مەملەكەت باسشىسى قاسىم-جومارت توقاەۆ ءتيىستى جارلىققا قول قويدى، دەپ حابارلايدى اقوردانىڭ ءباسپاسوز قىزمەتى.

— مەملەكەت باسشىسىنىڭ جارلىعىمەن نۇرلان سەرىكۇلى بايبازاروۆ قازاقستان رەسپۋبليكاسى پرەزيدەنتىنىڭ ەكونوميكالىق ماسەلەلەر جونىندەگى كومەكشىسى بولىپ تاعايىندالدى، ول بۇرىنعى اتقارعان لاۋازىمىنان بوساتىلدى، — دەلىنگەن حابارلامادا.

نۇرلان سەرىكۇلى 1975 جىلى 10 قازاندا تۋعان.

1997 جىلى قازاق مەملەكەتتىك باسقارۋ اكادەمياسىن «بانك ءىسىن ۇيىمداستىرۋ» ماماندىعى بويىنشا بىتىرگەن. قازاق، ورىس اعىلشىن تىلدەرىن مەڭگەرگەن. «ەرەن ەڭبەگى ءۇشىن» مەدالىمەن ماراپاتتالعان.

23 جىلدىق جۇمىس ءوتىلى بار، ونىڭ 7-ءى «قازاقستاننىڭ دامۋ بانكى» اق-دا باسشىلىق لاۋازىمداردا. 1997-2003 جىلدارى قر قارجى مينيسترلىگىندە جۇمىس ىستەدى.

2004 جىلدان 2011 جىلعا دەيىن جوبالارعا اگەنتتىك قىزمەت كورسەتۋ باسقارماسىنىڭ باستىعى، ينۆەستيتسيالىق جوبالار جونىندەگى باسقارۋشى ديرەكتور، كورپوراتيۆتىك دامۋ دەپارتامەنتىنىڭ ديرەكتورى، «قازاقستاننىڭ دامۋ بانكى» اق كورپوراتيۆتىك حاتشىسى لاۋازىمدارىن اتقاردى.

2013 جىلدان 2016 جىلعا دەيىن قر ۇلتتىق ەكونوميكا مينيسترلىگىنىڭ ەكونوميكا سالالارىن دامىتۋ دەپارتامەنتىن باسقاردى. بۇدان باسقا، ءار جىلدارى «قازاقستان تەمىر جولى» ۇك» اق، «قازمۇنايگاز كونسالتينگ» اق، «قازمۇنايگاز» ۇك» اق جۇمىس ىستەدى.

2016 جىلدان باستاپ 2022 جىلعى قاراشاعا دەيىن «ونەركاسىپتى دامىتۋ قورى» اق ديرەكتورلار كەڭەسىنىڭ مۇشەسى جانە باسقارما توراعاسى بولدى.

2022 جىلدىڭ قاراشا ايىنان 2023 جىلدىڭ قازان ايىنا دەيىن «قازاقستاننىڭ دامۋ بانكى» اق باسقارما توراعاسى بولدى.

«بايتەرەك» ۇلتتىق باسقارۋشى حولدينگى» اق جالعىز اكتسيونەرىنىڭ 2023 جىلعى 05 قازانداعى شەشىمىمەن حولدينگتىڭ باسقارما توراعاسى قىزمەتىنە تاعايىندالدى.

2024 جىلعى 6 اقپاندا قازاقستان رەسپۋبليكاسى پرەمەر-ءمينيسترىنىڭ ورىنباسارى — ۇلتتىق ەكونوميكا ءمينيسترى بولىپ تاعايىندالدى.

بۇدان بۇرىن سەرىك ساپيەۆ پەن قانات يسلام قازاقستان بوكس فەدەراتسياسىندا قىزمەتكە كەلگەنىن جازعان بولاتىنبىز.

Abai.kz