قر كونستيتۋتسياسىنىڭ جاڭارتىلعان باپتارى ازاماتتارىمىزدىڭ قۇقىقتارى مەن مۇددەلەرىن قورعاۋ كەپىلدىكتەرىن كەڭەيتۋدى قامتاماسىز ەتەدى. بۇل تۋرالى سەناتور نۇرلان بەكنازاروۆ كونستيتۋتسيالىق رەفورما جونىندەگى كوميسسيانىڭ بەسىنشى وتىرىسى بارىسىندا مالىمدەدى.

سەناتور كونستيتۋتسيالىق قۇرىلىستىڭ نەگىزدەرىنە، قۇرىلتاي مەن حالىق كەڭەسىنىڭ قىزمەتىنە بايلانىستى ماسەلەلەرگە توقتالدى.

«قر جاڭا كونستيتۋتسياسى جوباسىنىڭ 52-بابىنا سايكەس قازاقستان رەسپۋبليكاسىنىڭ قۇرىلتايى زاڭنامالىق بيلىكتى جۇزەگە اسىراتىن قازاقستان رەسپۋبليكاسىنىڭ جوعارى وكىلدى ورگانى بولىپ تابىلادى. قۇرىلتايدىڭ وكىلەتتىكتەرى، قىزمەت ءتارتىبى، دەپۋتاتتاردىڭ قۇقىقتىق جاعدايى كونستيتۋتسيالىق زاڭمەن ايقىندالادى. ءبىر پالاتالى پارلامەنتكە كوشۋ شەڭبەرىندە زاڭ شىعارۋشى ورگاننىڭ وكىلەتتىكتەرى جەتە قايتا قارالىپ، قۇرىلتايعا قاتىستى كەڭ اۋقىمدى تۇزەتۋلەر جوباسىنا وكىلەتتىكتەردى كەڭەيتۋ جانە تەجەمەلەر مەن تەڭەستىرمەلەر جۇيەسىن كۇشەيتۋ ەنگىزىلدى. ەنگىزىلگەن وزگەرىستەر مەن تولىقتىرۋلار ازاماتتارىمىزدىڭ قۇقىقتارى مەن مۇددەلەرىن قورعاۋ كەپىلدىكتەرىن كەڭەيتۋدى قامتاماسىز ەتەدى»، – دەپ ايتتى كونستيتۋتسيالىق رەفورما جونىندەگى كوميسسيا مۇشەسى.

سونداي-اق ول ادىلەتتى قازاقستاندى ساياسي جاڭعىرتۋ جانە قالىپتاستىرۋ باعىتى ساياسي جۇيەنى جاڭارتۋدىڭ، پارلامەنتتىك باقىلاۋدى كۇشەيتۋدىڭ جانە زاڭنامانىڭ ساپاسىن ارتتىرۋدىڭ ءتيىمدى تەتىگى بولاتىنىن اتاپ ءوتتى.

«ۇسىنىلعان نورمالار قۇرىلتايدىڭ جەدەل، تۇسىنىكتى جانە قوعام ءۇشىن اشىق زاڭ شىعارۋ پروتسەسى بولۋىنا ىقپال ەتەدى. كونستيتۋتسيالىق قاعيداتتاردى نىعايتۋ، سونداي-اق بيلىك پەن قوعام اراسىندا قالىپتاسقان ءوزارا قارىم-قاتىناس داستۇرلەرىن ودان ءارى نىعايتۋ ءۇشىن جاڭا ينستيتۋت – قازاقستان حالىق كەڭەسىن قۇرۋ ۇسىنىلدى. حالىق كەڭەسىن قۇرۋ مارتەبەسى مەن ءتارتىبى كونستيتۋتسيانىڭ جەكەلەگەن بولىگىندە جانە ارنايى كونستيتۋتسيالىق زاڭدا بەكىتىلەدى. ۇسىنىلعان وزگەرىستەر مەن تولىقتىرۋلار ەلدىڭ كونستيتۋتسيالىق قۇندىلىقتارى مەن ونىڭ قاعيداتتارىن قۇندى مازمۇنمەن تولىقتىرىپ، ەلدىڭ جاڭا تاريحي كەزەڭگە وتۋىنە نەگىز بولاتىنى ءسوزسىز»، - دەپ تۇيىندەدى بەكنازاروۆ.

Abai.kz