ەلدەگى ساياسي رەفورمالار مەن كونستيتۋتسيالىق وزگەرىستەر تاعى ءبىر ماڭىزدى قۇرىلىمنىڭ تامىرىنا قان جۇگىرتتى. پرەزيدەنت قاسىم-جومارت توقاەۆ «قازاقستان حالىق كەڭەسىنىڭ كەيبىر ماسەلەلەرى تۋرالى» تاريحي جارلىققا قول قويدى.

بۇل — جىلدار بويى ىشكى ساياساتتىڭ باستى تىرەگى بولىپ كەلگەن «قازاقستان حالقى اسسامبلەياسى تۋرالى» زاڭنىڭ كۇشىن جويىپ، مۇلدەم جاڭا ينستيتۋتتىڭ دۇنيەگە كەلگەنىن بىلدىرەدى!

نە وزگەردى؟ جاڭادان قۇرىلعان قازاقستان حالىق كەڭەسى بۇرىنعى فورماتتان ايتارلىقتاي ەرەكشەلەنبەك. ول مەملەكەت باسشىسىنىڭ جانىنداعى جالپىۇلتتىق تۇراقتى ديالوگ الاڭىنا اينالادى. ەڭ باستىسى، بۇل قادام قوعامنىڭ مەملەكەتتىك باسقارۋ ىسىنە تىكەلەي ارالاسۋىنا مۇمكىندىك بەرەتىن جاڭارتىلعان كونستيتۋتسيالىق نورمالار اياسىندا جۇزەگە اسىرىلىپ وتىر.

كەڭەس قۇرامىندا كىمدەر بولادى؟ بۇرىن اسسامبلەيا نەگىزىنەن ەتنومادەني بىرلەستىكتەردىڭ باسىن قوسسا، جاڭا كەڭەستىڭ اۋقىمى كەڭەيمەك. ونىڭ قۇرامىنا:

• ازاماتتىق قوعام وكىلدەرى،
• ايماقتاردان كەلگەن بەلسەندىلەر،
• ەتنومادەني بىرلەستىكتەر مەن كاسىبي ساراپشىلار كىرەدى.

جاڭا ورگاننىڭ نەگىزگى مىندەتى — ىشكى ساياساتقا قاتىستى ۇسىنىستار ازىرلەۋ، قوعامدىق كەلىسىمدى نىعايتۋ جانە ەلدىڭ ستراتەگيالىق دامۋىنا ىقپال ەتۋ.

ينتريگا نەدە؟ بۇل جاي عانا اتىن وزگەرتۋ مە، الدە شىنايى رەفورما ما؟ وسىعان دەيىن ءتۇرلى سىنعا ۇشىراپ كەلگەن اسسامبلەيانىڭ ورنىن باساتىن «حالىق كەڭەسى» قوعام مەن بيلىك اراسىنداعى ناقتى كوپىر بولا الا ما؟ ەڭ باستىسى، بۇل قۇرىلىم ەلدەگى ۇلتارالىق قاتىناستار مەن ىشكى تۇراقتىلىققا قانداي جاڭا سەرپىن اكەلمەك؟ مەملەكەت باسشىسى كەڭەس قۇرامى وسى جىلدىڭ قىركۇيەك ايىندا جاساقتالاتىنىن مالىمدەدى. دەمەك، كۇزدە ساياسي ساحنادا جاڭا ەسىمدەر پايدا بولماق.

Abai.kz