قر وقۋ-اعارتۋ ءمينيسترىنىڭ بيىلعى 15 ساۋىردەگى بۇيرىعىمەن سالالىق «پووششرەنيا» (كوتەرمەلەۋ) جۇيەسىنە ەلەۋلى وزگەرىستەر ەنگىزىلدى. بۇل جاڭاشىلدىقتاردىڭ باستى ماقساتى – ماراپاتتاۋ پروتسەسىن تولىق تسيفرلاندىرۋ جانە اشىقتىقتى قامتاماسىز ەتۋ. ەندى ۇستازداردى ۇلىقتاۋ ءىسى «ماراپات» ءمودۋلى ارقىلى جۇزەگە اسپاق. ساراپتاپ كورەيىك.

تسيفرلى «ماراپات»: قاعازباستىلىقتان ارىلۋ ما؟

جاڭا ەرەجەگە سايكەس، بۇدان بىلاي ۆەدومستۆولىق ماراپاتتارعا قۇجات قابىلداۋ مەرزىمى مەن كۆوتا مولشەرى ۇلتتىق ءبىلىم بەرۋ دەرەكتەر قورىنىڭ (ۇبدق) «ماراپات» ءمودۋلى ارقىلى حابارلانادى. مينيسترلىكتىڭ كادر قىزمەتى ءتيىستى حابارلامانى مەرەكەلىك داتاعا دەيىن كەمىندە 70 كۇنتىزبەلىك كۇن قالعاندا جولداۋى ءتيىس.

بۇل قادام ماراپاتتاۋ پروتسەسىنىڭ «جابىق ەسىك جاعدايىندا» وتۋىنە توسقاۋىل قويماق. ەندى ءاربىر ءبىلىم بەرۋ ۇيىمى – مەيلى ول مەملەكەتتىك بولسىن، مەيلى جەكەمەنشىك بولسىن – لايىقتى كادرلارىن جۇيە ارقىلى تىكەلەي ۇسىنا الادى.

ءوتىنىم بەرۋ كەستەسى: ناقتىلىق پەن مەرزىم

ماراپاتتاۋ پروتسەسى بىرنەشە كەزەڭنەن تۇرادى جانە ءار دەڭگەيدىڭ ءوز جاۋاپكەرشىلىگى مەن مەرزىمى بەكىتىلگەن:

ءبىلىم بەرۋ ۇيىمدارى: مەرەكەگە 50 كۇن قالعاندا اۋداندىق/قالالىق ءبىلىم بولىمدەرىنە ۇسىنىس پەن ماراپاتتاۋ پاراعىن جولدايدى.

اۋداندىق/قالالىق دەڭگەي: ۇزدىك پەداگوگتەر مەن سالا ۇزدىكتەرىنىڭ ءتىزىمىن جاساقتاپ، كۆوتاعا ساي وبلىستىق باسقارماعا مەرەكەگە 40 كۇن قالعاندا وتكىزەدى.

وبلىستىق/رەسپۋبليكالىق ماڭىزى بار قالالار: رەيتينگى جوعارى پەداگوگتەر ءتىزىمىن بەكىتىپ، مينيسترلىككە مەرەكەگە 30 كۇن قالعاندا جولدايدى.

ماڭىزدى: ەگەر ۇبدق جۇيەسىندە تەحنيكالىق اقاۋ ورىن السا نەمەسە ينتەرنەت بايلانىسى بولماسا، قۇجاتتاردى ەلەكتروندى قۇجات اينالىمى (e-Ozed) ارقىلى جولداۋعا رۇقسات بەرىلگەن.

رەيتينگ – نەگىزگى ولشەم

تەك قۇجات وتكىزۋ جەتكىلىكسىز. جاڭا وزگەرىستەر اياسىندا پەداگوگتەر مەن ءبىلىم بەرۋ ۇيىمدارى باسشىلارىنىڭ قىزمەت تيىمدىلىگىن باعالايتىن رەيتينگ ادىستەمەسى دە قايتا قارالدى. بۇل دەگەنىمىز، ماراپات «كەزەكپەن» ەمەس، ناقتى كورسەتكىشتەر مەن جەتىستىكتەر نەگىزىندە بەرىلەتىن بولادى. ەڭ جوعارى بالل جيناعان ۇستازداردىڭ ءتىزىمى اۆتوماتتى تۇردە ىرىكتەۋدەن وتەدى.

ءتۇيىن. بۇل وزگەرىستەردىڭ كۇشىنە ەنۋ مەرزىمى – 2026 جىلدىڭ 12 شىلدەسى. دەمەك، كەلەسى وقۋ جىلىنان باستاپ مۇعالىمدەردى كاسىبي مەرەكەلەرىمەن قۇتتىقتاۋ جاڭا فورماتتا وتەدى. ساراپشىلاردىڭ پىكىرىنشە، «ماراپات» ءمودۋلى سىبايلاس جەمقورلىق تاۋەكەلدەرىن ازايتىپ، ەڭبەگى ەلەنبەگەن ناعىز مايتالمان مامانداردىڭ كوزگە تۇسۋىنە مۇمكىندىك بەرەدى.

Abai.kz