ەل تۇرعىندارى رەسپۋبليكالىق رەفەرەندۋمعا بەلسەندى تۇردە قاتىسىپ، داۋىستارىن بەرىپ جاتىر. ورتالىق سايلاۋ كوميسسياسىنىڭ دەرەگىنشە، تاڭعى ساعات 10:00-گە دەيىن 2 ميلليوننان استام بيۋللەتەن تولتىرىلعان. ولاردىڭ ىشىندە ەل نامىسىن جىرتىپ جۇرگەن سپورتشىلارىمىز دا از ەمەس.

بوكستان سيدنەي وليمپياداسىنىڭ چەمپيونى ەرماحان يبرايموۆ الەۋمەتتىك جەلىدە سايلاۋ ۋچاسكەسىنە كەلىپ، داۋىس بەرگەنى جايىندا پوست جاريالادى.

«بۇگىن رەفەرەندۋمعا قاتىسىپ، ءوز تاڭداۋىمدى جاسادىم. ارقاشان ەلىمنىڭ نامىسىن قورعاپ كەلدىم، ال بۇگىن ازامات رەتىندە ءوز پىكىرىمدى ءبىلدىردىم»، دەپ جازدى بىلعارى قولعاپ شەبەرى.

ەركىن كۇرەستەن لوندون وليمپياداسىنىڭ قولا جۇلدەگەرى اقجۇرەك تاڭاتاروۆ دا ەل ەرتەڭىنە بەيجاي قارامايتىن جۇرتتىڭ قاتارىنان تابىلىپ، ازاماتتىق مىندەتىن ورىندادى.

«ءار ادامنىڭ، ءاربىر قازاقستاندىق ازاماتتىڭ داۋىس بەرۋى – ەلىمىزدىڭ بولاشاعى مەن كەلەشەك ۇرپاقتىڭ تاعدىرى ءۇشىن ماڭىزدى. سول سەبەپتەن مەن ءوز داۋىسىمدى بەرىپ، تاڭداۋىمدى جاسادىم»، دەدى ول.

سونداي-اق 1994, 1998 جىلدارداعى قىسقى وليمپيادا ويىندارىنىڭ قاتىسۋشىسى، كونكيمەن جۇگىرۋشى كەنجەش سارسەكەنوۆا، گرەك-ريم كۇرەسىنىڭ ارداگەرى سالين رۇستەمبەكوۆ، فۋتبول ارداگەرى سارمان راحيمشالوۆ، كونكيمەن جۇگىرۋ سپورتىنان جاستار اراسىندا الەم چەمپيونى كريستينا شۋمەكوۆا دا رەسپۋبليكالىق رەفەرەندۋمدا داۋىستارىن بەردى.

Abai.kz