انەل نازىرقىزى تاپسىرعان مۇرالار

تاريح – تەك وتكەن كۇننىڭ دەرەگى ەمەس، ول ۇرپاق جادىندا ساقتالعان امانات. اسىرەسە اكە جولى مەن اكە رۋحىنا ادالدىق – ۋاقىتتىڭ ءوزى سىنايتىن ۇلى قاسيەت. كورنەكتى ديپلومات، مەملەكەت جانە قوعام قايراتكەرى ءنازىر تورەقۇلوۆتىڭ ءومىرى مەن ەڭبەگى وسىنداي قاسيەتتەرمەن استاسىپ جاتىر. ال سول تاعدىرلى عۇمىردان قالعان مۇرانى كوزدىڭ قاراشىعىنداي ساقتاپ، ەلگە تابىستاۋ – ۇلكەن جۇرەك پەن تەرەڭ جاۋاپكەرشىلىكتى تالاپ ەتەدى.

ءنازىر تورەقۇلوۆتىڭ قىزى انەل نازىرقىزى ءۇشىن اكە ەسىمى – جاي عانا وتكەن تاريح ەمەس، ومىرلىك ۇستانىم، رۋحاني تىرەك بولدى. اكە قولى تيگەن ءاربىر قۇجات، ءاربىر زات ونىڭ جادىندا ساقتالعان جىلدار مەن ءۇنسىز سىرلاردىڭ كۋاسى ەدى. سول جادىگەرلەردى جەكە مۇرا رەتىندە عانا ساقتاپ قويۋ ەمەس، حالىققا جەتكىزۋ – ونىڭ سانالى تاڭداۋى، اكە اماناتىنا دەگەن شەكسىز قۇرمەتىنىڭ كورىنىسى.

تاپسىرىلعان مۇرالاردىڭ ارقايسىسى – تاعدىر تاڭباسى. سارعايعان قاعاز بەتتەرىندە ەل تاعدىرىنا قاتىستى شەشىمدەر، ەلشىنىڭ قولتاڭباسى، سول كەزەڭنىڭ اۋىر تىنىسى سەزىلەدى. ال جەكە تۇتىنعان زاتتارىنان ءنازىر تورەقۇلوۆتىڭ ادامي بولمىسى، قاراپايىمدىلىعى مەن بيىك پاراساتى ايقىن اڭعارىلادى. بۇل دۇنيەلەر تاريحتى ءتىرىلتىپ، تۇلعانى جاقىنداتا تۇسەدى.

اكە مەن بالا اراسىنداعى رۋحاني ساباقتاستىق – سوزبەن ايتىپ جەتكىزۋ قيىن، جۇرەكپەن عانا سەزىلەتىن بايلانىس. انەل نازىرقىزى وسى بايلانىستى اماناتقا ادالدىق ارقىلى ساقتاپ قالدى. ول اكە مۇراسىن تەك وتكەندى ەسكە الۋ ءۇشىن ەمەس، كەلەشەك ۇرپاققا باعىت-باعدار بەرەتىن رۋحاني شامشىراق رەتىندە ۇسىندى. بۇل – ءبىر اۋلەتتىڭ عانا ەمەس، تۇتاس ۇلتتىڭ ورتاق جەڭىسى.

بۇگىندە مۋزەي قورىنا تابىستالعان بۇل مۇرالار مىڭداعان كورەرمەنگە جول تاۋىپ، ءار جاندى ويعا جەتەلەيدى. كورمە تورىندە تۇرعان ءاربىر جادىگەر «ەلگە قىزمەت ەتۋ»، «ادالدىق»، «جاۋاپكەرشىلىك» ۇعىمدارىن ءۇنسىز جەتكىزەدى. جاس ۇرپاق ءۇشىن بۇل – كىتاپتان وقىعان تاريح ەمەس، كوزبەن كورىپ، جۇرەكپەن سەزىنەتىن شىنايى تاعىلىم.

اكە اماناتىنا ادال بولۋ – ۋاقىتتان بيىك تۇراتىن ۇستانىم. انەل نازىرقىزىنىڭ بۇل ءىسى ۇرپاقتار اراسىنداعى رۋحاني كوپىردى بەكەمدەپ، ءنازىر تورەقۇلوۆتىڭ اسىل ەسىمىن ەل جادىندا ماڭگى قالدىرۋعا قىزمەت ەتۋدە. وسىنداي اماناتقا ادالدىق بار جەردە تاريح تا، تاعىلىم دا، ۇلتتىق رۋح تا ولمەيدى.

باعلان تاشيموۆ

Abai.kz