ۇكىمەت 2026 جىلعى 26 ماۋسىمداعى № 556 قاۋلىسىمەن مەملەكەتتىك تۋ، مەملەكەتتىك ەلتاڭبا جانە ولاردىڭ بەينەلەرىن، سونداي-اق مەملەكەتتىك ءانۇران ءماتىنىن پايدالانۋ ەرەجەلەرىنە وزگەرىستەر ەنگىزدى.

جەكە جانە زاڭدى تۇلعالار پاتريوتتىق سەزىمدى ءبىلدىرۋ ماقساتىندا مەملەكەتتىك تۋدى ۇيلەرگە، وزگە دە عيماراتتارعا، 45 گرادۋس بۇرىشپەن بالكوندارعا جانە سالتاناتتى ءىس-شارالار وتەتىن ورىندارعا ىلە الادى.

سونىمەن قاتار مەملەكەتتىك تۋ ۇلتتىق ستاندارتقا تولىق سايكەس بولۋى ءتيىس. تۋدى زاقىمدانعان، ءوڭى كەتكەن، كىرلەگەن نەمەسە قادىر-قاسيەتىن تومەندەتەتىن وزگە دە اقاۋلارى بار كۇيىندە پايدالانۋعا تىيىم سالىنادى.

جاڭارتىلعان قاۋلىدا مەملەكەتتىك تۋدى پايدالانۋ كەزىندە ساقتالۋى ءتيىس نەگىزگى تالاپتار ناقتىلانعان. اتاپ ايتقاندا:

• تۇرعىن ۇيلەردە تۋ كەمىندە 3 مەتر بيىكتىكتە ورنالاستىرىلۋى ءتيىس;
  ەگەر عيماراتتىڭ قۇرىلىمىنا بايلانىستى تۋدى ورنالاستىرۋ مۇمكىن بولماسا، ونى عيماراتقا ىرگەلەس اۋماقتاعى جەكە تۋ تۇعىرىنا ورناتۋعا بولادى;
• مەملەكەتتىك تۋ جەرگە، ەدەنگە، سۋعا نەمەسە وزگە دە زاتتاردىڭ بەتىنە تيمەۋى ءتيىس;
• تۋ تىك ىلىنگەن كەزدە ۇلتتىق ورنەك تۋدىڭ جوعارعى بولىگىندە ورنالاسۋى قاجەت;
• مادەني، سپورتتىق جانە قوعامدىق ءىس-شارالاردا مەملەكەتتىك تۋدى كوممەرتسيالىق ماقساتتا پايدالانۋعا تىيىم سالىنادى;

تۋدى جەكە جانە زاڭدى تۇلعالاردىڭ كولىك قۇرالدارىنىڭ سالونىندا ورنالاستىرۋعا رۇقسات ەتىلەدى.

— مەملەكەتتىك تۋ جارنامالىق ماقساتتا، سونداي-اق كيىم-كەشەك، توسەك-ورىن جابدىقتارى، پەردە، داستارقان، كىلەمشە جانە وزگە دە جابىن تۇرلەرى رەتىندە پايدالانىلمايدى، — دەلىنگەن قۇجاتتا.

سپورتشىلارعا دا قاتىستى وزگەرىستەر ەنگىزىلگەن. ەندى مەملەكەتتىك تۋدىڭ بەينەسىن سپورتشىلاردىڭ سپورتتىق كيىمى مەن جابدىقتارىندا رەسمي تۇردە پايدالانۋعا رۇقسات بەرىلدى.

سونىمەن قاتار قاۋلىدا مەملەكەتتىك رامىزدەردى رەسمي ينتەرنەت-رەسۋرستاردا، ستەندتەر مەن پلاكاتتاردا ورنالاستىرۋ تارتىبىنە قاتىستى بىرىڭعاي رەتتىلىك ساقتالۋى ءتيىس. الدىمەن مەملەكەتتىك تۋ، ودان كەيىن مەملەكەتتىك ەلتاڭبا، سودان سوڭ مەملەكەتتىك گيمننىڭ ءماتىنى ورنالاستىرىلادى.

سونداي-اق ستەندتەردى بەزەندىرگەندە فون كوك ءتۇستى، ال جازۋلار التىن تۇستەس بولۋى كەرەك.

پرەمەر-مينيستر قول قويعان قاۋلى 13 شىلدەدە كۇشىنە ەنەدى.

ايتا كەتەيىك، بۇعان دەيىن، ۆەدومستۆولىق ناگرادالاردىڭ بىرىڭعاي ستاندارتى جايلى جازعان ەدىك.

دەرەككوزى: kaz.inform.kz

Abai.kz