شوۋ بيزنەس سياقتى كاسىپكەرلەر الەمى دە ءتۇرلى داقپىرتتار مەن الىپ-قاشپا اڭگىمەگە تولى. سوڭعى كەزدە وتاندىق باق بەتتەرىن فەرروحروم مەن كوبالت وندىرىسىندە الەمدىك كوشباسشىلاردىڭ ءبىرى بولىپ سانالاتىن ERG-ءدىڭ مەنشىك يەلەرىنىڭ قۇرىلىمىنداعى وزگەرىستەر ورىن الىپ جاتقاندىعى تۋرالى اقپارات جايلاپ الىپ، قازاق بيزنەسىنە جانى اشيتىن ادامداردى ءارى-ءسارى ەتكەنى جاسىرىن ەمەس.

سونىمەن وسى اقپاراتتى تاراتۋشىلار مەن ونى جاريا ەتۋشى باق نە دەيدى؟ بىرقاتار مەسسەنجەرلەردە Integra Construction يەسى مۋتاليپ شاحمۇراتتىڭ شوديەۆ پەن ماشكەۆيچتىڭ ERG-دەگى ۇلەستەرىن (40%) ساتىپ الۋ جونىندەگى مامىلەنى اياقتاعانى تۋرالى اقپارات پايدا بولدى.

اقپاراتتا نە ايتىلعانى جانە بيزنەس ساراپشىلار بۇل جايىندا نە دەگەنى جايلى از كەم ءسوز ەتكەنىمىز ورىندى بولار. سونىمەن سوڭعى كەزدەرى ىسكەرلىك جانە مەديا دەرەككوزدەردە Eurasian Resources Group (ERG)-تەگى 40% ۇلەستى Integra Construction يەسى مۋتاليپ شاحمۋرات دەگەن بيزنەسمەن ساتىپ الۋى مۇمكىن دەگەن حابارلار بەلسەندى تۇردە تالقىلانۋدا. اڭگىمە بۇرىن پاتوح شوديەۆ پەن مارقۇم الەكساندر ماشكەۆيچكە تيەسىلى ۇلەستەر تۋرالى بولىپ وتىر. بۇل تاقىرىپ كاسىبي قوعامداستىقتا ۇنەمى كوتەرىلىپ وتىرادى جانە قازاقستاننىڭ تاۋ-كەن مەتاللۋرگيا سەكتورىنداعى ەڭ ماڭىزدى ىقتيمال مامىلەلەردىڭ ءبىرى رەتىندە قاراستىرىلادى.

ساراپشىلاردىڭ ايتۋىنشا، مامىلەلەر راستالعان جاعدايدا ەل ءۇشىن ستراتەگيالىق ماڭىزدى توپتىڭ مەنشىك قۇرىلىمىن ايتارلىقتاي قايتا قۇرۋ تۋرالى ءسوز بولادى. ERG مەتالل ءوندىرۋ مەن قايتا وڭدەۋدەگى ءىرى ويىنشىلاردىڭ ءبىرى بولىپ قالا بەرەدى، ال مەملەكەت كومپانيانىڭ قوماقتى اكتسيالارىن ساقتاپ قالادى. بۇل دۇرلىگۋ راسىندا دا قازاق بيزنەس الەمىن ءدۇر سىلكىندىرگەنى جاسىرىن ەمەس.

وسى اڭگىمەگە وزەك بولعان ERG مەن باستى كەيىپكەر بولعان  مۋتاليپ شاحمۇرات كىم دەگەن ورىندى ساۋال تۋىندايدى؟

ءبىز اڭگىمەنى العاشقىسىنان باستايىق.

ERG - فەرروحروم مەن كوبالت وندىرىسىندەگى الەمدىك كوشباسشىلاردىڭ ءبىرى جانە الەمدىك نارىققا مىستىڭ ءىرى جەتكىزۋشىسى. ەۋرازيالىق وڭىردە ERG تەمىر رۋداسى مەن گلينوزەم نارىعىنداعى كوشباسشىلاردىڭ ءبىرى بولىپ تابىلادى. بۇل قازاقستانداعى جالعىز جوعارى ماركالى اليۋميني ءوندىرۋشى.

قر-دا «قازحروم» تۇك، «سوكولوۆ-سارىباي تاۋ-كەن بايىتۋ وندىرىستىك بىرلەستىگى» (سسكوب), «قازاقستان ءاليۋمينيى»، «قازاقستان ەلەكتروليز زاۋىتى» (كەز), «ەۋروازيا ەنەرگەتيكالىق كورپوراتسياسى» (ەەك) جانە باسقالارى. ERG - بۇل ەلەكتر ەنەرگياسىنىڭ نەگىزگى جەتكىزۋشىلەرىنىڭ ءبىرى جانە ورتالىق ازياداعى ءىرى تەمىر جول وپەراتورى.

ەندى وسى الىپ-قاشپا سوزگە باسى بايلانعان مۋتاليپ شاحمۇرات كىم؟

شاحمۋرات مۋتاليپ - قازاقستاندىق بيزنەسمەن جانە قازاقستان بوكس فەدەراتسياسىنىڭ پرەزيدەنتى. 1990 جىلى تۋىلعان، 2008 جىلى شپال وندىرىسىندەگى سلەساردان باستاپ، 2015 جىلى «بەنت» اق ءبىرىنشى ۆيتسە-پرەزيدەنتىنە دەيىن ءوستى. 2025 جىلعى قازاندا «اتامەكەن» ۇكپ تورالقا كوميتەتىنىڭ قۇرىلىس جانە تكش كوميتەتىنىڭ توراعاسى قىزمەتىنە تاعايىندالدى.

قازىرگى ۋاقىتتا مۋتاليپ ينتەگرا Construction KZ كومپانياسىنىڭ بەنەفيتسيارى جانە بايقاۋ كەڭەسىنىڭ توراعاسى بولىپ تابىلادى، ول اۆتوموبيل جانە تەمىر جولداردى، سونداي-اق ينفراقۇرىلىمدىق نىسانداردى سالۋ جانە جوندەۋ سالاسىنداعى ءىرى قازاقستاندىق مەردىگەرلەردىڭ ءبىرى. Integra Construction KZ ماگيسترالداردىڭ، تەمىرجولداردىڭ جانە تۇرعىن ءۇي نىساندارىنىڭ قۇرىلىسىمەن جانە جوندەۋىمەن اينالىسادى.

مەنشىك يەلەرىنىڭ قۇرىلىمىنداعى وزگەرىستەر تۋرالى اقپاراتتىڭ شىندىعى قايسى، جالعانى قايسى دەگەن توتەسىنەن قويىلعان ساۋالعا BES.media-دا شىققان ERG ءباسپاسوز قىزمەتىنىڭ رەسمي تۇسىنىكتەمەسى ءبارىنىڭ قۇر داقپىرت ەكەنىن ايقىندادى. ءيا، اشىق كۇنگى نايزاعايداي شۋ شىعارعان داقپىرتقا ERG ءباسپاسوز قىزمەتىنىڭ رەسمي تۇسىنىكتەمەسى بىلايشا نۇكتە قويدى:

«بۇل اقپارات شىندىققا جاناسپايدى. ەگەر اكتسيونەرلەر قۇرىلىمىندا وزگەرىستەر بولسا، كومپانيا ءوز ستەيكحولدەرلەرىنىڭ حاباردار بولۋىن قامتاماسىز ەتە وتىرىپ، رەسمي حابارلاندىرۋلار جاسايدى».

Abai.kz