قاسىم-جومارت توقاەۆ قازاقستان حالقىن قاسيەتتى رامازان ايىنىڭ باستالۋىمەن قۇتتىقتادى، دەپ حابارلايدى اقوردانىڭ ءباسپاسوز قىزمەتى.

پرەزيدەنت ءوز قۇتتىقتاۋىندا رامازان ايىنىڭ كۇللى مۇسىلمان قاۋىمى ءۇشىن رۋحاني تازارۋ مەن جاناشىرلىقتىڭ، مەيىرىم مەن قايىرىمدىلىقتىڭ كەزەڭى ەكەنىن اتاپ ءوتتى.

"بۇل – دۇنيە جۇزىندەگى ميللياردتاعان جاندى رۋحاني تازارۋعا، جاقىنىنا جاناشىر ءارى قامقور بولۋعا ۇندەيتىن مەزگىل.  ورازا ازاماتتاردى شىدامدىلىق پەن توزىمدىلىككە شاقىرىپ، حالقىمىزدىڭ بويىنا قاراپايىمدىلىق، جاۋاپكەرشىلىك جانە ادالدىق سىندى اسىل قاسيەتتەردى سىڭىرەدى", - دەدى مەملەكەت باسشىسى.

مەملەكەت باسشىسى قازىرگى كۇردەلى حالىقارالىق احۋال جاعدايىندا رامازاننىڭ رۋحاني ءمانىن تەرەڭ ءتۇسىنىپ، ونىڭ تۇپكى ماعىناسىن كەمەل سانا ارقىلى قابىلداۋدىڭ ماڭىزدىلىعىنا توقتالدى.

"بۇگىندە قازاقستان اۋقىمدى وزگەرىستەردىڭ، تۇبەگەيلى جاڭعىرۋدىڭ تاريحي كەزەڭىنە قادام باستى. جاڭا حالىقتىق كونستيتۋتسيانىڭ جوباسى رەسپۋبليكالىق رەفەرەندۋمعا شىعارىلدى. بۇل ورلەۋ جانە ادىلەتتىلىك داڭعىلىنا تۇسكەن مەملەكەتىمىزدىڭ دامۋ باعىتىن ايقىندايتىن نەگىزگى زاڭ بولماق. باس قۇجات مىڭداعان جىل تاريحى بار مەملەكەتتىلىگىمىزدى ودان ءارى نىعايتۋعا، ەلىمىزدەگى ساياسي، ازاماتتىق، ەكونوميكالىق ينستيتۋتتاردىڭ تيىمدىلىگىن ارتتىرۋعا جانە ادام قۇقىقتارىن قورعاۋ جۇيەسىن جەتىلدىرىپ، كۇشەيتۋگە جول اشادى", - دەپ اتاپ ءوتتى پرەزيدەنت.

سونىمەن قاتار قۇتتىقتاۋدا ءداستۇرلى رۋحاني-مادەني قۇندىلىقتاردى ساقتاي وتىرىپ، قۇقىق پەن زاڭ ۇستەمدىگى، ءتارتىپ پەن تازالىق، ادىلدىك پەن وتانشىلدىق قاعيداتتارىنا نەگىزدەلگەن جاڭا ۇلتتىق بولمىس قالىپتاستىرۋ مىندەتى اتاپ ءوتىلدى. بۇل ۇستانىمدار رامازان ايىنىڭ رۋحاني تاعىلىمىمەن ۇندەس ەكەنى ايتىلدى.

مەملەكەت باسشىسى بارشا مۇسىلمان جاماعاتىنا اماندىق، بەرەكە جانە يگىلىك تىلەپ، قاسيەتتى ايدىڭ قۇتتى بولۋىن تىلەدى.

Abai.kz