دايىن قۇجاتتاردى حقو-دان وزىڭىزگە ىڭعايلى ۋاقىتتا الۋ ءۇشىن پوستامات قىزمەتىن پايدالانۋعا بولادى، دەپ حابارلايدى ازاماتتارعا ارنالعان ۇكىمەت.

بۇل سەرۆيس تاۋلىك بويى جۇمىس ىستەيدى جانە دەمالىس پەن مەرەكە كۇندەرى دە قولجەتىمدى.

- پوستاماتتار جاڭارتىلعان حقكو عيماراتتارىندا، تاۋلىك بويى اشىق ايماقتاردا ورنالاسقان. قۇجات دايىن بولعان كەزدە ازامات ونى مامانعا جۇگىنبەي-اق، پوستاماتتاعى جەكە ۇياشىقتان ءوزى الىپ كەتە الادى.

قىزمەتتى راسىمدەۋ كەزىندە حقكو-دا ءوتىنىش بەرگەندە دايىن قۇجاتتى الۋ ءتاسىلى رەتىندە پوستاماتتى تاڭداۋ قاجەت. قۇجات پوستاماتقا ورنالاستىرىلعاننان كەيىن ازاماتتىڭ تەلەفون نومىرىنە SMS-حابارلاما جىبەرىلەدى. حابارلامادا ۇياشىقتى اشۋعا ارنالعان جەكە كود كورسەتىلەدى. سونىمەن قاتار بيومەتريالىق سايكەستەندىرۋدەن ءوتۋ قاراستىرىلعان، - دەپ جازىلعان اقپاراتتا.

دايىن قۇجاتتى ءۇش كۇن ىشىندە الىپ كەتۋگە بولادى. ەگەر وسى مەرزىمدە الىنباسا، قۇجات حقكو مامانى ارقىلى ادەتتەگى تارتىپپەن بەرىلەدى.

قازىرگى تاڭدا پوستاماتتار ەلىمىزدىڭ 10 وڭىرىندە ورناتىلعان. جالپى سانى 14 قۇرىلعى جۇمىس ىستەيدى. ولار ارقىلى مەملەكەتتىك قىزمەتتەردىڭ 19 ءتۇرى بويىنشا دايىن ناتيجەلەردى الۋعا بولادى. 2026 جىلى بۇل قىزمەتتىڭ قۇنى 518 تەڭگەنى قۇرايدى.

2025 جىلدىڭ قورىتىندىسى بويىنشا پوستامات قىزمەتىن ەڭ كوپ پايدالانعان قالالار – سەمەي، تاراز جانە تۇركىستان.

Abai.kz