وتكەن تۇندە قالا اۋماعىنان ارنايى پوليگوندارعا 2 327 اۋىر جۇك كولىگىنىڭ رەيسىمەن شامامەن 36 735 تەكشە مەتر قار شىعارىلدى.

16 قاڭتار كۇنى تاڭعى ۋاقىتتان باستاپ قار كۇرەۋ جۇمىسىنا 2 983 جول جۇمىسشىسى مەن 1 517 ارنايى تەحنيكا جۇمىلدىرىلدى، دەپ حابارلايدى inbusiness.kz سايتى.

قىس مەزگىلى باستالعالى بەرى جالپى كولەمى 2 ملن 651 مىڭ 830 تەكشە مەتردەن استام قار 197 847 رەيسپەن تاسىمالداندى.

ەڭ الدىمەن نەگىزگى كوشەلەر مەن قوعامدىق كولىك جۇرەتىن باعىتتار تازارتىلۋدا. ودان كەيىن قوزعالىس قارقىنى ورتاشا اۋماقتاردا – اۋلالاردا، الاڭداردا، تروتۋارلار مەن ايالدامالاردا تازالاۋ جۇمىسى جۇرگىزىلەدى.

قالا تۇرعىندارىنىڭ قاۋىپسىز قوزعالىسىن قامتاماسىز ەتۋ ءۇشىن جولدار، تروتۋارلار مەن كوشەلەرگە تەحنيكالىق تۇز سەبىلۋدە.

بۇل جۇمىستار دا تاۋلىك بويى اتقارىلىپ جاتىر.

سونىمەن قاتار، اۋلا اۋماقتارىنداعى تازالىقتى قامتاماسىز ەتۋ پاتەر يەلەرى كووپەراتيۆتەرى (پيك) مەن مۇلىك يەلەرى بىرلەستىكتەرىنىڭ (ميب) مىندەتىندە. ولار تۇرعىنداردىڭ قاۋىپسىزدىگى مەن قولايلىلىعى ءۇشىن اۋلالاردى قار مەن كوكتايعاقتان ۋاقىتىلى تازالاۋى ءتيىس.

استانا قالاسىنىڭ اكىمدىگى قالا تۇرعىندارى مەن قوناقتارىن قاۋىپسىزدىك ەرەجەلەرىن ساقتاۋعا، جولدار مەن تروتۋارلاردا بارىنشا ساق بولۋعا، سونداي-اق قولايسىز اۋا رايى جاعدايىندا الىس جولعا شىقپاۋعا شاقىرادى.

Abai.kz