جەتىسۋ وبلىسىنىڭ اكىمى بەيبىت يساباەۆ قاراتال اۋدانىنا جاساعان جۇمىس ساپارى بارىسىندا ۇشتوبە قالاسىنداعى ورتالىق ساياباقتىڭ جوندەۋ جۇمىستارىمەن تانىستى. بۇل ساياباق «تازا قازاقستان» ەكولوگيالىق باعدارلاماسى اياسىندا جاڭا كەيىپكە ەنبەك، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.

ەسكە سالساق، وتكەن جىلى حالىقپەن كەزدەسۋى بارىسىندا پاركتىڭ جاعدايىمەن تانىسقان وبلىس اكىمى وعان جوندەۋ جۇرگىزۋدى تاپسىرىپ، سوعان سايكەس ءتيىستى شارالار قولعا الىنعان بولاتىن.

بۇگىن ساياباققا ارنايى بارعان ءوڭىر باسشىسىنا اۋدان اكىمى ۇلان دوسىمبەكوۆ ونىڭ اعىمداعى جوندەۋ جۇمىستارىنىڭ باس جوسپارىمەن تانىستىردى. اۋدان باسشىسىنىڭ ايتۋىنشا، ساياباقتا ەكى كىرەبەرىس قاقپا بولادى. سۋبۇرقاق، ويىن الاڭدارى، جاياۋ جۇرگىنشىلەر جولى جانە دەمالىسقا قاجەتتى باسقا دا مۇمكىندىكتەر قاراستىرىلادى. جوبا وسى جىلدىڭ قىركۇيەك ايىنا دەيىن اياقتالادى دەپ مەجەلەنگەن.

جوسپارعا قاتىستى سۇراقتارىن ەگجەي-تەگجەيلى ناقتىلاپ، بىرقاتار ەسكەرتپەلەرىن ەنگىزگەن وبلىس اكىمى:

- بيىل «تازا قازاقستان» رەسپۋبليكالىق ەكولوگيالىق باعدارلاماسى اياسىندا ءۇش اۋدانداعى ورتالىق ساياباقتاردا سۋارۋ جۇيەسىن جۇرگىزىپ، اباتتاندىرۋ جانە كۇردەلى جوندەۋ جوسپارلانعان. سونىڭ ءبىرى – وسى قاراتال اۋدانى ورتالىعىنداعى ساياباق. پاركتىڭ جوندەۋ جۇمىستارىن ساپالى جۇرگىزىپ، مەرزىمىندە اياقتاڭىزدار. جاسىل جەلەك جايقالىپ ءوسۋ ءۇشىن مۇندا اۆتوسۋارۋ جۇيەسىن جۇرگىزۋ وتە ماڭىزدى. بۇل ساياباق اۋداننىڭ ەرەسەك تۇرعىندارى ءۇشىن دە، بالالار ءۇشىن دە جايلى دەمالىس ورنىنا اينالۋى ءتيىس، - دەدى ب. يساباەۆ.

اتاپ وتسەك، ۇشتوبەدەگى ورتالىق ساياباق 1936 جىلى سالىنعان، وعان سوڭعى رەت 2012 جىلى جوندەۋ جۇرگىزىلىپتى. ساياباقتىڭ جالپى اۋماعى 6,6 گا.

قاراتال اۋداندىق تۇرعىن ءۇي-كوممۋنالدىق شارۋاشىلىعى، جولاۋشى كولىگى، اۆتوموبيل جولدارى، تۇرعىن ءۇي ينسپەكتسياسى ءبولىمىنىڭ باستىعى فارحات بولەكباەۆتىڭ سوزىنە سۇيەنسەك، مۇندا ەسكى اعاشتاردى كەسۋ، بۇتاقتاردى قىرقۋ، جاڭا كوشەتتەر ەگۋ، اعاشتاردى قالىپتاۋ جۇمىستارى جۇرگىزىلگەن.

- ساياباق اۋماعىنا 1200 اعاش وتىرعىزىلدى، ونىڭ 750-ءى قىلقان جاپىراقتى، 450-ءى جاپىراقتى اعاشتار. جوباعا سايكەس قازىر تروتۋارلار سالۋ بويىنشا ولشەپ-بەلگىلەۋ جۇمىستارى ءجۇرىپ جاتىر. ەسكى امفيتەاترعا كۇردەلى جوندەۋ جاسالادى، ونىڭ استىڭعى بولىگىنە فۋت-كورت ورنالاستىرىلىپ، ول قىزمەت كورسەتۋ نىساندارىن اشۋ ءۇشىن جەكە كاسىپكەرلەرگە بەرىلەدى. ساياباقتىڭ شىعىس بولىگىندە سۋبۇرقاق سالىنادى، ەتنواۋىل قۇرىلادى. ال سولتۇستىك بولىگىندە رەلاكس-ايماقتار جاسالادى، سول سياقتى قولدانىستاعى ويىن الاڭدارى جاڭارتىلىپ، قوسىمشا سكەيت-پاركتەر جاسالادى، - دەدى ف. بولەكباەۆ.

ونىڭ ايتۋىنشا، الداعى ۋاقىتتا شاعىن ارحيتەكتۋرالىق پىشىندەردى ورناتۋ، گۇلزارلاردى ورنالاستىرۋ، گۇل وتىرعىزۋ، كوگالداندىرۋ، اۆتوماتتى سۋارۋ جۇيەسىن جۇرگىزۋ، ساياباق ينفراقۇرىلىمىن دامىتۋ جانە جايلاستىرۋ، تروتۋار توسەۋ جۇمىستارى اتقارىلادى. بۇگىنگى كۇنى جوندەۋ جۇمىستارىنا مەردىگەر كومپانيانىڭ 10 ادامى، 6 تەحنيكاسى تارتىلعان، الدا جۇمىسشىلار سانىن 60-قا دەيىن جەتكىزۋ كوزدەلىپ وتىر.

جالپى، وبلىس قۇرىلعاننان بەرى اۋدان-قالالاردا 14 جاڭا ساياباق، 6 سكۆەر جانە 4 اللەيا سالىنعان، سول سياقتى 2022–2025 جىلدارى 40 ساياباققا كۇردەلى جوندەۋ جۇرگىزىلدى. وسى جىلى دا اباتتاندىرۋ جۇمىستارى جالعاسىپ، تاعى 10 ساياباق، 1 سكۆەر، 3 اللەيا جوندەلمەك. سونداي-اق مەملەكەت باسشىسىنىڭ تاپسىرماسىنا سايكەس وبلىستا جالپى اۋدانى 74 گەكتاردى قۇرايتىن ءۇش ەكو-ساياباق قۇرۋ جوسپارلانىپ وتىر.

Abai.kz