قازاقستان پرەزيدەنتى قاسىم-جومارت توقاەۆ مادەنيەت جانە ونەر قىزمەتكەرلەرىن ماراپاتتاۋ راسىمىندە استاناداعى ماقسيم گوركي اتىنداعى مەملەكەتتىك اكادەميالىق ورىس دراما تەاترىنا «ۇلتتىق» مارتەبە بەرۋ تۋرالى شەشىم قابىلدانعانىن مالىمدەدى. تەاتر ۇجىمى بۇل باستامانى وتاندىق مادەنيەتكە كورسەتىلگەن جوعارى قۇرمەت پەن شىعارماشىلىق قاۋىمداستىقتىڭ كوپجىلدىق ەڭبەگىنە بەرىلگەن لايىقتى باعا رەتىندە قابىلداپ، مەملەكەت باسشىسىنا العىسىن ءبىلدىردى.

ماقسيم گوركي اتىنداعى تەاتر – ەلىمىزدەگى ەڭ كونە مادەني وشاقتاردىڭ ءبىرى. بيىل تەاتر ءوزىنىڭ 125 جىلدىق مەرەيتويىن اتاپ وتۋدە. ۇجىم وكىلدەرىنىڭ ايتۋىنشا، پرەزيدەنتتىڭ تەاترعا ۇلتتىق مارتەبە بەرۋ تۋرالى شەشىمى تاريحي وقيعا ءارى كوپجىلدىق ەڭبەكتىڭ زاڭدى ناتيجەسى بولىپ تابىلادى.

«پرەزيدەنتىمىز قاسىم-جومارت كەمەلۇلى توقاەۆتىڭ تەاترىمىزعا ۇلتتىق مارتەبە بەرۋ تۋرالى شەشىمى – ءبىز ءۇشىن ۇلكەن مارتەبە ءارى زور جاۋاپكەرشىلىك. بۇل – ۇجىمنىڭ كوپجىلدىق ەڭبەگى مەن شىعارماشىلىق ىزدەنىستەرىنە بەرىلگەن جوعارى باعا. بارشا تەاتر ۇجىمى اتىنان مەملەكەت باسشىسىنا شىنايى العىسىمىزدى بىلدىرەمىز»، – دەدى تەاتر ديرەكتورى عاني كارىموۆ.

بۇگىندە تەاتر ۇلتتىق مادەنيەتتى ناسيحاتتاۋعا بەلسەندى ۇلەس قوسىپ كەلەدى. قازاق دراماتۋرگياسىنىڭ ۇزدىك تۋىندىلارى ورىس تىلىندە ساحنالانۋدا. تەاتر رەپەرتۋارىندا «شىڭعىس حان»، «حان كەنە»، «توميريس – ساق پاتشايىمى»، «سوڭعى تاۋبە»، «ءاليا»، «ساكەن سەيفۋللين» جانە باسقا دا تاريحي تۇلعالار مەن ۇلتتىق قۇندىلىقتارعا ارنالعان قويىلىمدار بار.

سونىمەن قاتار تەاتر قازاقستان مادەنيەتىن حالىقارالىق دەڭگەيدە لايىقتى تانىتىپ كەلەدى. ۇجىم SAMGAU فەستيۆالىنىڭ گران-پري يەگەرى اتانىپ، «رەسەيدەگى كەزدەسۋلەر» جانە «التىن ۆيتياز» سەكىلدى بەدەلدى حالىقارالىق فەستيۆالدەردە تابىستى ونەر كورسەتتى. بۇدان بولەك، تەاتر سەربيا، قىتاي، يسپانيا جانە ۆەنگريا ەلدەرىندەگى حالىقارالىق جوبالار مەن گاسترولدىك ساپارلارعا قاتىسىپ، شەتەلدىك كورەرمەندەردى قازاقستاندىق تەاتر ونەرىمەن تانىستىردى. 2023 جىلى تەاتر UMAI ۇلتتىق سىيلىعىنىڭ «ۇزدىك درامالىق سپەكتاكل» نوميناتسياسى بويىنشا لاۋرەاتى اتاندى.

تەاتر ديرەكتورىنىڭ ايتۋىنشا، ۇلتتىق مارتەبەنىڭ بەرىلۋى شىعارماشىلىق ۇجىمنىڭ مۇمكىندىكتەرىن كەڭەيتىپ، حالىقارالىق ىنتىماقتاستىقتى نىعايتۋعا جول اشادى. بۇل شەتەلدىك رەجيسسەرلەرمەن بىرلەسكەن جوبالاردى جۇزەگە اسىرۋعا، حالىقارالىق فەستيۆالدەر مەن گاسترولدىك باعدارلامالارعا قاتىسۋعا، سونداي-اق تانىمال ونەر قايراتكەرلەرىن تارتۋعا جاڭا مۇمكىندىكتەر بەرەدى.

الداعى ۋاقىتتا تەاتر قازاقستاندىق اۆتورلارمەن ىنتىماقتاستىقتى كۇشەيتىپ، زاماناۋي دراماتۋرگيانى دامىتۋعا، جاس شىعارماشىل تۇلعالاردى قولداۋعا جانە سپەكتاكلدەردىڭ ساپاسى مەن مازمۇنىن ارتتىرۋعا باسىمدىق بەرەدى. سونداي-اق حالىقارالىق مادەني بايلانىستاردى كەڭەيتۋ جانە تەاتردىڭ تەحنيكالىق بازاسىن جاڭعىرتۋ جۇمىستارى جالعاسادى.

«ۇلتتىق مارتەبە – بۇل وتكەن جولىمىزدىڭ مويىندالۋى عانا ەمەس، بولاشاق الدىنداعى ۇلكەن جاۋاپكەرشىلىك. ءبىز كورەرمەندەردىڭ سەنىمىن اقتاپ، قازاقستاننىڭ تەاتر ونەرىن حالىقارالىق دەڭگەيدە لايىقتى تانىتا بەرەتىن بولامىز»، – دەپ اتاپ ءوتتى عاني كارىموۆ.

Abai.kz