سوڭعى 12 ايدا جيناق كولەمى 3,74 ترلن تەڭگەگە نەمەسە 16,5%-عا ۇلعايعان.

2026 جىلعى 1 اقپانداعى جاعداي بويىنشا قازاقستاندىقتاردىڭ زەينەتاقى جيناقتارىنىڭ كولەمى 26,36 ترلن تەڭگەدەن استى. بۇل تۋرالى بىرىڭعاي جيناقتاۋشى زەينەتاقى قورى (بجزق) مالىمدەدى. سوڭعى 12 ايدا جيناق كولەمى 3,74 ترلن تەڭگەگە نەمەسە 16,5%-عا ۇلعايعان.

قاي جارنالار ءوستى؟

جيناقتىڭ نەگىزگى بولىگىن مىندەتتى زەينەتاقى جارنالارى (مزج) قۇرايدى – 24,81 ترلن تەڭگە. ءبىر جىلدا بۇل كورسەتكىش 14,4%-عا ارتتى. مىندەتتى كاسىپتىك زەينەتاقى جارنالارى (مكزج) 736,07 ملرد تەڭگەگە جەتىپ، 13,2%-عا ءوستى.

ەڭ جوعارى ءوسىم ەرىكتى زەينەتاقى جارنالارىندا تىركەلدى – 23,6%. ولاردىڭ كولەمى 9,89 ملرد تەڭگە بولدى.

2024 جىلدىڭ 1 قاڭتارىنان ەنگىزىلگەن جۇمىس بەرۋشىنىڭ مىندەتتى زەينەتاقى جارنالارى (جمزج) بويىنشا شوتتاردا 807,75 ملرد تەڭگە جيناقتالعان.

قانشا قارجى ءتۇستى جانە قانشا تولەندى؟

2026 جىلدىڭ قاڭتار ايىندا جەكە جانە شارتتى زەينەتاقى شوتتارىنا 264,65 ملرد تەڭگە ءتۇستى. بۇل وتكەن جىلدىڭ سايكەس كەزەڭىمەن سالىستىرعاندا 13%-عا كوپ.

قاڭتار ايىنداعى قوردان تولەمدەر مەن اۋدارىمدار كولەمى 124,27 ملرد تەڭگەگە جەتتى. ونىڭ ىشىندە:

• جاسىنا بايلانىستى تولەمدەر – 17,30 ملرد تەڭگە;
• تۇرعىن ءۇي جاعدايىن جاقسارتۋ جانە ەمدەلۋگە ارنالعان بىرجولعى تولەمدەر – 47,88 ملرد تەڭگە;
• مۇراگەرلىك بويىنشا – 17,80 ملرد تەڭگە;
• شەتەلگە تۇراقتى تۇرۋعا كەتۋىنە بايلانىستى – 3,09 ملرد تەڭگە;
• ساقتاندىرۋ ۇيىمدارىنا اۋدارىمدار – 36,99 ملرد تەڭگە.

زەينەت جاسىنا بايلانىستى كەستە بويىنشا ورتاشا اي سايىنعى تولەم 38 312 تەڭگەنى قۇرادى.

شوتتار سانى ارتتى

2026 جىلعى 1 اقپاندا زەينەتاقى جۇيەسىندە 18,28 ملن شوت تىركەلگەن. بۇل ءبىر جىل بۇرىنعىدان 1,04 ملن-عا كوپ. ونىڭ ىشىندە 12,73 ملن – جەكە زەينەتاقى شوتتارى، ال 5,55 ملن – جۇمىس بەرۋشىلەردىڭ مىندەتتى جارنالارى ەسەپتەلەتىن شارتتى شوتتار.

Abai.kz