اتوم ەنەرگەتيكاسى جونىندەگى اگەنتتىك توراعاسى الماسادام ساتقاليەۆ اتوم ەلەكتر ستانساسىن سالۋعا لايىقتى الاڭداردى اتادى.

- قازاقستاننىڭ ەلەكتر ەنەرگەتيكالىق جەلىلەرىنىڭ دامۋىن ەسكەرە وتىرىپ، كەمىندە 3, ال كەلەشەكتە 4 اتوم ەلەكتر ستانساسىن سالۋ قاجەت دەپ ەسەپتەيمىز. قازىرگى ۋاقىتتا كەلەشەگى بار الاڭداردىڭ بارلىعىن بارىنشا بايىپپەن زەردەلەپ شىقتىق. بولجامدى ەنەرگەتيكالىق تەڭگەرىم، ەكولوگيالىق، سەيسميكالىق قاۋىپسىزدىك تالاپتارى تۇرعىسىنان قازاقستاندا اتوم ەنەرگەتيكاسى ءۇشىن بىرنەشە بىرەگەي الاڭ بار. ءبىرىنشىسى – بالقاش ماڭى الاڭى. ول جەر 6 ءىرى ەنەرگەتيكالىق بلوكقا دەيىن سالۋعا مۇمكىندىك بەرە الادى. كۋرچاتوۆ بار، مۇمكىن شاعىن جانە ورتا قۋاتتى اتوم رەاكتورلارىن دامىتۋ ءۇشىن بارىنشا الەۋەتتى الاڭ بولا الادى، - دەدى اگەنتتىك توراعاسى اقوردادا باق وكىلدەرىنىڭ ساۋالىنا وراي.

ول اەس قۇرىلىسى ءۇشىن لايىقتى ورىنداردىڭ تاعى ءبىرى رەتىندە باتىس قازاقستاندى اتادى. ونىڭ ايتۋىنشا، بۇل وڭىردە ەنەرگەتيكالىق قوندىرعى جۇمىس ىستەپ، تەك ەلەكتر ەنەرگياسىن عانا ءوندىرىپ قويماي، جىلۋ، سۋدى ىسىتۋ جانە سۋدى تۇشىتۋ ءۇشىن پايدالانىلدى.

- دەگەنمەن قازاقستاندا باسقا دا الاڭدار بار. قازىرگى ۋاقىتتا ولاردى زەرتتەپ جاتىرمىز. ەنەرگيا بالانسىنا بايلانىستى مۇمكىن ەندى 20-30 جىلدان كەيىن قوستاناي الاڭى قاراستىرىلۋى مۇمكىن. ول جەر دە قازاقستانداعى اتوم ستانساسى قۇرىلىسى ءۇشىن بولاشاعى بار ورىن بولا الادى، - دەدى الماسادام ساتقاليەۆ.

Abai.kz