پورتۋگاليا مەن چيلي ماتچىنان كەيىن...

1. ستاديون، ماتچتى حالىقتىڭ بۇكىل قاباتتارىنىڭ كورۋىنە ارناپ جاساعان ەكەن. مۇمكىندىگى شەكتەۋلى ادامداردىڭ اربامەن جۇرۋىنە بۇكىل جاعداي جانە ولاردىڭ ەشكىمگە كەدەرگى كەلتىرمەيتىندەي جولدارى مەن وتىراتىن ورىندارىن جاساعان. تاڭقالارلىقتاي. مۇلدە جاعدايى جوق، الەۋمەتتىك جاعىنان از قامتىلعان دەي مە، ولاردىڭ تۇراتىن جەرلەرى بار. تاعى دا ولار از ەمەس، كەمى 10-15 مىڭ ادام تۇراتىن شىعار، ودان كوپ بولماسا. سەبەبى ولاردا وتىراتىن جەر جوق، سانىن ايتا المايسىڭ. تۇرىپ تۇرادى. قىسقاسى حالىقتىڭ بۇكىل قاباتتارىن شاحماتتىڭ تاحتاسىنداي ادەمىلەپ ورنالاستىرىپ تاستاعان. وسى جاعى ماعان قاتتى اسەر قالدىردى. ۇلتتىق قۇراما ماتچتارى كوممەرتسيالىق باعىتتا بولماۋى كەرەك. ەل بولعان سوڭ بايى، كەدەيى، مۇمكىندىگى شەكتەۋلىسى، باسقاسى بار، بارلىعى ازامات بولعاندىقتان ولاردىڭ ءوز ەلىنىڭ كومانداسىنا جانكۇيەر بولىپ ماتچ كورۋلەرىنە مۇمكىندىكتى جاساۋى كەرەك قوي. مىنە ەل، مىنە مەملەكەت دەگەن وسىنداي بولۋى كەرەك. ۇيرەنۋىمىز كەرەك. ءار ازامات ستاديوندا ءوزىن ادام سەكىلدى سەزىنۋى كەرەك. بۇكىل قوعام قاباتتارى: م.شەكتەۋلى، شەكتەۋسىز، باي كەدەي، باستىق، جۇمىسشى، بارلىعى دەرلىك مەملەكەتتىڭ تولىققاندى ازاماتى، مۇشەسى ەكەنىن سەزىنۋى كەرەك.

2. ارينە بۇل جەردە رونالدۋ تۋرالى ايتپاي ءوتىپ كەتۋ مۇمكىن ەمەس. ناعىز مەسسيدىڭ فاناتى بولىپ، رونالدۋدى جەك كورىپ جۇرگەندەردىڭ ءوزى رونالدۋدى كورگەندە ەسى اۋىسقان ادامداي فاناتى بولىپ شىعا كەلدى.

دۇرىس، دۇرىس ەمەس دەپ ءدوپ ايتا المايمىن. بىراق، رونالدۋدى باسقا ويىنشىمەن اۋىستىرعاننان كەيىن، اۋزى مۇرنىنا سيماي وتىرعان، تۇرىپ تۇراتىن جەر بولماي تۇرعان ستاديوننىڭ جارتىسى ءاپ ساپتە بوساپ قالدى. ياعني كوبى ماتچتى ەمەس رونالدۋدى كورگىسى كەلگەندەر ەكەنى انىق. اسىرەسە شەتەلدەن كەلگەندەر كوپ پە دەپ قالدىم. بالالار اڭىزدى كورۋ ءۇشىن كەلسە، اكەلەرى ءوز ءومىرىنىڭ ءبىر كەزەڭىن كورۋ ءۇشىن، ال قىزدار عاشىق بولىپ كەلگەن شىعار. بارىنە تۇسىنىستىكپەن قاراۋعا تىرىسايىق.

3. ەكى تايم اراسىنداعى ۇزىلىستە ارداگەر فۋتبولشىلار توبى الاڭدى ءبىر اينالىپ شىقتى. حالىق تىك تۇرىپ قۇرمەت كورسەتتى. بۇل وتكەنگە قۇرمەت. ەگەر قاتەلەسپەسەم جاس شامالارى 60-80 اراسى اۋ. ولار جايمەندەپ جاياۋ ءجۇرىپ وتەمىن دەگەنشە سول 15 مينۋت ءوتتى.

ال كەلەر ۇرپاق - بالالار ستاديوننىڭ ا-سىنان يا-سىنا دەيىنگى بۇكىل جەردە ەرىكتىلەر رەتىندە تەك قىزمەت جاسادى. الدىڭعى تولقىن قۇرمەتكە لايىق، بالالار قىزمەت ەتۋگە لايىق، جاستار-فۋتبولشىلار ونەر كورسەتۋگە لايىق. ۇرپاقتار ساباقتاستىعى مادەنيەتى بارىنشا كورىنىپ تۇردى.

فۋتبول جاعىندا جۇرگەندىكتەن قازاقستان فۋتبولىنان حابارىم بار: بۇل ماسەلەدە كوزىڭە جاس ءۇيىرىلىپ قالادى، قازاقستانداعى ارداگەر فۋتبولشىلاردىڭ جاعدايى ەسىڭە تۇسكەندە. جاقسى اڭگىمە بولماعان سوڭ اتى ءجونىن جازباي اق قويايىن، ءبىر ارداگەر فۋتبولشىمەن كوپ سۇحباتتاسقانمىن: كوزىڭنەن جاس ەمەس قان اعادى. وعان سونشا ماتەريالدىق جاعداي كەرەك تە ەمەس، جاي قاراپايىم پسيحولوگيالىق قولداۋ، ءسوز كومەكتىڭ وزىنە ءزارۋ. كەرىسىنشە سوزبەن ءولتىرىپ، پسيحولوگيالىق جاعىنان جەپ، سۇيەگىن كەمىرىپ تاستايدى ەكەنبىز. بىزگە جەڭىل بولعانمەن، وعان اۋىر سوققى بولىپ جاتقانىن سەزبەيمىز. بىزدە: قىزمەتتەن بوساعان كۇنى، كەرەك ەمەس بولىپ قالعان كۇنى، فۋتبولدى اياقتاعان كۇنى ەرتەسىنە تانىماي قالاتىن جامان ادەت قالىپتاستى.

قورىتىندى: پورتۋگاليا فۋتبولدى جاي سپورت ەمەس، قوعامدى بىرىكتىرەتىن قۇرال رەتىندە پايدالانادى ەكەن. مۇندا ارداگەرگە قۇرمەت بار، بالاعا سەنىم بار، مۇمكىندىگى شەكتەۋلى ازاماتقا ورىن بار، كەدەيگە دە مۇمكىندىك بار. سوندىقتان ستاديوننان شىققاندا فۋتبولدى عانا ەمەس، مەملەكەتتىڭ ازاماتتارىنا دەگەن كوزقاراسىن كورىپ شىققانداي بولدىم.

فازىلبەك ءابساتتارۇلى، 

ليسسابون ق.

Abai.kz