قىتايدا تۋىپ-وسكەن، قازىرگى ۋاقىتتا امەريكا ازاماتى بولعان چەن دانتسين ەسىمدى ءبىر ازامات بار. ول قىتايدىڭ قازىرگى زامانداعى ەڭ ىقپالدى سۋرەتشىلەرىنىڭ ءبىرى. ونىڭ مايلى بوياۋمەن سالعان «شوپاندار» (Shepherds) اتتى تۋىندىسى 2021 جىلعى ونەر اۋكتسيونىندا 161 ميلليون يۋانعا ساتىلىپ، بۇگىنگى كۇننىڭ ەڭ قىمبات شىعارمالارىنىڭ بىرىنە اينالدى.

ادامنىڭ تاعدىرى قىزىق قوي. 1978 جىلى ول جوعارى وقۋ ورنىنا ءتۇسۋ ەمتيحانىندا اعىلشىن تىلىنەن 0 ۇپاي الىپتى. ەمتيحان پاراعىنا:

«مەن ەشقاشان مەكتەپتە وقىماعاندىقتان، اعىلشىنشا سويلەي دە، جازا دا المايمىن» دەپ تايعا تاڭبا باسقانداي انىق جازىپ قالدىرعان ەكەن.

بىزدىڭشە ايتقاندا، «جالقاۋلىقتىڭ شىڭىن» كورسەتكەندەي اسەر قالدىرادى، سولاي ەمەس پە؟

مۇعالىمدەردىڭ اياۋشىلىق سەزىمى وياندى ما، الدە سۋرەت سالۋعا دەگەن ەرەكشە تالانتى بىردەن كوزگە ءتۇستى مە، ايتەۋىر ول قىتايدىڭ ورتالىق بەينەلەۋ ونەرى اكادەمياسىنىڭ مايلى بوياۋ كەسكىندەمەسى بولىمىنە وقۋعا قابىلدانادى. ونىمەن دە قويماي، وقۋىن بىتىرگەن سوڭ سول التىن ۇياسىندا مۇعالىم بولىپ قالىپ قالعان تاريحى دا بار.

اعىلشىننان «ا»-نى دا بىلمەيتىن سول جىگىت، بۇگىندە مۇحيتتىڭ ارعى بەتىندە امەريكا ازاماتى اتانىپ، ەركىن عۇمىر كەشىپ ءجۇر.

چەن دانتسين تەك مىقتى سۋرەتشى عانا ەمەس، سونىمەن بىرگە تاماشا شەشەن، ادەبيەتتانۋشى ءارى ونەرتانۋشى رەتىندە دە تانىمال. ونىڭ قاناتتى سوزدەرىن قازىر ءار جەردەن جولىقتىرۋعا بولادى. بۇل جولى ونىڭ بەينەلەۋ ونەرىنەن گورى، قوعامعا قاتىستى ايتقان ءبىر تەرەڭ تسيتاتاسىن مىسالعا كەلتىرگىم كەلدى. ارينە، الگى اتى اڭىزعا اينالعان قىمبات سۋرەتىن دە بىرگە قوسا كەتتىم.

«كەز كەلگەن قوعامنىڭ دامۋىن ايقىندايتىن ەڭ نەگىزگى 3 ۇلكەن سالا بار. ولار: ءبىلىم بەرۋ، دەنساۋلىق ساقتاۋ جانە زاڭ جۇيەسى.

قوعام قانشالىقتى ءشىرىپ، ازعىنداسا دا، ەگەر ءبىلىم بەرۋ جۇيەسى ءادىل ءارى ىرگەتاسى بەرىك بولسا، وندا ول قوعامنىڭ ءوسىپ-وركەندەۋگە دەگەن ءۇمىتى مەن بولاشاعى بار. ەگەر دەنساۋلىق ساقتاۋ سالاسى جەمقورلىققا باتپاي، قۇلدىراماسا، ادام ءومىرى ەڭ تومەنگى دەڭگەيدە بولسىن ءوز قۇرمەتىن ساقتاي الادى. ال سوت جۇيەسى ءادىل بولسا، قوعامداعى جاعىمسىز قۇبىلىستار ەڭ تومەنگى شەگىنە دەيىن ازايادى.

ەگەر وسى اتالعان ءۇش تىرەكتىڭ ۇشەۋى دە تەسىلىپ، ءىرىپ-ءشىريتىن بولسا، وندا ول قوعامدى جاي عانا  «ادامزات دۇنيەسىنىڭ تۇرمەسى» دەپ اتاۋعا بولادى».

امانتاي تويشىبايۇلى

Abai.kz