قاي قوعامدا بولماسىن جاستار – ەلدىڭ ەرتەڭى، مەملەكەتتىڭ ستراتەگيالىق كاپيتالى. اسىرەسە بەلسەندى، باستاماشىل جاستار قوعامداعى وزگەرىستەردىڭ الدىڭعى قاتارىندا جۇرەدى. ولار جاڭا يدەيا ۇسىنىپ، قوعامدىق ماسەلەلەردى شەشۋگە اتسالىسىپ، مادەنيەت پەن عىلىمنىڭ، تەحنولوگيا مەن كاسىپكەرلىكتىڭ دامۋىنا سەرپىن بەرەدى. سوندىقتان بەلسەندى جاستاردىڭ قىزمەتىن دامىتۋ – كەز كەلگەن مەملەكەتتىڭ ماڭىزدى مىندەتتەرىنىڭ ءبىرى.

قازىرگى ۋاقىتتا ەلىمىزدە جاستاردىڭ قوعامدىق بەلسەندىلىگىن ارتتىرۋعا باعىتتالعان ءتۇرلى باستامالار مەن جوبالار جۇزەگە اسىرىلىپ كەلەدى.

وسى رەتتە «اق جول» پارتياسىنىڭ قىزىلوردا قالالىق ماسليحاتىنداعى دەپۋتاتى اقمانات مۇراتقىزى تولەگەنوۆا قالا مەكتەپتەرىنىڭ بەلسەندى وقۋشىلارىمەن ارنايى كەزدەسۋ وتكىزدى. قالالىق ءماسليحاتتىڭ ءماجىلىس زالىندا وتكەن جيىنعا ماسليحاتتاعى ارىپتەستەر، ءبىلىم بەرۋ ۇيىمدارىنىڭ جاۋاپتى وكىلدەرى جانە بىرنەشە قوعامدىق ۇيىم جەتەكشىلەرى قاتىستى.

كەزدەسۋدىڭ نەگىزگى ماقساتى – دەپۋتاتتار مەن ايماقتىڭ بەلسەندى وقۋشىلارى اراسىندا تىعىز بايلانىس ورناتۋ، جاستاردىڭ كوشباسشىلىق قابىلەتىن دامىتۋ، ولاردى قوعامدىق بەلسەندىلىككە باۋلۋ جانە ەركىن پىكىر الماسۋعا مۇمكىندىك بەرەتىن الاڭ قالىپتاستىرۋ بولدى.

جيىن بارىسىندا اقمانات مۇراتقىزى وقۋشىلارمەن اشىق اڭگىمەلەسىپ، ولاردىڭ وي-پىكىرىن تىڭدادى. سونىمەن قاتار قاتىسۋشىلار توپتارعا ءبولىنىپ، ءتۇرلى الەۋمەتتىك جانە قوعامدىق تاقىرىپتار بويىنشا پوستەرلەر ازىرلەپ، جوبالىق جۇمىستارىن قورعادى. بۇل فورمات جاستاردىڭ شىعارماشىلىق ويلاۋىن دامىتىپ، ءوز كوزقاراسىن اشىق جەتكىزۋگە مۇمكىندىك بەردى.

مۇنداي كەزدەسۋلەر جاستاردىڭ ازاماتتىق بەلسەندىلىگىن ارتتىرۋعا، قوعامدىق ومىرگە قىزىعۋشىلىعىن وياتۋعا ىقپال ەتەدى. سەبەبى جاس بۋىن ءوز پىكىرىنىڭ ەسكەرىلەتىنىن سەزىنگەن كەزدە قوعامداعى وزگەرىستەرگە بەلسەنە ارالاسا باستايدى.

بۇگىنگى جاس ۇرپاق – جاڭا يدەيالاردىڭ يەسى. ولاردىڭ بىلىمگە قۇشتارلىعى مەن قوعامدىق بەلسەندىلىگى ەلدىڭ بولاشاعىن ايقىندايدى. سوندىقتان جاستاردىڭ باستامالارىن قولداپ، ولاردىڭ كوشباسشىلىق قابىلەتىن دامىتۋ – قوعامنىڭ باستى مىندەتتەرىنىڭ ءبىرى.

بەلسەندى جاستار – ەلدىڭ سەنىمدى تىرەگى، ال ولاردىڭ بۇگىنگى قادامى – ەرتەڭگى قازاقستاننىڭ دامۋ باعىتىن ايقىندايتىن ماڭىزدى كۇش.

Abai.kz