قارجى مونيتورينگ حالىقارالىق ىزدەۋ جاريالانعان «قازتەمىرترانس» اق-نىڭ بۇرىنعى ۆيتسە-پرەزيدەنتى ازامات قاپەنوۆكە قاتىستى تەرگەۋدىڭ ءمان-جايىن جاريا ەتتى دەپ حابارلايدى Ertenmedia.kz.

تەرگەۋ دەرەگى بويىنشا، ازامات قاپەنوۆ قىزمەت بابىن پايدالانىپ، جۇك ۆاگوندارىنا وپەراتورلىق قىزمەت كورسەتۋدە جاقىن كومپانيالارعا زاڭسىز جەڭىلدىكتەر جاساعان. سونىڭ سالدارىنان مەملەكەتتىك تاسىمالداۋشىعا 5,2 ميلليارد تەڭگەدەن استام شىعىن كەلتىرىلگەن.

«قازىر قاپەنوۆكە حالىقارالىق ىزدەۋ جاريالانعان. سوت سىرتتاي قاماۋعا الۋ تۇرىندەگى بۇلتارتپاۋ شاراسىن بەكىتتى. كەلتىرىلگەن زالالدى وتەۋ ماقساتىندا دوستىق ستانتسياسىنداعى تەرمينالدى سوتقا دەيىن تاركىلەۋ تۋرالى ءوتىنىش بەرىلگەن»، – دەلىنگەن قما حابارلاماسىندا.

استانا قالاسىنىڭ سوتى ءوتىنىشتى قاناعاتتاندىرىپ، اتالعان تەرمينال مەملەكەت مەنشىگىنە ءوتتى. اگەنتتىكتىڭ حابارلاۋىنشا، قايتارىلعان اكتيۆتەر قازاقستاننىڭ كولىك-لوگيستيكا الەۋەتىن دامىتۋعا جۇمسالماق.

1978 جىلى تۋعان ازامات قاپەنوۆ رەسەي ازاماتى، بۇرىنعى ۇقك باسشىسى، سوتتالعان كارىم ءماسىموۆتىڭ بۇرىنعى كۇيەۋ بالاسى رەتىندە بەلگىلى. ول ءماسىموۆتىڭ قىزى ءتاميلا كارىمگە ۇيلەنگەنىمەن، 2022 جىلعى قاڭتار وقيعاسىنان كەيىن اجىراسىپ كەتكەن.

بۇعان دەيىن قاپەنوۆ ءباا-دە ۇستالىپ، كەيىن بوساتىلعان ەدى. بىرىككەن اراب امىرلىكتەرىنىڭ بيلىگى قازاقستاننىڭ ونى ەكستراديتسيالاۋ تۋرالى ءوتىنىشىن قاناعاتتاندىرماعان. ادۆوكاتتارىنىڭ ايتۋىنشا، قازىر ول دۋبايدا تۇرىپ جاتىر. قارجىلىق مونيتورينگ اگەنتتىگى تەرگەۋ جالعاسىپ جاتقانىن مالىمدەپ، وزگە اقپاراتتاردى ازىرگە قۇپيا ۇستاپ وتىر.

Abai.kz