ايەلدەرگە ارنالعان "ۇماي" يپوتەكالىق باعدارلاماسى قايتا ىسكە قوسىلادى. ءوتىنىم قابىلداۋ تامىز ايىندا باستالادى. بۇل تۋرالى "وتباسى بانكىنىڭ" باسقارما توراعاسى ءلاززات يبراگيموۆا الەۋمەتتىك جەلىدەگى تىكەلەي ەفير بارىسىندا مالىمدەدى.

– "ۇماي" يپوتەكالىق باعدارلاماسىنا قاتىستى جاقسى جاڭالىعىمىز بار. باعدارلامانى تامىز ايىندا ىسكە قوسامىز. العاشقى قارجى ءبولىندى، – دەدى ءلاززات يبراگيموۆا.

بيىل بۇل جوباعا جالپى كولەمى 45 ميلليارد تەڭگە بولىنگەن.

باعدارلاما تالاپتارىنا سايكەس، قاتىسۋشىلار باستاپقى جارنانى "وتباسى بانكىندەگى" دەپوزيتتە جيناۋى ءتيىس.

باعدارلاماعا كىمدەر قاتىسا الادى؟

بۇل يپوتەكا رەسمي تابىسى بار جانە سوڭعى 6 اي بويى زەينەتاقى جارنالارىن ۇزدىكسىز تولەپ كەلگەن، جۇمىس ىستەيتىن ايەلدەرگە ارنالعان.

قاتىسۋشىلارعا قويىلاتىن نەگىزگى تالاپتار:

باستاپقى جارنا: ءىرى قالالار ءۇشىن تۇرعىن ءۇي قۇنىنىڭ 20%-ىن، ال ايماقتار (وبلىستار) ءۇشىن 15%-ىن قۇرايدى.

نەسيەنىڭ ەڭ جوعارى سوماسى: 50 ميلليون تەڭگەگە دەيىن.

نەسيە مەرزىمى: 6 ايدان 25 جىلعا دەيىن.

سىياقى مولشەرلەمەسى: بانك ناقتى مولشەرلەمەنى ءالى جاريالامادى، بىراق العاشقى جىلدارى ول شامامەن 15% اينالاسىندا بولماق.كەيىننەن 3.5%-دان 5%-عا دەيىن تومەندەيدى.

قوسىمشا جەڭىلدىكتەر: نەسيە الۋ ءۇشىن ەكى ادامعا دەيىن قوسالقى قارىز الۋشىنى تارتۋعا جانە باستاپقى جارنا رەتىندە زەينەتاقى جيناعىن پايدالانۋعا رۇقسات ەتىلەدى.

قانداي ۇيلەردى ساتىپ الۋعا بولادى؟

باعدارلاما اياسىندا جاڭا سالىنعان ۇيلەردى دە (سونىڭ ىشىندە قازاقستان تۇرعىن ءۇي كومپانياسىنىڭ كەپىلدىگى بار قۇرىلىسى بىتپەگەن نىسانداردى), سونداي-اق 2016 جىلدان ەرتە سالىنباعان ەسكى  نارىقتاعى پاتەرلەردى دە الۋعا بولادى.

ايتا كەتەرلىگى، بۇل باعدارلامامەن تەك العاشقى باسپانانى عانا ەمەس، تۇرمىس جاعدايىن جاقسارتۋ ماقساتىندا ەكىنشى نەمەسە ءۇشىنشى ءۇيدى دە ساتىپ الۋ مۇمكىندىگى بار.

قاتىسۋشىلاردى ىرىكتەۋ قالاي جۇرەدى؟

ۇمىتكەرلەردى ىرىكتەۋ باللدىق جۇيەمەن جۇرگىزىلەدى. مۇندا "وتباسى بانكىندە" بۇرىننان دەپوزيتى بار، اقشا جيناۋ مەرزىمى ۇزاعىراق جانە جيناقتالعان سىياقى مولشەرى كوپ ايەلدەرگە باسىمدىق بەرىلەدى.

ەسكە سالايىق، "ۇماي" باعدارلاماسى 2021 جىلى ىسكە قوسىلىپ، 2023 جىلعا دەيىن جۇمىس ىستەدى. كەيىن ونى قارجىلاندىرۋ ۋاقىتشا توقتاتىلدى. باعدارلاما ازيا دامۋ بانكىنىڭ (ادب) قولداۋىمەن جۇزەگە اسىرىلادى.

باستاپقىدا جوبانى 2025 جىلدىڭ باسىندا جاڭارتىلعان تالاپتارمەن قايتا ىسكە قوسۋ جوسپارلانعان ەدى. الايدا باعدارلامانىڭ ىسكە قوسىلۋ مەرزىمى كەيىنگە شەگەرىلدى.

Abai.kz