ەلىمىزدە مادەنيەت سالاسى قىزمەتكەرلەرىن الەۋمەتتىك قولداۋ باعىتىنداعى شارالار كەزەڭ-كەزەڭىمەن كۇشەيتىلىپ جاتىر. اتالعان باعىتتاعى جۇمىستار مەملەكەت باسشىسى قاسىم-جومارت توقاەۆتىڭ تاپسىرمالارى اياسىندا ىسكە اسىرىلىپ كەلەدى. پرەزيدەنت ءوز سوزىندە مادەنيەتتى ۇلتتىق بىرەگەيلىكتى نىعايتۋدىڭ، رۋحاني قۇندىلىقتاردى دارىپتەۋدىڭ جانە قوعامدىق كەلىسىمدى بەكەمدەۋدىڭ ماڭىزدى تەتىگى رەتىندە ۇنەمى اتايدى.

مادەنيەت سالاسى قىزمەتكەرلەرىن باسپانامەن قامتاماسىز ەتۋ – سالاداعى ماڭىزدى باعىتتاردىڭ ءبىرى. 2024 جىلى مەملەكەت باسشىسىنىڭ قولداۋىمەن استانا قالاسىندا ەڭبەك ەتەتىن مادەنيەت سالاسى قىزمەتكەرلەرىنە 200 پاتەر كىلتى تابىستالدى. ال 2026 جىلى بۇل باستاما جالعاسىن تاۋىپ، الماتى قالاسىنداعى مادەنيەت ۇيىمدارىنىڭ تاعى 60 قىزمەتكەرى جاڭا باسپاناعا قول جەتكىزدى.

سونىمەن قاتار مادەنيەت قىزمەتكەرلەرى ەلىمىزدىڭ دەنساۋلىق ساقتاۋ جۇيەسىندە كوزدەلگەن بارلىق الەۋمەتتىك كەپىلدىكتى پايدالانا الادى. اتاپ ايتقاندا، تەگىن مەديتسينالىق كومەكتىڭ كەپىلدىك بەرىلگەن كولەمى جانە مىندەتتى الەۋمەتتىك مەديتسينالىق ساقتاندىرۋ جۇيەسى اياسىندا مەديتسينالىق قىزمەتتەرگە جۇگىنۋ مۇمكىندىگى قاراستىرىلعان.

مادەنيەت پەن ونەر سالاسىنىڭ جەكەلەگەن قىزمەتكەرلەرىنە قوسىمشا الەۋمەتتىك جەڭىلدىكتەر بەرىلەدى. اتاپ ايتقاندا، جوعارى مەملەكەتتىك اتاق مەن ماراپاتتارى بار ازاماتتار تەگىن مەديتسينالىق كومەك الۋ قۇقىعىنا يە.

سونداي-اق اتالعان ساناتتاعى ازاماتتار مەن ولاردىڭ جۇبايلارىنا جىلىنا ءبىر رەت ەلىمىزدەگى شيپاجايلاردا تەگىن ەم الىپ، ساۋىقتىرۋ دەمالىسىن وتكىزۋ مۇمكىندىگى ۇسىنىلادى. ال ولاردىڭ بالالارىنا ەمدىك-ساۋىقتىرۋ قىزمەتتەرىن 50 پايىز جەڭىلدىكپەن پايدالانۋ قاراستىرىلعان.

ەرەكشە ەڭبەك جاعدايىندا قىزمەت ەتەتىن ونەر وكىلدەرىنە دە ايرىقشا قولداۋ كورسەتىلەدى. ەلىمىزدە كاسىبي ەڭبەك ءوتىلى كەمىندە 20 جىلدى قۇرايتىن جانە زەينەت جاسىنا جەتكەنگە دەيىن ەڭبەك جولىن اياقتاعان بالەت ارتىستەرىنە ارنايى اي سايىنعى تولەم بەرىلەدى. بۇگىندە مۇنداي تولەمدى رەسپۋبليكا بويىنشا 56 ونەر قىزمەتكەرى الىپ وتىر.

2024 جىلدىڭ قاڭتار ايىنان باستاپ مەملەكەتتىك مادەنيەت ۇيىمدارىندا ەڭبەك ەتەتىن حالىق ءبيى ونەرىنىڭ ارتىستەرىنە دە ارنايى الەۋمەتتىك تولەم ەنگىزىلدى. بۇل قولداۋ ءتۇرى 55 جاسقا تولعان جانە كەيىنگى جەتى جىل ىشىندە مىندەتتى كاسىپتىك زەينەتاقى جارنالارى تۇراقتى اۋدارىلعان ازاماتتارعا بەرىلەدى.

Abai.kz