استانا قالاسىنىڭ قۇرىلىس باسقارماسى زاڭسىز يەمدەنىلگەن اكتيۆتەردى قايتارۋ تۋرالى زاڭدى ىسكە اسىرۋ اياسىندا 2023–2026 جىلدارى قالادا 12 ءبىلىم بەرۋ نىسانىن سالۋعا ءبىلىم بەرۋ ينفراقۇرىلىمىن قولداۋ قورىنان 27,4 ملرد تەڭگە بولىنگەنىن ءمالىم ەتتى.

— بۇگىندە اتالعان 12 نىساننىڭ 8-ءى پايدالانۋعا بەرىلدى. اتاپ ايتقاندا، № 53, № 44, № 59 جانە № 5 مەكتەپتەرىنە قوسىمشا عيماراتتار، كوكسەڭگىر كوشەسى بويىنداعى مەكتەپ، قاراساي باتىر مەن بۇلانتى كوشەلەرى اۋدانىنداعى مەكتەپ، ۇلى دالا داڭعىلى مەن ساۋران كوشەسى قيىلىسىنداعى، سونداي-اق تۇران داڭعىلى مەن № 24 كوشەسى اۋدانىنداعى مەكتەپتەر ىسكە قوسىلدى، — دەپ جاۋاپ بەردى ۆەدومستۆو Kazinform اگەنتتىگىنىڭ ساۋالىنا.

سونىمەن قاتار قالعان 4 نىساننىڭ قۇرىلىسى 2026 جىلعى 1 قىركۇيەككە دەيىن اياقتالادى دەپ جوسپارلانىپ وتىر. ولار — № 79, № 86, № 17 جانە № 27 مەكتەپتەرىنە ارنالعان قوسىمشا عيماراتتار.

بۇعان دەيىن باس پروكۋراتۋرا بىلتىر سوتتار مەملەكەتكە 165 ملرد تەڭگەگە جۋىق زاڭسىز اكتيۆتەردى قايتارۋ تۋرالى شەشىم شىعارعانىن حابارلاعان ەدى.

سونىمەن قاتار مەملەكەت باسشىسى قاسىم-جومارت توقاەۆ Turkistan گازەتىنە بەرگەن سۇحباتىندا زاڭسىز اكتيۆتەردى ەلگە قايتارۋ ارقىلى الەۋمەتتىك ادىلدىكتى قالپىنا كەلتىرۋ — كونيۋكتۋرا نە بولماسا جۇرتقا جاعۋ ءۇشىن جاسالعان ساياسي ناۋقان ەمەس دەپ اتاپ ءوتتى.

ەسكە سالا كەتەيىك، 2022 جىلدان بەرى مەملەكەتكە جانە كۆازيمەملەكەتتىك سەكتور سۋبەكتىلەرىنە 1 تريلليون 130 ميلليارد تەڭگەدەن استام اكتيۆ قايتارىلدى.

Abai.kz