توقاەۆ ۇقشۇ جيىنىنا قاتىستى
مەملەكەت باسشىسى قاسىم-جومارت توقاەۆ رەسمي دەلەگاتسيا مۇشەلەرىمەن بىرگە ۇقشۇ ۇجىمدىق قاۋىپسىزدىك كەڭەسىنىڭ كەڭەيتىلگەن قۇرامداعى وتىرىسىنا قاتىستى.
قازاقستان، بەلارۋس، قىرعىزستان، رەسەي جانە تاجىكستان كوشباسشىلارى ۇيىمعا مۇشە ەلدەردىڭ ۇجىمدىق قاۋىپسىزدىگىن قامتاماسىز ەتۋدىڭ وزەكتى ماسەلەلەرىن قاراستىرىپ، بيىلعى ۇقشۇ جۇمىسىنىڭ نەگىزگى باعىتتارىن قورىتىندىلادى. سونداي-اق الداعى كەزەڭگە ارنالعان باسىمدىقتاردى انىقتادى.
پرەزيدەنتتەر ۇقشۇ باس حاتشىسى لاۋازىمىنداعى قىزمەتىن اياقتاپ جاتقان يمانعالي تاسماعامبەتوۆكە العىس ايتتى.
جيىن بارىسىندا 2026 جىلعى 1 قاڭتاردان باستاپ ۇقشۇ باس حاتشىسى قىزمەتىنە ءۇش جىل مەرزىمگە قىرعىز رەسپۋبليكاسىنىڭ وكىلى تاالاتبەك ماسادىكوۆتى تاعايىنداۋ تۋرالى شەشىم بەكىتىلدى.
وتىرىس قورىتىندىسى بويىنشا ۇجىمدىق قاۋىپسىزدىك كەڭەسىنىڭ دەكلاراتسياسى قابىلداندى. سونداي-اق ۇيىمعا مۇشە مەملەكەتتەردىڭ مۇددەسىنە ساي ۇجىمدىق قاۋىپسىزدىك جۇيەسىن جان-جاقتى جەتىلدىرۋگە باعىتتالعان بىرقاتار قۇجاتقا قول قويىلدى.
Abai.kz
