دوستىق كولىك-لوگيستيكالىق تورابىندا جۇك لەگى مەن ءترانزيتتى ۇلعايتۋ، وتكىزۋ پۋنكتتەرىن جاڭعىرتۋ بويىنشا ناقتى شارالار قابىلدانۋدا. ماسەلەن، «الاكول» جاڭا اۆتوموبيل وتكىزۋ پۋنكتىندە قوزعالىس جولاقتارىنىڭ سانى 2-دەن 6-عا دەيىن كوبەيىپ، وتكىزۋ قابىلەتى تاۋلىگىنە 200-دەن 800-گە دەيىن، ياعني 4 ەسەگە ۇلعايدى. سول سياقتى مۇندا جاڭا تسيفرلى تەحنولوگيالار ەنگىزىلۋدە – دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.

«الاكول» كەدەن بەكەتىنىڭ باس مامانى ايدىن اڭگىباەۆتىڭ ايتۋىنشا، وتكىزۋ بەكەتىندە قىزمەت كورسەتۋ تولىق تسيفرلاندىرىلعان.

– بۇرىن ينسپەكتسيالىق تەكسەرۋ كەشەنىنەن ساعاتىنا 20 اۆتوكولىك وتەتىن بولسا، قازىر جاڭا تەحنولوگيانىڭ ارقاسىندا وتكىزۋ قابىلەتى ەكى ەسەگە ارتىپ، وتكىزۋ ۋاقىتى قىسقاردى. ەسكى تەكسەرۋ كەشەنىندە كەدەن بەكەتىنەن ءوتۋ ءۇشىن جۇرگىزۋشىلەر كولىكتەن تۇسۋگە مىندەتتى ەدى، قازىر تۇسپەيدى. بۇرىن كولىكتى سكانەرلەۋگە 3-4 مينۋت ۋاقىت كەتەتىن، قازىر بۇل كورسەتكىش ەداۋىر جىلدامداتىلدى: تسيفرلاندىرۋدىڭ ناتيجەسىندە كولىكتىڭ سكانەرلەنگەن سۋرەتىنە تالداۋ جاساۋ پيلوتتىق رەجيمدە جاساندى ينتەلەكت قولدانۋ ارقىلى اتقارىلادى، – دەدى ول.

بۇگىندە پۋنكتتەردىڭ وتكىزۋ قابىلەتتىنىڭ ارتۋىن ەسكەرە وتىرىپ، كولىك-لوگيستيكالىق ورتالىقتاردى دامىتۋ بويىنشا بەلسەندى جۇمىس جۇرگىزىلۋدە.

اتاپ ايتقاندا، مۇندا تاۋلىگىنە 3 مىڭ اۆتوموبيل قابىلداي الاتىن «ا» ساناتىنداعى «Dostyk Auto Hub» سەرۆيس كەشەنى جۇمىس ىستەپ تۇر. كەشەننىڭ اتقارۋشى ديرەكتورى داۋلەت مۇراتۇلىنىڭ ايتۋىنشا،  «Dostyk Auto Hub» – حالىقارالىق تاسىمالداردىڭ تيىمدىلىگىن ارتتىرۋ جانە جۇرگىزۋشىلەردىڭ قاۋىپسىزدىگىن قامتاماسىز ەتۋ ماقساتىندا شەگارادا قۇرىلعان زاماناۋي لوگيستيكالىق حاب. بۇعان شامامەن 700 ملن. تەڭگە ينۆەستيتسيا سالىندى. ونىڭ قۇرامىنا زاماناۋي قوناق ءۇي، تاماقتانۋ ورنى، شاعىن سۋپەرماركەت جانە «CarGoRuqsat» ەلەكتروندىق كەزەك ءۇشىن تەگىن جيناقتاۋ الاڭى كىرەدى. بۇل كولىك قوزعالىسىن رەتتەۋگە، كىرەبەرىس جولدارعا تۇسەتىن جۇكتەمەنى ازايتۋعا جانە شەكاراداعى كەزەك كۇتۋ ۋاقىتىن قىسقارتۋعا مۇمكىندىك بەرەدى.

بۇل پىكىردى كولىك جۇرگىزۋشىلەر دە راستايدى.

– مەن ءوزىم ءازىربايجاننان قىتايعا تاۋار ساتىپ الۋ ءۇشىن كەلەمىن. «الاكول» وتكىزۋ پۋنكتى ارقىلى العاش رەت ءوتتىم. مۇندا ءبىز ءۇشىن بارلىق جاعداي جاسالعان. ەلەكتروندى كەزەك ۇيىمداستىرىلعان، جايلى دەمالۋعا ارنالعان ورىندار، ىڭعايلى تەگىن اۆتوتۇراق، جاقسى تاماقتاناتىن ورىندارى قاراستىرىلعان. ءبارى رەت-رەتىمەن، ۇقىپتى ۇيىمداستىرىلعان، - دەدى جۇرگىزۋشىلەردىڭ ءبىرى يمران كوكلاروۆ.

سونداي-اق مۇندا 1500 اۆتوكولىك قابىلداۋعا لايىقتالعان «Digital silk road company»، «جىبەك جولى» ۋاقىتشا ساقتاۋ قويمالارى جۇمىس ىستەپ تۇر.

وعان قوسا تەمىرجول تاسىمالى باعىتى بويىنشا وتكىزۋ قۋاتى جىلىنا 470 مىڭ كونتەينەر بولاتىن «ەTT Dostyk» جشس كوپفۋنكتسيونالدى جۇك تاسىمالداۋ تەرمينالى قىزمەت كورسەتەدى.

اتاپ وتسەك، مەملەكەت باسشىسىنىڭ تاپسىرماسىمەن وتكەن جىلى «دوستىق-مويىنتى» تەمىرجول ۋچاسكەسىندە ەكىنشى جولدىڭ قۇرىلىسى اياقتالدى. سونىڭ ناتيجەسىندە «دوستىق-مويىنتى» ۋچاسكەسىنىڭ وتكىزۋ قابىلەتى 2 ەسەگە، ياعني تاۋلىگىنە 12-دەن 20 جۇپ پويىزعا دەيىن ارتتى.

Abai.kz