ۆاشينگتوندا دونالد ترامپ قاتىسقان قابىلداۋ كەشىندە وق اتتى دەگەن ادامعا اقش پرەزيدەنتىنە قاستاندىق جاساۋعا تالپىندى جانە قارۋدى زاڭسىز ۇستادى دەگەن ايىپ تاعىلدى. بۇل تۋرالى Reuters اگەنتتىگى حابارلادى.

كۇدىكتى رەتىندە 31 جاستاعى كوۋل توماس اللەن ەسىمدى ازامات تانىلعان. كاليفورنيا شتاتى، توررانس قالاسىندا شىققان ول ۆاشينگتونداعى فەدەرالدىق سوتتا وتكەن العاشقى تىڭداۋعا قاتىستى. ەكى كۇن بۇرىن اق ءۇيدىڭ جۋرناليستەرگە ارنالعان سالتاناتتى كەشىندە وق اتىلىپ، قاۋىپسىزدىك قىزمەتىنىڭ ءبىر وكىلى جاراقات العان. ول وق وتكىزبەيتىن كەۋدەشەسىنىڭ ارقاسىندا امان قالعان.

ترامپ جاريالاعان ۆيدەودا كۇدىكتى عيمارات دالىزىندە جۇگىرىپ بارا جاتقانى كورىنەدى. ترامپقا بۇعان دەيىن 2024 جىلى پرەزيدەنتتىك سايلاۋ ناۋقانىندا قاستاندىق جاسالعان. ول كەزدە وق ترامپتىڭ قۇلاعىن سىرىپ ءوتىپ، ءوزى امان قالعان.

قۇزىرلى ورگانداردىڭ حابارلاۋىنشا، كۇدىكتىنىڭ قولىندا مىلتىق، تاپانشا جانە بىرنەشە پىشاق بولعان. اتىستان كەيىن ونى دا اۋرۋحاناعا تەكسەرۋگە اپارعان.

Reuters اگەنتتىگىنىڭ حابارلاۋىنشا، كۇدىكتىنىڭ ءوزى ايىپقا ءالى جاۋاپ بەرمەگەن. بۇعان دەيىن ول بارلىق سۇراققا اشىق جاۋاپ بەرەتىنىن، ءوزى كومپيۋتەر عىلىمدارىنىڭ ماگيسترى ەكەنىن مالىمدەگەن.

سۋديا مەتيۋ شاربو اللەندى تەرگەۋ ءجۇرىپ جاتقان تۇستا كۇدىكتىنى قاماۋدا ۇستاۋ تۋرالى شەشىم قابىلداعان. ونىڭ ءىسى جونىندەگى كەلەسى تىڭداۋ بەيسەنبىگە بەلگىلەنگەن.

Abai.kz