇن بۇرىن استانادا ۇقك جانىنداعى «انتيكورمەن» ۇستالدى»، - دەپ حابارلادى قازتاگ رەداكتسياسى.

سونىمەن، «قۇرىقتالعان ەسپولوۆ كىم؟» دەگەنگە جاۋاپ ىزدەيتىن بولساق، ول - ەكس-پرەزيدەنت نۇرسۇلتان نازارباەۆتىڭ ايەلى دەپ ايتىلاتىن اسەل قۇرمانباەۆانىڭ اعاسى. نازارباەۆتار اۋلەتىمەن تۋىستىق مۇنىمەن شەكتەلمەيدى. ونىڭ ءىنىسى بولات نازارباەۆتىڭ قىزى گۇلميراعا ۇيلەنگەن دەگەن اقپارات بار.

«ايدوس ەسپولوۆ «استانا ەكسپو-2017» كورمەسىندە پارا الۋ جانە 2,2 ملرد تەڭگە جىمقىرۋ ءىسى بويىنشا كۇدىكتى رەتىندە وتۋدە»، - دەپ ناقتىلايدى دەرەككوز.

سولاي بولسا دا،  ايدوس ەسپولوۆتىڭ ۇستالۋى قوعامدا بىرقاتار شىرعالاڭى بار ساۋالدار تۋدىرادى. مىسالى، ادۆوكات مۇرات ادام «Ulysmedia-عا» بەرگەن ەكسكليۋزيۆتى تۇسىنىكتەمەسىندە: «شىنىمدى ايتسام، بۇل جايتتان ەسكى كلان وكىلدەرى مەن جاڭا كلان وكىلدەرىنىڭ اراسىنداعى كوزگە كورىنبەيتىن تارتىس بايقالادى. ارادا جىل ءوتتى عوي، ەندى عانا ەسىمىزگە ءتۇستى»، - دەيدى. ونىڭ نۇسقاسى ەرعاليەۆانىڭ: «بالكىم، ەكسپو قاراجاتى كىشى ەسپولوۆتارعا بەرىلمەگەن شىعار. ول اقشانى بيۋدجەتتەن نازارباەۆتىڭ ءاميانىنا اكەلىپ قۇياتىن «كۋرەر» بولدى»، - دەگەندى مەڭزەيدى.

Abai.kz