ۇلتتىق دومبىرا كۇنىنە وراي ەلىمىزدىڭ بارلىق وڭىرىندە مادەني باعدارلاما ۇيىمداستىرىلىپ جاتىر. ونىڭ اياسىندا كونتسەرتتەر، فەستيۆالدەر، كۇيشى جانە دومبىراشىلار بايقاۋلارى، كورمەلەر، عىلىمي كونفەرەنتسيالار، مۋزەيلەر مەن كىتاپحانالارداعى ارنايى جوبالار، شىعارماشىلىق كەزدەسۋلەر مەن تانىمدىق ءىس-شارالار بار.

ەلىمىز بويىنشا 2000-نان استام ءىس-شارا وتكىزۋ جوسپارلانعان. ونىڭ ىشىندە 20-ى رەسپۋبليكالىق، 98-ءى وبلىستىق دەڭگەيدە ۇيىمداستىرىلادى. قالعان ءىس-شارالار اۋدان ورتالىقتارى مەن اۋىلدىق ەلدى مەكەندەردە، سونداي-اق جەرگىلىكتى مادەنيەت ۇيىمدارىندا وتەدى. مەرەكەلىك ءىس-شارالارعا 2 ميلليوننان استام ادام قاتىسادى دەپ جوسپارلانىپ وتىر.

ۇلتتىق دومبىرا كۇنى جىل سايىن شىلدە ايىنىڭ العاشقى جەكسەنبىسىندە اتالىپ وتەدى. 2018 جىلى مەملەكەت باسشىسىنىڭ باستاماسىمەن بەكىتىلگەن بۇل مەرەكە ۇلتتىق بىرەگەيلىكتى نىعايتۋعا، جاستاردىڭ ءداستۇرلى ونەرگە قىزىعۋشىلىعىن ارتتىرۋعا جانە ۇرپاقتار ساباقتاستىعىن ساقتاۋعا باعىتتالعان.

بيىلعى مەرەكە جاڭا كونستيتۋتسيا كۇشىنە ەنگەننەن كەيىنگى كەزەڭمەن تۇسپا-تۇس كەلىپ وتىر. جاڭارعان اتا زاڭ حالىقتىڭ بىرلىگىن بەكەمدەپ، ۇلتتىق قۇندىلىقتار مەن مادەني مۇرانى ۇلىقتايتىن مەملەكەتتىك دامۋدىڭ جاڭا كەزەڭىنە جول اشتى.

پرەزيدەنت قاسىم-جومارت توقاەۆ دومبىرانىڭ ۇلتتىق مادەنيەتتى ساقتاۋداعى ماڭىزىنا توقتالعان بولاتىن. مەملەكەت باسشىسى ۇلتتىق دومبىرا كۇنى قازاق حالقىنىڭ بولمىسىن ايشىقتاپ، جاس ۇرپاقتىڭ ۇلتتىق رۋحىن كوتەرەتىن ماڭىزدى مەرەكە ەكەنىن اتاپ ءوتتى.

پرەزيدەنت ءوز سوزىندە: «ناعىز قازاق – دومبىرا»، – دەپ، قاسيەتتى دومبىرا قازاقستاننىڭ الەمگە تانىلاتىن بىرەگەي برەندىنە اينالۋعا ءتيىس ەكەنىن ايتتى.

مەرەكەلىك ءىس-شارالار استانا، الماتى، شىمكەنت قالالارى مەن بارلىق وبلىستا وتەدى. كاسىبي شىعارماشىلىق ۇجىمداردىڭ، ۇلتتىق اسپاپتار وركەسترلەرىنىڭ جانە جاس ورىنداۋشىلاردىڭ قاتىسۋىمەن كونتسەرتتەر، فەستيۆالدەر مەن بۇقارالىق مادەني جوبالار ۇيىمداستىرىلادى.

5 شىلدەدە استانا قالاسىنداعى امفيتەاتردا ۇلتتىق دومبىرا كۇنىنە ارنالعان مەرەكەلىك كونتسەرت وتەدى. الماتىدا مەرەكەلىك باعدارلامالار بىرنەشە اشىق الاڭدا وتكىزىلەدى. قۇرمانعازى اتىنداعى قازاق ۇلتتىق حالىق اسپاپتار وركەسترى ارباتتا، «الاتاۋ» ءداستۇرلى ونەر تەاترىندا جانە ورتالىق ساياباقتا ونەر كورسەتەدى. ال قازاقستان رەسپۋبليكاسىنىڭ «سالتانات» مەملەكەتتىك بي ءانسامبلى «كۇمبىرلە، دومبىرا، جاساي بەر، استانا» اتتى كونتسەرتتىك باعدارلاماسىن ۇسىنادى.

شىمكەنت قالاسىندا مەرەكەلىك كونتسەرت «شىم سيتي» ساياباعىندا وتەدى. بيىلعى مەرەكەنىڭ حالىقارالىق باعدارلاماسى دا اۋقىمدى. ۇلتتىق دومبىرا كۇنى قىتاي استاناسى بەيجىڭدە دە اتالىپ وتەدى. ليانما وزەنىنىڭ جاعالاۋىندا قازاقستاننىڭ مادەني ورتالىعى ۇيىمداستىراتىن Dombra Party ءىس-شاراسىندا شەتەلدىك كورەرمەندەرگە قازاقتىڭ ءداستۇرلى ونەرى تانىستىرىلادى.

رەسپۋبليكالىق دەڭگەيدەگى نەگىزگى ءىس-شارالار قاتارىندا تۇركىستان وبلىسىندا وتەتىن «كۇي قۇدىرەتى» كۇيشىلەر بايقاۋى، قىزىلوردا وبلىسىنداعى III رەسپۋبليكالىق «سىر تولقىنى» كۇيشىلەر بايقاۋى، دينا نۇرپەيىسوۆانىڭ 165 جىلدىعىنا ارنالعان «اسەمقوڭىر» رەسپۋبليكالىق دومبىراشىلار بايقاۋى جانە سولتۇستىك قازاقستان وبلىسىندا ۇيىمداستىرىلاتىن V حالىقارالىق «Quzyljar Music Fest» فەستيۆالى بار.

4 شىلدەدە قازاقستان رەسپۋبليكاسى مادەنيەت جانە اقپارات مينيسترلىگىنىڭ باستاماسىمەن وتەتىن رەسپۋبليكالىق #dombrakuni چەللەندجى مەرەكەلىك باعدارلامانىڭ مازمۇنىن ايشىقتاي تۇسەدى. چەللەندجگە قاتىسۋشىلار الەۋمەتتىك جەلىلەردە ۇزاقتىعى ءبىر مينۋتقا دەيىنگى دومبىرا ءۇنى، ۇلتتىق ونەر مەن مەرەكەلىك كوڭىل كۇيدى دارىپتەيتىن بەينەروليكتەردى #dombrakuni حەشتەگىمەن جاريالاي الادى.

Abai.kz