جەتىسۋ وبلىسىنىڭ تۇرعىندارى رەفەرەندۋمعا بەلسەندى قاتىسىپ، تاڭنان بەرى تۇتاس اۋىل بولىپ داۋىس بەرۋدە.

ماسەلەن، قاراتال اۋدانىنىڭ كالپە اۋىلىندا 400 ادام، كوكسۋ اۋدانىنىڭ 10 جىلدىق قازاقستان اۋىلىندا 200 ادام، كەربۇلاق اۋدانىنىڭ باسشي اۋىلىندا 100 ادام ۋچاسكەگە ءبىر مەزەتتە كەلىپ، جاپپاي داۋىس بەردى.

بۇل رەتتە قاراتال اۋدانى كالپە اۋىلىندا داۋىس بەرۋگە اۋىلدىڭ 14 كوشەسىنىڭ تۇرعىنى كەلدى. ولاردىڭ اراسىندا ءوز ءومىرىنىڭ 40 جىلىن ۆەتەرينار دارىگەرلىك ماماندىعىنا ارناعان قاريا سۇلەيمەن انداسباەۆ، سول سياقتى دەنساۋلىق ساقتاۋ سالاسىنىڭ ارداگەرى باتەن بۇلدىباەۆا دا بار.

– رەفەرەندۋمنىڭ ناۋرىز مەرەكەسىنىڭ باستالۋىمەن تۇسپا-تۇس كەلۋى بىزگە ەرەكشە كوڭىل كۇي سىيلادى. ۋچاسكە اشىلعان ساتتەن باستاپ-اق مۇندا مەرەكە ەرەكشە سەزىلدى. ۋچاسكەنىڭ جانىندا كيىز ءۇي تىگىلىپ، داۋىس بەرۋگە كەلگەندەر ۇلتتىق تاعامداردان ءدام تاتتى. بالالارىمىز اسىق ويناپ، جاستار التىباقان تەپتى. تۇرعىنداردىڭ ءبىر ۋاقىتتا بىرگە كەلىپ داۋىس بەرۋى – حالىقتىڭ بىرلىگىنىڭ جارقىن كورىنىسى ءارى ەلىمىزدىڭ بولاشاعىنا قوسقان ورتاق ۇلەسىمىز دەپ سانايمىن. سەبەبى كونستيتۋتسيا – تۇراقتىلىق پەن دامۋىمىزدىڭ نەگىزى، – دەدى ب. بۇلدىباەۆا.

سول سياقتى ون جىلدىق قازاقستان اۋىلى دا قاشاندا ءوزىنىڭ ەڭبەك داستۇرىمەن، قاۋىمدىق جاۋاپكەرشىلىگىنىڭ مىقتىلىعىمەن داڭقى شىققان. بۇل ەلدى مەكەن بۇگىن دە ەلدىڭ ساياسي ومىرىنە بەلسەنە قاتىسۋدا. داۋىس بەرۋگە ءبىر مەزەتتە 200 ادامنىڭ بىرگە كەلۋى - حالىقتىڭ مەملەكەتتىك ينستيتۋتتارعا دەگەن سەنىمىن تانىتاتىن سانالى قادام.

- ءبىز ءۇشىن رەفەرەندۋمعا قاتىسۋ جاي عانا پارىز ەمەس، ءبىزدىڭ ەرىكتى تاڭداۋىمىز. بۇگىن ءبارىمىز بىرگە كەلىپ، اۋىلىمىزدىڭ تاعدىرى، تۇتاس ەلىمىزدىڭ بولاشاعى ءبىز ءۇشىن ماڭىزدى ەكەنىن بىلدىردىك. ءبىز بىرگە داۋىس بەرۋ ارقىلى ءوز ىنتىماعىمىزدىڭ كۇش-قۋاتىن سەزىندىك، - دەدى اۋىل اقساقالدارىنىڭ ءبىرى ساپار سماعۇلوۆ.

جاس بۋىن وكىلدەرى دە پىكىر قوستى:

- بۇگىن مەن العاش رەت داۋىس بەردىم، مۇندا اتا-اناممەن، كورشىلەرىممەن بىرگە كەلدىم. ۇلكەندەردىڭ رەفەرەندۋمعا قانداي جاۋاپكەرشىلىكپەن قارايتىنىن كورىپ، ءبىزدىڭ ەرتەڭىمىز بۇگىن جانە ءدال وسى جەردەن باستالاتىنىن ۇعىندىم، - دەيدى  اۋىلدىڭ بەلسەندى جاسى نازەركە مۇساباي.

Abai.kz