مەملەكەت باسشىسى جەتىسۋ وبلىسىنىڭ اكىمى بەيبىت يساباەۆتى قابىلدادى، دەپ حابارلايدى اقوردانىڭ ءباسپاسوز قىزمەتى.

قاسىم-جومارت توقاەۆقا ءوڭىردىڭ الەۋمەتتىك-ەكونوميكالىق دامۋى مەن الداعى جوسپارلارى تۋرالى باياندالدى.

بەيبىت يساباەۆ 2025 جىلدىڭ قورىتىندىسى بويىنشا بارلىق نەگىزگى ماقساتتى ينديكاتورعا قول جەتكىزىلگەنىن ايتتى. وڭىرگە 610 ميلليارد تەڭگە ينۆەستيتسيا تارتىلعان، بۇل الدىڭعى جىلمەن سالىستىرعاندا 12,8 پايىزعا ارتىق.

پرەزيدەنتكە اگروونەركاسىپ كەشەنىن دامىتۋ جوسپارى تانىستىرىلدى. اۋىل شارۋاشىلىعى داقىلدارى، سونىڭ ىشىندە قانت قىزىلشاسى القابى كەڭەيدى. اقسۋ جانە كوكسۋ قانت زاۋىتتارىنىڭ وندىرىستىك قۋاتىن 2 ەسەگە ارتتىرىپ، 950 مىڭ تونناعا جەتكىزۋ جۇمىستارى جۇرگىزىلىپ جاتىر. 2027 جىلعا دەيىن قۇنى 94,4 ميلليارد تەڭگە بولاتىن 23 ينۆەستيتسيالىق جوبانى ىسكە اسىرۋ جوسپارلانعان. اتاپ ايتقاندا، قۇس فابريكالارى، مال بورداقىلاۋ الاڭدارى، بالىق جانە جىلىجاي شارۋاشىلىقتارى مەن باسقا دا جوبالار بار.

ونەركاسىپ سالاسىندا سوڭعى ءۇش جىلدا 29 جاڭا نىسان ىسكە قوسىلىپ، 7 كاسىپورىن كەڭەيتىلدى، سونىڭ ناتيجەسىندە 1841 جۇمىس ورنى اشىلدى.

مەملەكەت باسشىسىنا ينفراقۇرىلىمدى دامىتۋ جايىندا مالىمەت بەرىلدى. ءوڭىردى گازداندىرۋ دەڭگەيى 67,2 پايىزعا جەتتى. «تالدىقورعان – ءۇشارال» ماگيسترالدى گاز قۇبىرى تارتىلىپ، 650 مىڭنان استام تۇرعىنى بار 210 ەلدى مەكەن كوگىلدىر وتىنعا قول جەتكىزدى.

وبلىستىڭ تۋريزم سالاسىنداعى مۇمكىندىكتەرىن كەڭەيتۋ باعىتىندا جۇمىستار جالعاسۋدا. الاكول، بالقاش جاعالاۋلارىندا تۋريستىك نىساندارعا باراتىن جولدار سالىنىپ، اۋىز سۋ، ەلەكتر جەلىسى، كارىز جۇيەلەرى تارتىلدى. جاعالاۋلاردى بەكىتۋ شارالارى قولعا الىندى. بۇرقانبۇلاق سارقىراماسىنا اپاراتىن 31 شاقىرىمدىق جول جاڭارتىلىپ جاتىر.

«تازا قازاقستان» ەكولوگيالىق باعدارلاماسى اياسىندا وڭىردە ءۇش ەكوپارك سالىپ، 121 مىڭ اعاش ەگۋ كوزدەلگەن.

مەملەكەت باسشىسى وبلىس اكىمىنە قىتاي حالىق رەسپۋبليكاسىمەن شەكارالاس «دوستىق» بەكەتىندەگى جانە «قورعاس» ارنايى ەكونوميكالىق ايماعىنداعى جۇمىستاردى ءتيىمدى ۇيىمداستىرۋ، سونداي-اق الاكول، بالقاش كولدەرى جاعالاۋىنداعى دەمالىس ورىندارىن، تاۋ ءتۋريزمىن قارقىندى تۇردە دامىتۋ جونىندە بىرقاتار تاپسىرما بەردى.

Abai.kz