ساياساتتانۋشى نۇرحات وراش جاقىندا الەۋمەتتىك جەلىدە كونستيتۋتسيانىڭ جاڭا جوباسىنداعى 23-باپقا قاتىستى ءوز ويىن ءبىلدىردى. ونىڭ ايتۋىنشا، بۇل باپ – ءبىزدىڭ كۇندەلىكتى پىكىر بىلدىرۋىمىزدەن باستاپ، عىلىمي ىزدەنىستەرىمىز بەن شىعارماشىلىق ەركىندىگىمىزدى قورعايتىن نەگىزگى قۇجات. ول بۇل وزگەرىستەردى قاراپايىم تىلمەن تۇسىندىرە وتىرىپ، الدىمەن بەرىلەتىن مۇمكىندىكتەرگە توقتالىپ ءوتتى.

ءبىرىنشى كەزەكتە، ءاربىر ادامنىڭ وي ەركىندىگى مەن شىعارماشىلىقپەن اينالىسۋىنا تولىق جول اشىلادى. ياعني، كەز كەلگەن ازامات ءوز كوزقاراسىن اشىق ايتىپ، عىلىم نەمەسە ونەر سالاسىندا جاڭا تۋىندىلار جاساۋعا قۇقىلى. سونىمەن قاتار، ادامنىڭ زياتكەرلىك ەڭبەگى دە زاڭمەن قورعالاتىن بولادى. ەگەر ءسىز ءبىر تىڭ يدەيا ويلاپ تاپساڭىز نەمەسە ماڭىزدى دۇنيە جازساڭىز، ول زاڭ اياسىندا تەك سىزگە تيەسىلى بولىپ قالادى. تاعى ءبىر ماڭىزدى جايت – اقپاراتقا قول جەتكىزۋ ماسەلەسى. مەملەكەتتىك قۇپيالاردى ەسەپكە الماعاندا، كەز كەلگەن قاجەتتى مالىمەتتى ەركىن الۋعا جانە تاراتۋعا مۇمكىندىك بەرىلەدى. بۇل – مەملەكەتتىڭ اشىقتىعى مەن ادىلدىگىنىڭ بەلگىسى.

دەگەنمەن، نۇرحات وراش ەركىندىكتىڭ جاۋاپكەرشىلىكسىز بولمايتىنىن دا ەسكەرتتى. ءسوز بوستاندىعى بار ەكەن دەپ، ويىڭا كەلگەندى ايتىپ، شەكتەن شىعۋعا بولمايدى. ماسەلەن، ءار ادام وزگەنىڭ ار-نامىسى مەن قادىر-قاسيەتىنە قۇرمەتپەن قاراۋعا مىندەتتى. ەشكىمنىڭ باسقا بىرەۋدى قورلاپ، نامىسىنا تيەتىن سوزدەر ايتۋعا حاقىسى جوق. بۇدان بولەك، قوعامدىق قاۋىپسىزدىك تە باستى نازاردا قالا بەرەدى. ەلدىڭ تۇتاستىعىنا نۇقسان كەلتىرەتىن، سوعىستى، زورلىق-زومبىلىقتى نەمەسە ۇلتارالىق جانجالدى تۋدىراتىن كەز كەلگەن ۇندەۋلەرگە زاڭمەن تىيىم سالىنعان.

ساياساتتانۋشىنىڭ پايىمداۋىنشا، بۇل باپ ازاماتتارعا كەڭ ەركىندىك بەرگەنىمەن، سول قۇقىقتى پايدالانۋ كەزىندە وزگەنىڭ شەكاراسىن بۇزباۋ كەرەك. قوعامداعى تۇراقتىلىق پەن تاتۋلىقتى ساقتاۋ – ارقايسىمىزدىڭ ورتاق مىندەتىمىز بولىپ قالا بەرەدى.

Abai.kz