باعانى مەملەكەت ەمەس، نارىقتاعى باسەكە قالىپتاستىرادى.

قازاقستاندا ءدارى-دارمەككە قويىلعان شەكتى باعالار بىرتىندەپ الىنىپ تاستالادى.

بۇل تۋرالى پرەزيدەنتتىڭ الەۋمەتتىك ماسەلەلەر جونىندەگى كەڭەسشىسى الەكسەي تسوي مالىمدەدى.

ايتۋىنشا، قازىر نارىقتى مەملەكەت ەمەس، باسەكە رەتتەيتىن جاعدايعا كوشىرۋ العا ماقساتەتىپ قويىلعان. بىراق بۇل بارلىق پرەپاراتقا بىردەي قاتىستى بولمايدى.

بۇل پرەپاراتتاردىڭ تۇرىنە بايلانىستى. سوندىقتان بۇل ماسەلەگە وتە سالماقتى قاراعان ءجون. كوبىنەسە بۇل – نارىقتا تۇراقتى تۇردە بولۋى ءتيىس نەگىزگى ومىرلىك ماڭىزى بار دارىلەر. نەگىزگى ازىق-تۇلىك تاۋارلارىن قالاي باقىلاۋدا ۇستاسا، مۇندا دا سونداي ءتاسىل قولدانىلىپ وتىر. ياعني بەلگىلى ءبىر بالانس قاجەت، - دەدى الەكسەي تسوي قازاقستاننىڭ فارماتسەۆتيكالىق ساياساتىنا ارنالعان فورۋمنىڭ كۋلۋارىندا بەرگەن سۇحباتىندا.

سونىمەن قاتار ول بۇرىن شەكتى باعا نارىق ءالى تولىق قالىپتاسپاعان كەزدە، باعانىڭ شارىقتاپ كەتۋىن تەجەۋ ءۇشىن ەنگىزىلگەنىن العا تارتتى.

قازىر جاعداي وزگەردى. ەلگە وندىرۋشىلەر مەن ديستريبيۋتورلار كوبەيىپ كەلەدى. باسەكە ارتىپ، باعالار بىرتىندەپ تابيعي جولمەن قالىپتاساتىن بولادى، - دەيدى پرەزيدەنتتىڭ الەۋمەتتىك ماسەلەلەر جونىندەگى كەڭەسشىسى.

Abai.kz