جاپوننىڭ ايگىلى جازۋشىسى حارۋكي مۋراكامي ءۇش جىلدىق ۇزىلىستەن كەيىن جاڭا رومانىن وقىرمانعا ۇسىنباق.

الەم ادەبيەتىندە وزىندىك ۇنىمەن تانىلعان قالامگەردىڭ جاڭا تۋىندىسى شىلدە ايىندا جارىق كورەدى دەپ حابارلادى ونىڭ باسپاسى.

«The Tale of KAHO» دەپ اتالاتىن رومان 26 جاستاعى سۋرەتتى كىتاپتاردىڭ اۆتورى كاحو ەسىمدى بويجەتكەننىڭ تاعدىرىن بايان ەتەدى. باسپانىڭ ايتۋىنشا، بۇل – مۋراكامي شىعارماشىلىعىندا العاش رەت ايەل كەيىپكەردىڭ دارا، باستى تۇلعا رەتىندە بەينەلەنۋى.

352 بەتتەن تۇراتىن بۇل تۋىندى جازۋشىنىڭ 2024 جىلدىڭ ماۋسىمىنان 2026 جىلدىڭ ناۋرىزىنا دەيىن Shincho جۋرنالىندا جاريالانعان ءتورت بولىمنەن قۇرالعان «Kaho» تسيكلىن قايتا وڭدەپ، ءبىر ارناعا توعىستىرۋ ارقىلى دۇنيەگە كەلگەن. اتالعان تسيكلدىڭ العاشقى بولىگىنىڭ ءبىرى اعىلشىن تىلىنە اۋدارىلىپ، 2024 جىلى The New Yorker بەتىندە جارىق كورگەن ەدى.

جاڭا رومان 3 شىلدە كۇنى كىتاپ دۇكەندەرىنىڭ سورەسىنە قويىلادى. سونىمەن قاتار، سول كۇنى ونىڭ ەلەكتروندى نۇسقاسى دا وقىرمانعا جول تارتادى.

حارۋكي مۋراكامي – Norwegian Wood, Kafka on the Shore, 1Q84 سەكىلدى الەمگە ايگىلى شىعارمالاردىڭ اۆتورى. ونىڭ كىتاپتارى ونداعان تىلگە اۋدارىلىپ، ءتۇرلى ەلدەردە ەكراندالعان. جازۋشىنىڭ سوڭعى رومانى – The City and Its Uncertain Walls – 2023 جىلى جارىق كورگەن بولاتىن.

دۇيسەنالى الىماقىن

Abai.kz