بۇگىن – ۇلتتىق باسىلىم كۇنى. 1913 جىلدىڭ 2 اقپانىندا ورىنبور قالاسىنان «قازاق» گازەتىنىڭ العاشقى سانى جارىق كورىپ، وقۋشى قاۋىمعا جول تارتتى. ونىڭ باستاۋىندا احمەت بايتۇرسىنۇلى، ءاليحان بوكەيحانۇلى، مىرجاقىپ دۋلاتۇلى سەكىلدى ۇلت زيالىلارى تۇردى.

قازاق زيالىلارى قۇرعان گازەت ۇلتتىق جاڭعىرۋدىڭ قاينار كوزى بولدى. «قازاق» گازەتىنىڭ تۇڭعىش سانى جارىق كورگەن كۇن 2023 جىلى «ۇلتتىق باسىلىم كۇنى» بولىپ بەلگىلەندى.

ۇلت مۇددەسىن قورعاۋدا ۇلتتىق-ساياسي مىنبەرگە اينالعان «قازاق» گازەتى بولاشاققا دەگەن ۇلى مۇرات جولىندا بارشا حالىقتىڭ باسىن بىرىكتىردى. ۇلتتىق بىرلىك پەن ىنتىماقتىڭ ەرەن ۇلگىسىن كورسەتىپ، قازاق قوعامىننىڭ رۋحاني كەمەلدەنۋىنە ايرىقشا ىقپال ەتتى.

الەمدە بولىپ جاتقان جاڭا ترەندتەرگە قاراماستان، مەرزىمدى باسىلىمداردىڭ ءجونى بولەك، ماڭىزى ەرەكشە. سول سەبەپتى، ۇلتتىق مەديانى دامىتۋ، باسەكەگە قابىلەتتى بۇقارالىق اقپارات قۇرالدارىن قالىپتاستىرۋ، جۋرناليستەردىڭ مارتەبەسىن ارتتىرۋ – نەگىزگى ماقساتتارىمىزدىڭ ءبىرى.

سۋرەت: kazgazeta.kz سايتىنان الىندى.

بۇگىن پرەزيدەنت قاسىم-جومارت توقاەۆ قازاقستان جۋرناليستەرىن ۇلتتىق باسىلىم كۇنىمەن قۇتتىقتادى.

مەملەكەت باسشىسى بۇقارالىق اقپارات قۇرالدارى ادىلەتتى قازاقستاندى قۇرۋعا جانە قوعامدا «زاڭ مەن ءتارتىپ» قاعيداتىن ورنىقتىرۋعا ەلەۋلى ۇلەس قوسىپ كەلە جاتقانىنا نازار اۋداردى.

پرەزيدەنت مەرزىمدى ءباسپاسوز وكىلدەرىن كونستيتۋتسيالىق رەفورمانى، سونداي-اق تۇتاس مەملەكەتتىك جۇيەنى تۇبەگەيلى جاڭعىرتۋعا باعىتتالعان باسقا دا اۋقىمدى وزگەرىستەردى باق-تا جاريالاۋ كەزىندە كونسترۋكتيۆتى جۇمىس ىستەۋگە ۇندەدى.

قاسىم-جومارت توقاەۆ قۇتتىقتاۋىندا پاتريوتيزم ۇعىمىنا جاۋاپكەرشىلىك پەن جاسامپازدىق تۇرعىسىنان قاراپ، زاڭدى قۇرمەتتەۋ ارقىلى ەگەمەندىگىمىزدى جانە تاۋەلسىزدىگىمىزدى قورعاۋ ۇلتى مەن دىنىنە قاراماستان ءاربىر وتانداسىمىزدىڭ مىندەتى ەكەنىن ايتتى.

مەملەكەت باسشىسى وتاندىق جۋرناليستەر وسىناۋ اسا ماڭىزدى ىسكە بەلسەندى اتسالىساتىنىنا سەنىم ءبىلدىرىپ، ولارعا تولايىم تابىس پەن باق-بەرەكە تىلەدى.

سۋرەت: baq.kz سايتىنان الىندى.

ايدا بالاەۆا، قر ۆيتسە-پرەمەرى، مادەنيەت جانە اقپارات ءمينيسترى:

– بۇگىن – ۇلتتىق باسىلىم كۇنى. بۇل كۇننىڭ وتاندىق مەرزىمدى ءباسپاسوز تاريحىنىڭ باستاۋى سانالۋى تەگىن ەمەس. سوناۋ 1913 جىلعى 2 اقپاندا قازاق حالقىنىڭ بىرلىگىنىڭ ۇيىتقىسىنا اينالعان «قازاق» گازەتىنىڭ العاشقى سانى جارىق كوردى. سودان بەرى گازەتتەر مەن جۋرنالدار مەملەكەت پەن ازاماتتار اراسىنداعى سەنىمدى نىعايتۋعا، اشىق قوعام قالىپتاستىرۋعا ماڭىزدى ۇلەس قوسىپ كەلەدى.

قازىرگى ۋاقىتتا قازاقستاندىق باسىلىمدار اعا بۋىن قالىپتاستىرعان سول يگى ءداستۇردى لايىقتى جالعاستىرىپ وتىر. جاقىندا مەملەكەت باسشىسى «Turkistan» گازەتىنە بەرگەن سۇحباتىندا اتاپ وتكەندەي، ولار بۇگىندە «رەنەسسانس كەزەڭىنە» قادام باستى.

شىنىندا دا، بۇگىندە ۇلتتىق ءباسپاسوز ينتەرنەت پەن تسيفرلىق تەحنولوگيالاردىڭ ارقاسىندا اۋديتورياسىن كەڭەيتىپ، قايتا جاڭعىرۋ ءداۋىرىن باستان وتكەرۋدە. وسىلايشا، مەرزىمدى باسىلىمدار ەلدىڭ مەديا كەڭىستىگىندە ماڭىزدى ورنىن بەكەمدەي ءتۇستى.

ۇلتتىق باسىلىمداردى قولداۋ قازاقستان رەسپۋبليكاسى مادەنيەت جانە اقپارات مينيسترلىگى قىزمەتىنىڭ باسىم باعىتتارىنىڭ ءبىرى بولىپ قالا بەرەدى.

وسى ورايدا، سالادا ەڭبەك ەتىپ جۇرگەن بارشا ازاماتتاردى كاسىبي مەرەكەمەن شىن جۇرەكتەن قۇتتىقتايمىن!

ادىلەتتى قازاقستاندى قۇرۋعا باعىتتالعان رەفورمالار مەن باستامالاردى، ماڭىزدى جوبالاردى حالىققا جەتكىزۋدەگى كاسىبي شەبەرلىكتەرىڭىز بەن ارىپتەستىك قولداۋلارىڭىز ءۇشىن العىس بىلدىرەمىن.

سىزدەرگە شىعارماشىلىق شابىت، سارقىلماس كۇش-قۋات، تولايىم تابىس تىلەيمىن!

Abai.kz