كۇدىكتىلەر ۋاقىتشا ۇستاۋ يزولياتورىنا قامالدى.  

الماتى وبلىسىندا بوپسالاۋ جانە قاراقشىلىق جاسادى دەگەن كۇدىكپەن ءبىر توپ ادام قاماۋعا الىندى، دەپ حابارلايدى پوليتسيا دەپارتامەنتى ءباسپاسوزى.

الماتى وبلىسى پوليتسيا دەپارتامەنتىنىڭ مالىمەتىنشە، 16-سىنان 17 ساۋىرگە قاراعان ءتۇنى تالعار اۋدانىندا كۇدىكتىلەر 28 جاستاعى ازاماتتى الدىن الا جوسپار بويىنشا ادام از جۇرەتىن جەرگە الداپ شاقىرعان.

"كەيىن پىشاقپەن قورقىتىپ، كۇش قولدانۋ ارقىلى دەنە جاراقاتىن كەلتىرىپ، تاۋلى ايماققا كۇشتەپ الىپ كەتكەن. ولار جابىرلەنۋشىنى قۇقىق قورعاۋ ورگاندارىنا ونىڭ زاڭسىز ارەكەتتەرى تۋرالى جالعان اقپارات تاراتامىز دەپ قورقىتىپ، 10 ميلليون تەڭگە تالاپ ەتكەن", – دەپ حابارلادى پوليتسيا دەپارتامەنتى. 

سونداي-اق، قۇنى شامامەن 17 ميلليون تەڭگە بولاتىن اۆتوكولىگىن كەپىل رەتىندە الىپ قويعان. قازىر سوتقا دەيىنگى تەرگەپ-تەكسەرۋ امالدارى جۇرگىزىلىپ جاتىر.

Abai.kz