الماتى وبلىسىندا حالىقتىڭ ۇلتتىق رۋحىن وياتىپ، دارحان دالانى دۋمانعا بولەگەن «قىمىزمۇرىندىق – 2026» فەستيۆالى ءوز مارەسىنە جەتتى. بيىل بۇل مەرەكەگە ەلىمىزدىڭ تۇكپىر-تۇكپىرى مەن الىس-جاقىن شەت ەلدەردەن 35 مىڭعا جۋىق قوناق كەلدى. فەستيۆالدە ۇلتتىق سپورت تۇرلەرىنەن ءتۇرلى سايىستار ءوتىپ، مەرەكە قورىتىندىسىندا جۇزدەن جۇيرىك، مىڭنان تۇلپار شىققاندار ماراپاتتالدى.

سۋرەت: الماتى وبلىسى اكىمدىگىنەن الىندى.

مەرەكە بارىسىندا مىڭجىلقىنىڭ ءتوسىن دۇبىرلەتكەن مىڭ جىلقىنىڭ كورىنىسى جينالعان كوپشىلىكتىڭ نازارىن وزىنە ەرەكشە اۋداردى. جەر تارپىعان جىلقىلار ءدۇبىرىن ەستىگەندە، ەلەڭ ەتپەگەن ەل قالمادى.

ءدۇيىم جۇرتتىڭ جىگەر، نامىسىن جانىپ وتكەن بايگەنىڭ دە ورنى ەرەكشە بولدى. بيىل بۇل جارىستا ەكى جۇزگە جۋىق تاڭداۋلى شاباندوز باق سىنادى.
جۇلدە قورى دا قوماقتى بولدى. الامان بايگەنىڭ جەڭىمپازى Jetour X70 FL Prestige اۆتوكولىگىنىڭ يەگەرى اتاندى. ەكىنشى ورىنعا – 2,5 ميلليون تەڭگە، ءۇشىنشى ورىنعا 1 ميلليون تەڭگە بەرىلدى.

«تۇيە پالۋان» جارىسى دا جانكۇيەرلەر نازارىنداعى باستى باسەكەلەردىڭ بىرىنە اينالدى. بىلەكتى بالۋاندار كۇش سىناساتىن سايىستىڭ جەڭىمپازدارى دا جۇلدەلى سىيلىقتاردان قالىس قالعان جوق.

«قوشقار كوتەرۋ» جارىسىن دا كوپشىلىك قىزىعا تاماشالادى. سىرتتاي قاراعاندا قاراپايىم كورىنگەنىمەن، بۇل سايىس زور كۇش-قۋاتتى، توزىمدىلىكتى، قولدىڭ قارىمىن جانە دۇرىس ءادىس-ءتاسىلدى تالاپ ەتەدى. ءداستۇر بويىنشا قوشقاردى ەڭ كوپ كوتەرگەن سپورتشى ونى ءوز جۇلدەسى رەتىندە الدى.

«الىپتار سايىسىندا» قاتىسۋشىلار نايزا لاقتىرۋ، تەمىر شىبىق يۋ، اۋىر تاستى كوتەرىپ ءجۇرۋ، 100 كەلىلىك بورەنەمەن جاتتىعۋ جانە 500 كەلىلىك اربانى سۇيرەۋ سەكىلدى قيىن اكروباتيكالىق تاسىلدەردى كورسەتتى. سايىس جەڭىمپازى 1,5 ميلليون تەڭگە كولەمىندەگى باس جۇلدەنى يەلەنسە، وزگە جۇلدەگەرلەرگە دە قوماقتى اقشالاي سىياقىلار تابىستالدى.

نەگىزگى جارىستاردان بولەك فەستيۆالدە قول كۇرەسى، ارقان تارتۋ، توعىزقۇمالاق، شاحمات، قوي قىرقۋ جانە كوشپەلى ءومىردىڭ اجىراماس بولىگىنە اينالعان وزگە دە ۇلتتىق سايىستار وتكىزىلدى.

قارقارا جايلاۋىندا ۇيىمداستىرىلعان بۇل مەرەكە ۇلتتىق سپورتتىڭ مەرەيىن ۇستەم ەتىپ، قازاق حالقىنىڭ رۋحاني قۇندىلىقتارىن دارىپتەگەن ماڭىزدى مادەني شارا رەتىندە ەستە قالدى.

Abai.kz