كوپشىلىك اسىعا كۇتەتىن «قىمىزمۇرىندىق – 2026» مەرەكەسى 27 ماۋسىم كۇنى كەگەن اۋدانىنداعى قارقارا جايلاۋىندا وتەدى.

اتالمىش شارا ابىز بابا المەرەك جانشىقۇلىنىڭ 368 جىلدىعىمەن قاتار ۇيىمداستىرىلماق. مەرەكەگە ەلىمىزدەن، تۇركيا، ءازىربايجان، قىرعىزستان، قىتاي، تۇركمەنستان، وزبەكستان، قاراقالپاقستان رەسپۋبليكاسى جانە وزگە مەملەكەتتەردەن 35 مىڭعا جۋىق قوناق كەلەدى دەپ جوسپارلانىپ وتىر.

سۋرەت: الماتى وبلىسى اكىمدىگىنەن الىندى.

قىمىزمۇرىندىق – قازاق حالقىنىڭ اتادان بالاعا مۇرا بولىپ كەلە جاتقان يگى داستۇرلەرىنىڭ ءبىرى. بۇل – قوناقجايلىلىقتى، جومارتتىقتى، ىنتىماق پەن بىرلىكتى دارىپتەيتىن مەرەكە. اتالمىش شارانىڭ ءتۋريزمدى دامىتۋعا دا ىقپالى مول بولماق.

قارقارا جايلاۋىندا بۇل مەرەكە بۇعان دەيىن ءتورت رەت ۇيىمداستىرىلعان. وتكەن جىلى شاراعا 8 مىڭنان استام ادام قاتىسىپ، 40 كيىز ءۇي تىگىلگەن. سونداي-اق 250-گە جۋىق شاعىن بيزنەس وكىلدەرى تارتىلعان بولاتىن. ال بيىل 80-نەن استام كيىز ءۇي تىگىلىپ، كەلۋشىلەر سانى بىرنەشە ەسەگە ارتادى دەپ كۇتىلۋدە.

«قامىزمۇرىندىق – 2026» مادەني-كوپشىلىك جانە سپورتتىق ءىس-شاراسى اياسىندا ۇلتتىق داستۇرلەر مەن ويىندار پاش ەتىلىپ، قولونەر كورمەسى ۇيىمداستىرىلادى. اتاپ ايتقاندا، ات بايگەسى، قازاق كۇرەسى، قىز قۋ، تەڭگە ءىلۋ، جامبى اتۋ، قوي كوتەرۋ سىندى سايىستار وتەدى. سونىمەن بىرگە «توپجارعان» ەتنو-ونەر ورتالىعىنىڭ شوۋ باعدارلاماسى، «تولاعاي» ونەر ورتالىعىنىڭ قويىلىمدارى، وبلىس ونەرپازدارى مەن تانىمال ەسترادا جۇلدىزدارىنىڭ كونتسەرتى كوپشىلىك نازارىنا ۇسىنىلادى. جاستار ءۇشىن التىباقان، ارقان تارتىس، قول كۇرەس جانە ۇلتتىق ويىندار ۇيىمداستىرىلسا، بالالارعا ارنالعان ارنايى ايماقتا اتتراكتسيوندار، قۋىرشاق تەاترى، قولونەر، سۋرەت سالۋ، شاحمات جانە توعىزقۇمالاق جارىستارى وتكىزىلەدى.

قازىرگى تاڭدا قارقارا جايلاۋىندا دايىندىق قارقىندى تۇردە جۇرگىزىلۋدە. ۇيىمداستىرۋشىلار بايگە الاڭىن رەتكە كەلتىرىپ، كورەرمەندەرگە ارنالعان ورىنداردى ازىرلەگەن. قوناقتارعا قولايلى جاعداي جاساۋ ماقساتىندا بارلىق ۇيىمداستىرۋ شارالارى جوسپارلى تۇردە جۇزەگە اسىرىلۋدا.

Abai.kz