جەتىسۋ ءوڭىرى قۇرىلعالى بەرى تۋريزم سالاسىن، سونىڭ ىشىندە الاكول جاعاجايىن دامىتۋ باعىتىندا اۋقىمدى ءارى جۇيەلى شارالار قولعا الىنۋدا. وبلىس اكىمدىگىنىڭ ءباسپاسوز قىزمەتى ءمالىم ەتكەندەي، مەملەكەت باسشىسىنىڭ تاپسىرماسىنا ساي، اۋماقتىڭ سانيتارلىق تالاپتارعا ساي بولۋىنا ەرەكشە كوڭىل ءبولىنىپ وتىر.

اتاپ ايتساق، اقشي مەن كوكتۇما اۋىلدارىنىڭ كول جاعاسىن ۇدايى رەتكە كەلتىرىپ وتىراتىن «الاكول تازالىق» كوممۋنالدىق مەكەمەسى قۇرىلعان. بۇل ۇيىمدا ەلۋگە جۋىق مامان ەڭبەك ەتىپ، جيىرمادان استام تەحنيكا تازالىق جۇمىستارىنا جۇمىلدىرىلعان. قازىرگى تاڭدا جاعاجاي اۋماعىندا جەتى ءجۇز جيىرما قوقىس كونتەينەرى، قىرىق ءتورت كيىم اۋىستىراتىن ورىن، جيىرما ءتورت مودۋلدىك جانە قىرىق بەس بيودارەتحانا ورناتىلعان.

سۋ ايدىنىنداعى قاۋىپسىزدىك ماسەلەسى دە باستى نازاردا. بىلتىر جەتىسۋ وبلىسىندا شاعىن ءجۇزۋ قۇرالدارىنىڭ قاتىناسىن رەتتەيتىن، سۋ پايدالانۋ مەن قاۋىپسىزدىك ەرەجەلەرى بەكىتىلدى. وندا بارلىق تالاپتار مەن ولاردى بۇزعان جاعدايداعى جاۋاپكەرشىلىك تۇرلەرى جان-جاقتى كورسەتىلگەن.

دەمالۋشىلاردىڭ تىنىشتىعى مەن قاۋىپسىزدىگى ءۇشىن جاعالاۋدا تاۋلىك بويى كۇزەت قىزمەتى ۇيىمداستىرىلعان. بۇل ىسكە ون ءتورت قۇتقارۋشى مەن ون ءبىر موتورلى قايىق تارتىلعان. سونداي-اق، بيىلعى شومىلۋ ماۋسىمىندا قوعامدىق ءتارتىپتى قاداعالاۋعا ەلۋ پوليتسيا قىزمەتكەرى، ون التى ارنايى كولىك جانە بەس درون جۇمىلدىرىلدى. ودان بولەك، جاعالاۋ بويىنا قىرىق قۇتقارۋ مۇناراسى تۇرعىزىلىپ، ون ءۇش شاقىرىمعا بۋي سىزىقتارى تارتىلدى، وتىز توعىز بەينەباقىلاۋ كامەراسى مەن جەتى پيرس پايدالانۋعا بەرىلدى.

ماماندار كۇن سايىن جاعاجاي مەن سۋدا تۇراقتى تۇردە رەيد جۇرگىزىپ تۇرادى. بەينەباقىلاۋ كامەرالارى پوليتسيانىڭ جەدەل باسقارۋ ورتالىعىنا تىكەلەي قوسىلعان. بۇل جۇيە قوقىس تاستاۋ، رۇقسات ەتىلمەگەن جەرگە كولىك قويۋ سەكىلدى قۇقىق بۇزۋشىلىقتاردى دەر كەزىندە انىقتاپ، زاڭعا سايكەس شارا قولدانۋعا مۇمكىندىك بەرەدى.

ءوز كەزەگىندە تۋريستەر جاعالاۋداعى وڭ وزگەرىستەرگە جوعارى باعا بەرىپ جاتىر. دەمالۋشىلار تازالىقتىڭ جوعارى دەڭگەيدە ەكەنىن، قاجەتتى گيگيەنالىق قۇرالداردىڭ قاراستىرىلعانىن جانە جايلى جاعداي جاسالعانىن ريزاشىلىقپەن جەتكىزۋدە.

ەسكە سالا كەتسەك، سوڭعى ءۇش جىلدا الاكولدە ينجەنەرلىك-كولىكتىك ينفراقۇرىلىمدى دامىتۋ بويىنشا ىرگەلى جوبالار جۇزەگە اسىرىلدى. جولدار جوندەلىپ، ءۇشارال اۋەجايى جاڭارتىلدى، تەمىر جول جانە اۋە قاتىناستارى جولعا قويىلدى. سونداي-اق، ەلۋ جەتى شاقىرىم ەلەكتر جەلىسى تارتىلىپ، ەكى قوسالقى ستانسا ىسكە قوسىلدى. قازىرگى تاڭدا تاۋلىگىنە التى جارىم مىڭ تەكشە مەتر سۋ تازارتاتىن كارىز جۇيەسىنىڭ ەكىنشى كەزەگى سالىنۋدا. وعان قوسا، ون ءتورت شاقىرىمعا جۋىق اۋماقتى قامتيتىن جاعالاۋدى بەكىتۋ جوباسى جۇرگىزىلۋدە، ول كەلەسى جازدا اياقتالماق.

Abai.kz