استانادا فەلدشەر ۇلدانا مىرزۋاننىڭ قازاسىنا قاتىستى سوت وتىرىسى جالعاسىپ جاتىر. سوتتا ايىپ تاعىلعان پيك توراعاسى ساۋلە جۇبانيازوۆانىڭ جاڭا قورعاۋشىسى اسحات ءالىموۆ سوت وتىرىسى وتەتىن كۇنى ىسكە كىرىسكەنىن ايتىپ، قىلمىستىق ءىس ماتەريالدارىمەن تانىسۋعا جانە قورعاۋ ۇستانىمىن ازىرلەۋگە ۋاقىت بەرۋدى سۇرادى.

بۇگىنگى سوت وتىرىسىندا سۋديا پروتسەستىڭ جاڭا قاتىسۋشىلارىن تانىستىردى.

اتاپ ايتقاندا، جابىرلەنۋشى اينۇر نۇرپەيىسوۆانىڭ مۇددەسىن قورعاۋعا استانا قالاسىنىڭ زاڭ كونسۋلتاتسياسىنىڭ ادۆوكاتى جادىرا قۇرىمباەۆا تاعايىندالدى. ال سوتتالۋشى ساۋلە جۇبانيازوۆانىڭ قورعاۋشىسى رەتىندە اسحات ءالىموۆ قوسىلدى.

سوت قۇرامىن جاريالاعاننان كەيىن ەكى ادۆوكات تا قارسىلىقتارى جوق ەكەنىن مالىمدەدى. ولار بۇعان دەيىنگى سوت وتىرىسىنا قاتىسپاعاندىقتان، سۋديا ولاردىڭ قانداي دا ءبىر ءوتىنىشحاتتارى بار-جوعىن دا ناقتىلادى.

ادۆوكات اسحات ءالىموۆ ساۋلە جۇبانيازوۆانىڭ مۇددەسىن قورعاۋعا تاپسىرمانى تەك 20 تامىزدا العانىن جانە سول كۇنى قىلمىستىق ىسكە قاتىسا باستاعانىن ايتتى.

ونىڭ سوزىنشە، ءىس سوتقا 14 تامىزدا تۇسكەن، ال الدىن الا تىڭداۋ 18 تامىزدا وتكەن. سول كەزدە سوتتالۋشىنىڭ بۇعان دەيىنگى قورعاۋشىسى ءىس ماتەريالدارىمەن تانىسۋ تۋرالى ءوتىنىشحات بەرگەن. وسىدان كەيىن سوت كەلەسى وتىرىستى 20 تامىزعا بەلگىلەگەن.

– قۇرمەتتى سوت، بۇگىن ىسكە جاڭادان كىرىسكەن قورعاۋشى رەتىندە قىلمىستىق ءىس ماتەريالدارىمەن تولىق تانىسۋعا، تاعىلعان ايىپتى زەردەلەۋگە، دالەلدەمەلەر بازاسىن تالداۋعا، ءىس جۇرگىزۋ قۇجاتتارىن باعالاۋعا، قورعاۋ ۇستانىمىن ايقىنداپ، ونى قورعاۋىمداعى اداممەن كەلىسۋگە، سونداي-اق ءوتىنىشحاتتار، ارىزدار جانە وزگە دە قاجەتتى ءىس جۇرگىزۋ قۇجاتتارىن دايىنداۋعا جەتكىلىكتى ۋاقىتىم بولعان جوق، – دەدى ا. ءالىموۆ.

ادۆوكات قىلمىستىق-پروتسەستىك كودەكس نورمالارىن كەلتىرىپ، قورعاۋشى قىلمىستىق پروتسەستىڭ كەز كەلگەن كەزەڭىندە ىسكە كىرىسە الاتىنىن ايتتى. ال سوت تالقىلاۋى بارىسىندا ىسكە جاڭادان كىرىسكەن ادۆوكاتقا قورعاۋعا دايىندالۋ ءۇشىن قاجەتتى ۋاقىت بەرىلۋگە ءتيىس.

– بۇعان دەيىنگى قورعاۋشىعا ءىس ماتەريالدارىمەن تانىسۋ مۇمكىندىگىنىڭ بەرىلۋى ىسكە جاڭادان كىرىسكەن قورعاۋشىعا ماتەريالداردى ءوز بەتىنشە زەردەلەپ، ءوزىنىڭ قورعاۋ ۇستانىمىن ازىرلەۋگە قاجەتتى ۋاقىتتىڭ بەرىلۋىن الماستىرمايدى، – دەپ اتاپ ءوتتى ادۆوكات.

ا. ءالىموۆتىڭ پىكىرىنشە، ونىڭ ىسكە كىرىسكەن كۇنى سوت تالقىلاۋىن جالعاستىرۋ سوتتالۋشىنىڭ بىلىكتى ءارى ءتيىمدى زاڭ كومەگىن الۋ قۇقىعىن شەكتەۋى مۇمكىن.

وسىعان بايلانىستى قورعاۋشى سوتتان ونى س. جۇبانيازوۆانىڭ ادۆوكاتى رەتىندە ىسكە قاتىستىرۋدى، قورعاۋدى قابىلداعانى تۋرالى جازباشا حابارلامانى ءىس ماتەريالدارىنا قوسۋدى جانە قىلمىستىق ءىس ماتەريالدارىمەن تولىق تانىسۋعا ۋاقىت بەرۋدى سۇرادى.

سونىمەن قاتار ادۆوكات سوت تالقىلاۋىن دالەلدەمەلەردى زەردەلەۋگە، قورعاۋىنداعى اداممەن ۇستانىمدى كەلىسۋگە جانە قورعاۋ جەلىسىن ازىرلەۋگە جەتكىلىكتى مەرزىمگە كەيىنگە قالدىرۋ تۋرالى ءوتىنىشحات بەردى.

ەسكە سالا كەتسەك، فەلدشەر ۇلدانا مىرزۋان ولىمىنە قاتىستى العاشقى سوت وتىرىسى 18 تامىزدا باستالعان ەدى.

ءىس بويىنشا پروكۋرورلار رەسمي ايىپتاۋ اكتىسىن جاريالادى.

بۇعان دەيىن سوت ادىلەت زەينەلدىڭ جابىرلەنۋشى بولۋدان باس تارتۋ جايلى ءوتىنىشىن قاناعاتتاندىرمادى.

دەرەككوز: قازاقپارات

Abai.kz