قازاقستاندىق Kaspi.kz بانكى تاياۋ شىعىس ەلدەرىندە جۇرگەن كليەنتتەرىنە قارجىلاي كومەك كورسەتەتىنىن مالىمدەدى.

حابارلامادا ايتىلعانداي، بانك Kaspi Travel سەرۆيسى ارقىلى تۋرپاكەت نەمەسە «بارۋ-قايتۋ» اۋە بيلەتتەرىن ساتىپ العان جانە قازىرگى ۋاقىتتا تاياۋ شىعىس ەلدەرىندە جۇرگەن نە سول وڭىردە ترانزيتپەن قالىپ قويعان كليەنتتەردى قولداۋ تۋرالى شەشىم قابىلداعان.

كومپانيا مالىمەتىنشە، وڭىردە ءماجبۇرلى تۇردە بولعان كەزەڭدە كليەنتتەردىڭ Kaspi Gold شوتتارىنا كۇن سايىن ماتەريالدىق كومەك اۋدارىلىپ وتىرادى.

تولەم مولشەرى:

• ءاربىر ەرەسەك ادامعا– تاۋلىگىنە 35 000 تەڭگە;
• ءاربىر بالاعا– تاۋلىگىنە 15 000 تەڭگە.

كومپانيا وكىلدەرى كليەنتتەرمەن تۇراقتى بايلانىستا ەكەنىن جانە ولاردى سۇيەمەلدەۋ ءۇشىن بارلىق قاجەتتى شارالاردى قابىلداپ جاتقانىن اتاپ ءوتتى.

سونداي-اق ازاماتتارعا قاۋىپسىز جەردە بولۋعا، قازاقستان رەسپۋبليكاسىنىڭ ەلشىلىكتەرى مەن كونسۋلدىقتارىمەن بايلانىستا بولۋعا جانە رەسمي نۇسقاۋلاردى قاتاڭ ۇستانۋعا كەڭەس بەرىلدى.

Abai.kz