ۇلىبريتانيانىڭ حەروگەيت قالاسىندا Institution of Engineering and Technology ۇيىمداستىرعان بەدەلدى UK First Lego League Championship حالىقارالىق روبوتوتەحنيكا چەمپيوناتى ءوتتى.

قازاقستان قۇراما كومانداسىنداعى استانا قالاسىنىڭ وقۋشىلارى جارىستا ۇزدىك ناتيجە كورسەتىپ، بىردەن ەكى باستى ماراپاتتى جەڭىپ الدى. وقۋشىلار روبوت-ويىن بويىنشا 1 ورىن جانە جارىستىڭ ۇزدىك كومانداسى اتاندى.

چەمپيوناتقا ۇلىبريتانيا، برازيليا، فرانتسيا، گەرمانيا جانە سلوۆاكيا سىندى ەلدەردەن 68 كوماندا قاتىستى. كوماندا بۇل چەمپيوناتقا استانادا وتكەن Central Asia First Championship تۋرنيرىندەگى ءساتتى ونەر كورسەتۋدىڭ ناتيجەسىندە جولداما العان.

روبوت-ويىننان بولەك، قاتىسۋشىلار «artifacts.kz» اتتى قازاقستانداعى ارحەولوگيالىق ارتەفاكتىلەردىڭ ونلاين-بازاسىن ۇسىندى. جوبا اياسىندا وقۋشىلار يدەيادان باستاپ زەرتتەۋ، تەحنيكالىق ازىرلەۋ جانە ءپروفيلدى ينستيتۋتتارمەن بايلانىسقا دەيىنگى تولىق پروتسەستى كورسەتتى. جوبا تەحنولوگيالىق دەڭگەيىمەن عانا ەمەس، ۇلتتىق مادەني مۇرانى ساقتاۋعا قوسقان ۇلەسىمەن دە جوعارى باعالاندى.

Abai.kz