استانادا قازاقستان حالىق پارتياسىنىڭ كەزەكتەن تىس سەزى ءوتتى. دەلەگاتتار پارتيانىڭ جاڭا توراعاسى ەتىپ نۇرسۇلتان شوقانوۆتى سايلادى.

پارتيانىڭ بۇرىنعى توراعاسى ەرمۇحامەت ەرتىسباەۆ سەزگە قاتىسۋشىلار الدىندا ءسوز سويلەپ، سوڭعى ءۇش جىلداعى جۇمىستى قورىتىندىلادى. ونىڭ ايتۋىنشا، حالىق پارتياسى قۇرعاق ۋادەمەن ۋاقىت وتكىزبەي، ازاماتتاردىڭ ناقتى ماسەلەلەرىن شەشۋمەن اينالىساتىن ساياسي كۇش رەتىندە ءوز پوزيتسياسىن نىعايتتى.

«بۇگىندە حالىق پارتياسى – كومەك سۇراپ كەلەتىن ورتالىققا اينالدى. بۇل – ءبىزدىڭ جۇمىسىمىزدىڭ باستى ناتيجەسى»، – دەپ اتاپ ءوتتى ەرتىسباەۆ.

ول پارتيانىڭ قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ ادىلەتتى قازاقستاندى قۇرۋ جونىندەگى باعىتىن جۇيەلى تۇردە قولدايتىنىن جانە ەلىمىزدە جۇرگىزىلىپ جاتقان ساياسي، الەۋمەتتىك-ەكونوميكالىق رەفورمالاردى ىسكە اسىرۋعا بۇدان بىلاي دا ءوز ۇلەسىن قوسا بەرەتىنىن قاداپ ايتتى.

ەرمۇحامەت ەرتىسباەۆتىڭ مالىمەتىنشە، فراكتسيا دەپۋتاتتارى VIII شاقىرىلىم باستالعالى بەرى ۇكىمەتتىڭ اتىنا ازاماتتاردىڭ ەڭ وزەكتى ماسەلەلەرىن ارقاۋ ەتكەن 591 دەپۋتاتتىق ساۋال جولداعان. وسى ارالىقتا قازاقستان حالىق پارتياسىنىڭ قاتارى 43 مىڭنان استام مۇددەلەسپەن تولىقتى. سونىمەن قاتار پارتيا سوڭعى جىلدارى قوعامدىق جانە مەديا كەڭىستىكتەگى ىقپالىن ەداۋىر كۇشەيتتى.

«ءبىز تەك كەرى بايلانىس بەرىپ قويماي، كۇن ءتارتىبىن ءوزىمىز قالىپتاستىرۋدى ۇيرەندىك. وزەكتى ماسەلەلەردى كوتەرىپ، حالىقتىڭ مۇڭ-مۇقتاجى جابىق ەسىك ارتىندا قالماي، اشىق ايتىلۋىنا قول جەتكىزدىك. بۇگىندە قوعامنىڭ نازارى - ماسەلەلەردى شەشۋگە ىقپال ەتەتىن ناقتى قۇرال. ءبىز بۇل قۇرالدى ءتيىمدى پايدالانىپ كەلەمىز»، - دەدى ول.

ەرتىسباەۆتىڭ ايتۋىنشا، سوڭعى جىلدارى حالىق پارتياسى ەلىمىزدەگى ەڭ سەرپىندى دامىپ كەلە جاتقان قوعامدىق-ساياسي مەديا جۇيەلەردىڭ ءبىرىن قۇردى. قازىرگى ۋاقىتتا پارتيانىڭ رەسمي تسيفرلىق پلاتفورمالارىنا 1,1 ميلليوننان استام جەلى قولدانۋشىسى تىركەلگەن، جاريالانىمداردىڭ جالپى قارالىمى 600 ميلليوننان استى، ال ازاماتتاردان تۇسكەن پىكىرلەر مەن وتىنىشتەر سانى 1 ميلليونعا جۋىقتادى.

بۇل كورسەتكىشتەر حالىقتىڭ جوعارى سەنىمىن بىلدىرەدى جانە پارتيانىڭ قوعاممەن تۇراقتى ءارى مازمۇندى ديالوگ ورناتقانىن ايعاقتايدى.

سونداي-اق، ەرتىسباەۆ وسى جىلدار ىشىندە پارتيا باسشىلىعى ەلىمىزدىڭ بارلىق دەرلىك وڭىرلەرىن ارالاپ، تۇرعىندارمەن، ەڭبەك ۇجىمدارىمەن، قوعام بەلسەندىلەرىمەن جانە جاستارمەن جۇزدەگەن كەزدەسۋ وتكىزگەنىن اتاپ ءوتتى. بۇل جۇزدەسۋلەر مەن مىڭداعان جاڭا نيەتتەستەرگە پارتيا بيلەتىن تابىستاۋ راسىمدەرى قوعامنىڭ ناقتى سۇرانىسىن تەرەڭىرەك تۇسىنۋگە جانە الداعى جۇمىستىڭ باسىمدىقتارىن ايقىنداۋعا مۇمكىندىك بەردى.

ەرتىسباەۆ پارتيا باسشىلىعىنىڭ اۋىسۋىنا قاتىستى دا پىكىرىن ءبىلدىردى. ول بۇل جاڭارۋ - كەز كەلگەن ساياسي ۇيىمنىڭ دامۋىنداعى زاڭدى كەزەڭ ەكەنىن، اسىرەسە جاڭا كونستيتۋتسيا قابىلدانعاننان كەيىن قازاقستاندا ءجۇرىپ جاتقان اۋقىمدى ساياسي وزگەرىستەر جاعدايىندا وتە ماڭىزدى ەكەنىن شەگەلەپ ايتتى.

«دامۋدىڭ كەز كەلگەن كەزەڭى جاڭارۋدى تالاپ ەتەدى. بۇل - تابيعي پروتسەسس، ونسىز العا جىلجۋ مۇمكىن ەمەس»، - دەپ مالىمدەدى ول.

ەرتىسباەۆتىڭ ايتۋىنشا، حالىق پارتياسى مەريتوكراتيا، كاسىبي بىلىكتىلىك، جاۋاپكەرشىلىك پەن ساباقتاستىق پرينتسيپتەرىنە نەگىزدەلگەن زاماناۋي باسقارۋ مادەنيەتىن جۇيەلى تۇردە قالىپتاستىرىپ كەلەدى. سول سەبەپتى جاڭا توراعانىڭ ۇمىتكەرلىگىن انىقتاۋ كەزىندە ونىڭ ناقتى جۇمىس ناتيجەلەرى، باسقارۋشىلىق تاجىريبەسى، كوشباسشىلىق قاسيەتتەرى، كوماندانى ۇيىستىرا ءبىلۋ جانە پارتيانى ودان ارى دامىتۋ قابىلەتى ەسكەرىلدى.

داۋىس بەرۋ قورىتىندىسى بويىنشا دەلەگاتتار نۇرسۇلتان شوقانوۆتى قازاقستان حالىق پارتياسىنىڭ توراعاسى ەتىپ سايلادى.

جاڭا توراعانى تانىستىرعان ەرمۇحامەت ەرتىسباەۆ نۇرسۇلتان شوقانوۆتىڭ پارتيا مۇشەلەرىنە جاقسى تانىس ەكەنىن، ونىڭ ايماقتىق قۇرىلىمداردى باسقارۋدان باستاپ، پارتيانىڭ نەگىزگى ۇيىمداستىرۋشىلىق جوبالارىن ىسكە اسىرۋعا دەيىنگى بارلىق نەگىزگى ساتىلارىنان وتكەنىن ايتتى. ول شوقانوۆتىڭ ۇيىمنىڭ ىشكى جۇمىسىن جەتە بىلەتىنىن، زاماناۋي باسقارۋ تاجىريبەسىنە يە ەكەنىن جانە ارىپتەستەرى اراسىندا بەدەلى زور ەكەنىن ەرەكشە اتاپ ءوتتى.

نۇرسۇلتان شوقانوۆ 1986 جىلى الماتى قالاسىندا دۇنيەگە كەلگەن. قازاقستان مەنەدجمەنت، ەكونوميكا جانە بولجاۋ ينستيتۋتىن (كيمەپ) «قارجى» ماماندىعى بويىنشا تامامداعان، كەيىننەن شۆەيتسارياداعى IMD بيزنەس-مەكتەبىندە Executive MBA دارەجەسىن العان.

ەڭبەك جولىن «Ernst & Young» حالىقارالىق اۋديتورلىق كومپانياسىندا باستاعان. ودان كەيىن «ساندريللينگ» مۇناي سەرۆيستىك كومپانياسىندا باسقارۋشىلىق لاۋازىمداردى اتقارىپ، كورپوراتيۆتىك قارجى، اكىمشىلىك باسقارۋ، كومپانيالاردى بىرىكتىرۋ جانە قوسىپ الۋ (M&A) جوبالارىنا، سونداي-اق داعدارىسقا قارسى باسقارۋ جۇمىستارىنا جاۋاپتى بولدى.

2009 جىلدان باستاپ كاسىپكەرلىكپەن اينالىسادى. قوعامدىق تاماقتانۋ، تاعام جەتكىزۋ، ريتەيل، اقپاراتتىق تەحنولوگيالار، ءوندىرىس جانە ديستريبۋتسيا سالالارىندا جۇمىس ىستەيتىن «OMIR Group» كومپانيالار توبىنىڭ ديرەكتورلار كەڭەسىن باسقارادى. بۇگىندە توپقا قاراستى كاسىپورىندار قازاقستاننىڭ 6 قالاسىندا جانە 4 شەت مەملەكەتتە قىزمەت كورسەتەدى.

2021 جىلدان باستاپ قازاقستان حالىق پارتياسىنان الماتى قالالىق ءماسليحاتىنىڭ VII جانە VIII شاقىرىلىمدارىنىڭ دەپۋتاتى بولىپ سايلانىپ، قۇرىلىس، ساۋلەت، قالالىق ينفراقۇرىلىم، ۋربانيستيكا جانە جەر قاتىناستارى ماسەلەلەرى جونىندەگى بەيىندى كوميسسيالاردى باسقاردى.

2022 جىلدىڭ جەلتوقسان ايىنان باستاپ قازاقستان حالىق پارتياسىنىڭ الماتى قالالىق، كەيىننەن الماتى وبلىستىق فيليالدارىنا جەتەكشىلىك ەتتى.

2023 جىلى الماتى قالاسىنىڭ «اتامەكەن» وڭىرلىك كاسىپكەرلەر پالاتاسىن باسقاردى، كەيىننەن «اتامەكەن» قازاقستان رەسپۋبليكاسى ۇلتتىق كاسىپكەرلەر پالاتاسى باسقارماسىنىڭ مۇشەسى - باسقارما توراعاسىنىڭ ورىنباسارى بولىپ سايلاندى.

نۇرسۇلتان شوقانوۆ سونىمەن قاتار - قازاقستان رەسپۋبليكاسى الپينيزم جانە سپورتتىق قۇزعا ورمەلەۋ فەدەراتسياسىنىڭ پرەزيدەنتى.

پارتيانىڭ جاڭا توراعاسى «قۇرمەت» وردەنىمەن، «ەرەن ەڭبەگى ءۇشىن» جانە «زاڭعار» مەدالدارىمەن، سونداي-اق قازاقستان رەسپۋبليكاسى پرەزيدەنتىنىڭ، ۇكىمەتتىڭ جانە الماتى قالاسى ءماسليحاتىنىڭ العىس حاتتارىمەن ماراپاتتالعان.

قازاقستان حالىق پارتياسى جاڭا توراعانىڭ سايلانۋى ۇيىم دامۋىنىڭ ساباقتاستىققا، ينستيتۋتسيونالدىق تۇراقتىلىققا جانە ساياسي قىزمەتتەگى زاماناۋي تاسىلدەرگە نەگىزدەلگەن جاڭا كەزەڭىن باستايتىنىن اتاپ وتەدى. پارتيا قوعاممەن ديالوگتى جۇيەلى تۇردە نىعايتۋدى، ءوز قۇزىرەتتەرىن دامىتۋدى جانە مەملەكەتتىڭ ستراتەگيالىق باعىتىن ىسكە اسىرۋعا سىندارلى ۇلەس قوسۋدى جالعاستىرا بەرەدى.

سەزد بارىسىندا دەلەگاتتار قازاقستان حالىق پارتياسى جارعىسىنىڭ جاڭارتىلعان نۇسقاسىن جانە پارتيانىڭ جاڭا برەندتىك ءستيلىن بەكىتتى. بۇل وزگەرىستەر ىشكى جۇمىستىڭ تيىمدىلىگىن ارتتىرۋعا، پارتيالىق ءتارتىپتى كۇشەيتۋگە جانە قحپ-نىڭ زاماناۋي بەينەسىن قالىپتاستىرۋعا باعىتتالعان.