قازاقستاندا ءموبيلدى اۋدارىمدارعا باقىلاۋ كۇشەيتىلدى. الايدا بارلىق ازاماتتىڭ وپەراتسيالارى تەكسەرىلمەيدى، تەك كاسىپكەرلىك بەلگىلەرى بار اۋدارىمدار عانا نازارعا الىنادى، دەپ حابارلايدى BAQ.KZ تىلشىسى.

كىمنىڭ اۋدارىمدارى تەكسەرىلەدى؟

2026 جىلدان باستاپ تەكسەرىس ءۇش نەگىزگى كريتەريگە نەگىزدەلەدى. ازامات تەك وسى شارتتاردىڭ ۇشەۋى قاتار ورىندالعاندا عانا باقىلاۋعا ىلىگەدى:

• 100 جانە ودان كوپ ءارتۇرلى ادامنان اقشا تۇسسە;
• بۇل جاعداي 3 اي قاتارىنان قايتالانسا;
• جالپى سوما 1 020 000 تەڭگەدەن (12 ەڭ تومەنگى جالاقى) اسقان جاعدايدا.

ياعني ءۇش شارت تولىق سايكەس كەلمەسە، تەكسەرىس جۇرگىزىلمەيدى.

قانداي اۋدارىمدار تەكسەرىلمەيدى؟

مەملەكەتتىك كىرىستەر ورگاندارى قاراپايىم ازاماتتارعا الاڭداماۋعا كەڭەس بەرەدى.

تەكسەرىلمەيتىن اۋدارىمدار:

• تۋىستار اراسىنداعى اقشا;
• دوستارعا كومەك;
• قارىز قايتارۋ;
• سىيلىقتار.

مۇنداي وپەراتسيالار كاسىپكەرلىك قىزمەتكە جاتپايدى.

نەگە باقىلاۋ ەنگىزىلدى؟

نەگىزگى ماقسات – كولەڭكەلى ەكونوميكانى ازايتۋ.

ويتكەنى كەي ازاماتتار تاۋار ساتىپ، قىزمەت كورسەتىپ، بىراق تولەمدى جەكە كارتاعا قابىلداپ، سالىق تولەمەي كەلگەن. سوندىقتان مەملەكەت ءموبيلدى اۋدارىمدار ارقىلى جاسىرىن تابىستى انىقتاۋدى كوزدەپ وتىر.

تەكسەرىس قالاي جۇرەدى؟

• بانكتەر كۇماندى وپەراتسيالار تۋرالى مالىمەتتى سالىق ورگاندارىنا بەرەدى;
• ودان كەيىن كامەرالدىق باقىلاۋ جۇرگىزىلەدى;
• ەگەر سۇراق تۋىنداسا، ازاماتقا حابارلاما جىبەرىلەدى.

ماڭىزدى ەسكەرتۋ

ەگەر ازامات تۇراقتى تۇردە اقشا قابىلداپ، تابىس تاۋىپ وتىرسا، وندا:

• جەكە كاسىپكەر رەتىندە تىركەلۋى;
• سالىق تولەۋى قاجەت.

ال زاڭدى بۇزعان جاعدايدا ايىپپۇل نەمەسە قوسىمشا تەكسەرىس بولۋى مۇمكىن.

ءموبيلدى اۋدارىمدارعا باقىلاۋ بارلىق ازاماتقا قاتىستى ەمەس. تەك جۇيەلى تۇردە تابىس تابۋدىڭ بەلگىلەرى بايقالعان جاعدايدا عانا تەكسەرىس جۇرگىزىلەدى. سوندىقتان قاراپايىم اۋدارىمدار ءۇشىن الاڭداۋدىڭ قاجەتى جوق، بىراق تۇراقتى تابىس تاباتىندار زاڭ تالاپتارىن ساقتاۋى ءتيىس.

بۇعان دەيىن ءموبيلدى اۋدارىمدار بويىنشا شەكتى سوما وزگەرۋى مۇمكىن ەكەنى حابارلانعان بولاتىن. ءموبيلدى اۋدارىمداردىڭ شەكتى سوماسى قازىرگىدەي 1 ملن 20 مىڭ ەمەس، 1 ملن 800 مىڭ تەڭگە بولادى دەگەن بولجام بار.

بەلگىلى بولعانداي، ەڭ تومەنگى جالاقى وسسە، ءموبيلدى اۋدارىمدارعا قويىلاتىن تالاپتار دا وزگەرەدى.

Abai.kz