سىرماقتى اياقتاۋ 21 ناۋرىز ناۋرىز مەرەكەسىنە جوسپارلانعان. بوستاندىق اۋدانىندا گيننەستىڭ رەكوردتار كىتابىنا ارنالعان بىرەگەي سىرماق جاسالىپ جاتىر، دەپ جازادى inbusiness.kz سايتى.

اۋدان اكىمدىگىنىڭ قولداۋىمەن "قازاق انالارى" اجەلەر قاۋىمداستىعى ۇزىندىعى 110 مەتر بولاتىن بىرەگەي سىرماقتى دايىنداۋعا كىرىستى. جوبا ناتيجەسى گيننەستىڭ رەكوردتار كىتابىنا تىركەۋگە ۇسىنىلماق.

سىرماق ءداستۇرلى باسۋ جانە تىگۋ تەحنولوگيالارىن ساقتاي وتىرىپ، تولىقتاي قولمەن جاسالۋدا. ويۋ-ورنەكتەردە قازاقى ناقىشتىڭ كلاسسيكالىق ۇلگىلەرى پايدالانىلىپ، ءار تۇسىندا ۇرپاق ساباقتاستىعى، قولونەرگە دەگەن قۇرمەت پەن ۇلتتىق مۇرانى ساقتاۋعا دەگەن ۇمتىلىس كورىنىس تابادى. بۇل باستاما كولەمىمەن عانا ەمەس، مازمۇندىق مانىمەن دە ايرىقشا.

جوبا ۇلتتىق ساندىك-قولدانبالى ونەردى دارىپتەۋگە، اعا بۋىننىڭ قوعامداعى ءرولىن نىعايتۋعا جانە ءداستۇرلى قۇندىلىقتاردى جاس ۇرپاققا ناسيحاتتاۋعا باعىتتالعان.

سىرماقتى اياقتاۋ 21 ناۋرىز – ناۋرىز مەرەكەسىنە جوسپارلانعان. وسى كۇنى بىرەگەي تۋىندى كوپشىلىك نازارىنا ۇسىنىلىپ، قازاق مادەنيەتىنىڭ بىرلىگى مەن بايلىعىن، شەبەرلىك ءداستۇرىنىڭ ومىرشەڭدىگىن ايشىقتايتىن نىشانعا اينالماق.

Abai.kz