بۇگىن جەتىسۋ وبلىسىنىڭ اكىمى بەيبىت يساباەۆ 8 ناۋرىز – حالىقارالىق ايەلدەر كۇنىنە وراي سالتاناتتى جيىن وتكىزدى. مەرەكەلىك شاراعا وبلىستىڭ تۇكپىر-تۇكپىرىنەن دەنساۋلىق ساقتاۋ، ءبىلىم بەرۋ، الەۋمەتتىك قورعاۋ، مادەنيەت، سپورت، قۇقىق قورعاۋ جانە قورعانىس، ت.ب سالالاردا جەمىستى ەڭبەك ەتىپ جۇرگەن كاسىبي ماماندار، سونداي-اق پوشتاشى، ەلەكترومەحانيك، ءوندىرىس تەحنيگى سياقتى قاراپايىم جۇمىسشى ماماندىعى يەلەرى ساناتىنداعى 500 ايەل جينالدى. ولاردىڭ بىرقاتارىنا مەملەكەتتىك ناگرادالار تاپسىرىلدى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.

سالتاناتتى جيىن تالدىقورعانداعى ب. ريموۆا اتىنداعى اكادەميالىق دراما تەاترىندا ۇيىمداستىرىلدى. تەاتر فويەسى كوكتەم مەرەكەسىنە ساي بەزەندىرىلىپ، گۇلمەن كومكەرىلدى. قوناقتاردىڭ بارلىعىنا ءبىر شوق جاۋقازىن، قۇتتىقتاۋ حاتى مەن ەستەلىك سىيلىقتار تابىستالدى.

شارادا قۇتتىقتاۋ ءسوز سويلەگەن بەيبىت يساباەۆ ايەلدەردىڭ ءوڭىردى دامىتۋداعى ءرولى ەرەكشە ەكەنىنە توقتالدى:

- سوناۋ ەرتە كەزدەن-اق قازاق قوعامىندا ايەلدەردىڭ لايىقتى ورنى قالىپتاسقان. بۇگىنگى كۇنى بۇل يگى ءداستۇر جاڭا مازمۇنمەن تولىعىپ، انا مەن بالاعا دەگەن قامقورلىق، وتباسى ينستيتۋتىنىڭ ءرولىن ارتتىرۋ مەملەكەتتىك ساياساتتىڭ ماڭىزدى بولىگىنە اينالدى. قاي-قايسىلارىڭىز دا ءۇي مەن ءتۇزدىڭ جۇمىسىن ابىرويمەن قاتار اتقارىپ، تۋعان جەرگە، ەلگە دەگەن سۇيىسپەنشىلىكتىڭ، جانۇيا مەن اۋلەتكە قامقورلىق پەن جاناشىرلىقتىڭ ۇلگىسىن كورسەتىپ كەلەسىزدەر. سىزدەردىڭ جاۋاپتى، تالاپشىل دا تاباندى، جارقىن دا جاڭاشىل مىنەزدەرىڭىز قوعامدى ىلگەرىلەتۋگە، يگى باستامالارعا تىڭ سەرپىن بەرەدى. وسى ورايدا ەلدىڭ دامۋىنا قوسىپ جۇرگەن ەلەۋلى ۇلەستەرىڭىز ءۇشىن بارشاڭىزعا شىنايى العىسىمدى بىلدىرەمىن، - دەگەن ءوڭىر باسشىسى بۇدان ءارى ماراپاتتاۋ راسىمىنە كوشتى.

بۇل رەتتە سەگىز ادام مەملەكەتتىك ناگراداعا يە بولدى. اتاپ وتسەك، سولاردىڭ ەكەۋى - شارۋا قوجالىعىنىڭ جەتەكشىسى شاكيرا ىدىرىسوۆا ءى دارەجەلى «ەڭبەك داڭقى» وردەنىن، «ۇشتوبە-ايدىن» جشس قۇرىلتايشىسى ايبارشا بەسكەمپىروۆا ءىىى دارەجەلى «ەڭبەك داڭقى» وردەنىن استانا قالاسىندا مەملەكەت باسشىسىنىڭ قولىنان العان بولاتىن. ال جەتىسۋ وبلىسىنىڭ قارجى باسقارماسىنىڭ باسشىسى جانار كەرىمبەكوۆا مەن وبلىس اكىمى اپپاراتىنىڭ ءبولىم باسشىسى ەلميرا جىرعالباەۆاعا «قۇرمەت» وردەنىن، كەربۇلاق اۋدانىنداعى قوعالى ورتا مەكتەبىنىڭ ديرەكتورى نۇرگۇل ارپابەكوۆاعا، الاكول اۋدانىنىڭ مانساپ ورتالىعىنىڭ ديرەكتورى ءلاززات قوسانتاەۆاعا «ەرەن ەڭبەگى ءۇشىن» مەدالىن، تالدىقورعان قالالىق كوپسالالى اۋرۋحاناسىنىڭ اعا مەيىرگەرى باقىتگۇل يمانبەكوۆاعا «شاپاعات» مەدالىن، سول سياقتى قاراتالدىق زەينەتكەر پەداگوگ، ك.توقاەۆ اتىنداعى قايىرىمدىلىق قورىنىڭ وكىلى ۆالەنتينا سپيريدونوۆاعا «قازاقستاننىڭ ەڭبەك سىڭىرگەن قايراتكەرى» قۇرمەتتى اتاعىن، وعان قوسا وبلىستىق قوعامدىق كەڭەستىڭ مۇشەسى ءدانيا قىدىرباەۆاعا پرەزيدەنتتىڭ قۇتتىقتاۋ اشىق حاتىن وسى كۇنى وبلىس اكىمى تاپسىردى. سول سياقتى تاعى ون كوپ بالالى اناعا «التىن القا»، «كۇمىس القا» بەرىلدى.

ماراپاتتالعانداردىڭ اتىنان ءسوز العان ءبىلىم سالاسىندا وتىز جىلدان بەرى جۇمىس ىستەيتىن نۇرگۇل ارپابەكوۆا ريزاشىلىعىن جەتكىزىپ، جينالعان كوپشىلىكتى قۇتتىقتادى.

- بۇگىن مەنىڭ مەملەكەتتىك ماراپات - «ەرەن ەڭبەگى ءۇشىن» مەدالىن الۋىم ۇلكەن مارتەبە ءارى جاۋاپكەرشىلىك دەپ بىلەمىن. بۇل ناگرادا – مەنىڭ عانا ەمەس، بىرلەسە ەڭبەك ەتكەن ءبىزدىڭ پەداگوگيكالىق ۇجىمنىڭ ۇرپاق تاربيەسىنە سىڭىرگەن ورتاق جۇمىسىنىڭ جەمىسى. مەملەكەت باسشىسىنا ەڭبەگىمدى باعالاپ، جوعارى ماراپات بەرگەنى ءۇشىن العىسىمدى بىلدىرەمىن. ماراپاتتالۋشىلاردى شىن جۇرەكتەن قۇتتىقتاپ، بار جاقسىلىقتى تىلەيمىن، - دەدى ول.

سول سياقتى مەرەكەگە كەلگەن وزگە قاتىسۋشىلار دا ىزگى تىلەكتەرىن ءبىلدىرىپ، وي ءبولىستى.

– مەن كاسىبي مۋزىكانتپىن، قازىر زەينەتتەمىن، دەگەنمەن ءالى دە شىعارماشىلىقپەن اينالىسىپ كەلەمىن. ءبىزدىڭ وتباسىلىق ءانسامبلىمىز بار،  جۇبايىم، ەكى قىزىم، ۇلىم، كەلىنىم – ءبارىمىز بىرگە ونەر كورسەتەمىز. ءبىز قازاقتىڭ حالىق اندەرىن جانە قازىرگى ەسترادالىق اندەردى ورىندايمىز. ءبىزدىڭ رەپەرتۋارىمىزدا اسىرەسە اناعا، وتانعا ارنالعان اندەر كوپ. مەرەكە قارساڭىندا ءبىز تۇرپان اۋىلىندا جەرلەستەرىمىزگە ارناپ كونتسەرت ۇيىمداستىردىق، وعان شامامەن 200 ادام جينالدى. ءبىز سياقتى شىعارماشىلىق ادامى ءۇشىن كورەرمەندەردىڭ سۇيىسپەنشىلىگى مەن قوشەمەتى – ەڭ باستى سىيلىق. 8 ناۋرىز مەرەكەسىنە ارنالعان بۇگىنگى سالتاناتتى شاراعا شاقىرىلعانىما وتە قۋانىشتىمىن. وبلىستىڭ بارلىق ايەلدەرىنە دەنساۋلىق، اماندىق، بەيبىت ءومىر تىلەيمىن، – دەدى پانفيلوۆ اۋدانىنان كەلگەن مادەنيەت ارداگەرى ايناگۇل حايبۋللاەۆا.

وسىنداي قۇتتىقتاۋ تىلەككە «سۋففلە قازاقستان» اشىتقى زاۋىتى» اق وندىرىستىك تسەحىنىڭ باستىعى، تەكەلى قالاسىنىڭ تۇرعىنى ناتاليا اندريۋتينا دا قوسىلدى:

– مەن زاۋىتتا 2013 جىلدان بەرى جۇمىس ىستەيمىن، ياعني ۋنيۆەرسيتەتتى بىتىرگەننەن كەيىنگى ەڭبەك جولىمدى وسى كاسىپورىندا لابورانت بولىپ باستادىم، قازىر ءوندىرىس تسەحىنىڭ باستىعى قىزمەتىندەمىن. مۇنداي ناتيجەگە ەڭبەكقورلىقتىڭ، ءتارتىپتىڭ، ۇقىپتىلىقتىڭ، ۇجىمىمىزدىڭ ۇيىمشىلدىعى مەن ءبىر-بىرىنە دەگەن ءوزارا سەنىمىنىڭ ارقاسىندا جەتتىم. اسىرەسە مەنى ەرەكشەلەپ، حالىقارالىق ايەلدەر كۇنىنە ارنالعان وبلىستىق مەرەكەلىك شاراعا شاقىرعاندارىنا قۋاندىم. بۇل – ءبىزدىڭ بۇكىل كوماندامىزدىڭ ورتاق جەتىستىگى. جالپى، ماڭايىمىزداعى مەرەكەلىك كوڭىل كۇي، بالالارىمىزدىڭ قۇتتىقتاۋى، بۇگىنگى جىلى لەبىزدەر، ۇيدەگى جانە ۇجىمداعى قولداۋ، ءبارى-ءبارى بىزگە كوكتەمنىڭ شىنايى جىلىلىعىن سەزىندىرىپ تۇر. ءوڭىردىڭ بارلىق ايەل ازاماتتارىنا باقىت، جاقسىلىق تىلەيمىن، ەڭ اسىل ارماندارى ورىندالسىن، – دەدى ول.

«شاپاعات» مەدالىنە يە بولعان باقتىگۇل يمانبەكوۆا دا وي قوستى:

- بۇگىنگى مەرەكەگە قاتىسقان بارشا ايەلدەردى قۇتتىقتايمىن. مەديتسينا سالاسىندا 37 جىلدىق ەڭبەك ءوتىلىم بار، سونىڭ ىشىندە جانساقتاۋ بولىمىندە جۇمىس ىستەگەنىمە 30 جىل بولدى. بۇل ءبولىم - اسا جاۋاپتى دا كۇردەلى قۇرىلىمىنىڭ ءبىرى. ءبىزدىڭ ەڭبەگىمىزدى ەلەپ، وسىنداي قۇرمەت كورسەتىپ، قولداۋ تانىتقاندارىڭىزعا العىسىمدى بىلدىرەمىن، - دەدى ول.

سالتاناتتى جيىن مەرەكەلىك كونتسەرتپەن اياقتالدى.

اتاپ وتسەك، وسىنداي قۇتتىقتاۋ شاراسى بارلىق اۋدان-قالالاردا وتكىزىلدى.

جەتىسۋ وبلىسى اكىمىنىڭ ءباسپاسوز قىزمەتى.

Abai.kz