قازاقستاندا جىلىتۋ ماۋسىمى اياقتالۋعا جاقىن، ونىڭ ورنىن اۋقىمدى جوندەۋ ناۋقانى باسادى. ەنەرگەتيكتەر توزعان كوممۋنيكاتسيالاردى جاڭارتۋعا كىرىسپەك. بۇل تۋرالى ۆەدومستۆونىڭ ءباسپاسوز قىزمەتى ءمالىم ەتتى.

قر ەنەرگەتيكا مينيسترلىگى ءۇشىن جىلۋ جەلىلەرىن اۋقىمدى جاڭعىرتۋ — توزۋ دەڭگەيىن تومەندەتۋگە جانە جىلۋمەن جابدىقتاۋ سەنىمدىلىگىن ارتتىرۋعا باعىتتالعان باسىم باعىت بولماق.

بۇگىنگى تاڭدا رەسپۋبليكا بويىنشا جىلۋمەن جابدىقتاۋ جەلىلەرىنىڭ جالپى ۇزىندىعى 13,4 مىڭ شاقىرىمدى قۇرايدى.

بىلتىر جىلۋ جەلىلەرىندە 323 شاقىرىمدى قۇرايتىن رەكونسترۋكتسيالاۋ جانە كۇردەلى جوندەۋ جۇرگىزىلدى. بۇل توزۋدىڭ ورتاشا دەڭگەيىن 52%-دان 50%-عا دەيىن تومەندەتۋگە، سونداي-اق حالىقتى جىلۋمەن قامتاماسىز ەتۋ سەنىمدىلىگىن ۇلعايتتى.

— بيىل 377 شاقىرىم جىلۋ جەلىسىن كۇردەلى جوندەۋدەن وتكىزۋ جانە جاڭعىرتۋ جوسپارلانعان. نەگىزگى نازار جەلىلەرىنىڭ توزۋ دەڭگەيى جوعارى وڭىرلەرگە — شقو، قاراعاندى، ماڭعىستاۋ، پاۆلودار جانە سقو-عا اۋدارىلادى، — دەلىنگەن حابارلامادا.

سونىڭ ىشىندە، ەنەرگەتيكا سالاسىن جاڭعىرتۋ جونىندەگى ۇلتتىق جوبا اياسىندا 2026 جىلى 130 شاقىرىم جىلۋ جەلىسىن جاڭارتۋ كوزدەلگەن. تۇتاستاي العاندا، بۇل كەشەندى جۇمىستار جىلۋ جەلىلەرى توزۋىنىڭ ورتاشا دەڭگەيىن 48%-عا دەيىن تومەندەتۋگە جاعداي جاسايدى.

جالپى، 2029 جىلعا دەيىن ۇلتتىق جوبا اياسىندا ەلىمىز بويىنشا 1,6 مىڭ شاقىرىم جىلۋ جەلىسىن جاڭارتۋ قاراستىرىلعان، بۇل توزۋ دەڭگەيىن 42%-عا دەيىن ازايتپاق.

ايتا كەتەرلىگى، قر ەنەرگەتيكا مينيسترلىگىنىڭ مەملەكەتتىك ەنەرگەتيكالىق قاداعالاۋ جانە باقىلاۋ كوميتەتى جىلۋ ينفراقۇرىلىمىنىڭ جاي-كۇيى مەن جاڭعىرتىلۋىنا تۇراقتى باقىلاۋ جۇرگىزەدى. اعىمداعى جىلدىڭ ءبىرىنشى توقسانىندا ۆەدومستۆو اكىمدىكتەرمەن بىرلەسىپ، جىلۋ ءوندىرۋشى جانە جىلۋ تاسىمالداۋشى ۇيىمداردىڭ 2026 جىلعا ارنالعان جوندەۋ باعدارلامالارىنا رەۆيزيا جۇرگىزدى.

Abai.kz