الماتى حالىقارالىق اۋەجايىندا 56-شى حالىقارالىق فيزيكا وليمپياداسىنىڭ (IPhO-2026) جەڭىمپازدارىن سالتاناتتى قارسى الۋ ءراسىمى ءوتتى. وعان وقۋ-اعارتۋ ءمينيسترى جۇلدىز سۇلەيمەنوۆا قاتىسىپ، وقۋشىلاردى تاريحي جەتىستىكتەرىمەن قۇتتىقتادى. مينيستر ۇلتتىق قۇرامانى جوعارى دەڭگەيدە دايىنداۋعا جانە تاريحي ناتيجەگە قول جەتكىزۋگە ۇلەس قوسقان پەداگوگتەر مەن تالىمگەرلەرگە العىسىن ءبىلدىردى.

سالتاناتتى كەزدەسۋ ەرەكشە جىلى ءارى مەرەكەلىك كوڭىل كۇيدە ءوتتى. جەڭىمپازداردى گۇل شوقتارىمەن، ىستىق ىقىلاسپەن جانە قازاقستاننىڭ الەمدىك زياتكەرلىك ارەناداعى ابىرويىن اسقاقتاتقان جەتىستىكتەرى ءۇشىن شىنايى العىس سوزدەرىمەن قارسى الدى.

سالتاناتتى كەزدەسۋدىڭ باستى كەيىپكەرلەرى حالىقارالىق فيزيكا وليمپياداسىنىڭ بەس التىن مەدال يەگەرلەرى - نۇرگۇل ەگەنبەرگەنوۆا، امىربەك ازاتبەكوۆ، ءىلياس قازىمبەك، رومان چەرەمنوۆ جانە دامير قۇرمان بولدى. ولارمەن بىرگە ەلگە ۇلتتىق قۇرامانى دايىنداۋ جونىندەگى جەتەكشى گۇليا نۇرباقوۆا، سونداي-اق كوماندا جەتەكشىلەرى سامات ماقسۇتوۆ پەن الىشەر ەركەباەۆ ورالدى.

حالىقارالىق فيزيكا وليمپياداسى 4-12 شىلدە ارالىعىندا كولۋمبيانىڭ بۋكارامانگا قالاسىندا ءوتتى. بەدەلدى ءبىلىم بايگەسىنە الەمنىڭ 85 ەلىنەن 381 وقۋشى قاتىستى. ناتيجەسىندە قازاقستان قۇراماسى ءوز تاريحىندا العاش رەت بەس التىن مەدال جەڭىپ الدى.

بۇل تاريحي جەتىستىك قازاقستاندىق وقۋشىلاردىڭ جوعارى دايىندىق دەڭگەيى مەن پەداگوگتەردىڭ كاسىبيلىگىنىڭ ايقىن كورىنىسى بولدى. سونىمەن قاتار ول مەملەكەت باسشىسى قاسىم-جومارت توقاەۆتىڭ زياتكەرلىك الەۋەتتى نىعايتۋ جونىندەگى تاپسىرمالارىن ىسكە اسىرۋ، دارىندى جاستاردى قولداۋ جانە ءبىلىم بەرۋ جۇيەسىن دامىتۋ باعىتىنداعى جۇيەلى جۇمىستىڭ ناتيجەسىن كورسەتتى.

وقۋ-اعارتۋ مينيسترلىگى جەڭىمپازداردى، ولاردىڭ تالىمگەرلەرى مەن اتا-انالارىن تاريحي جەتىستىكپەن قۇتتىقتادى. ۇلتتىق قۇرامانىڭ تاريحي جەڭىسى - بارشا قازاقستاندىقتار ءۇشىن زور ماقتانىش ءارى جاس ۇرپاققا شابىت بەرەتىن جارقىن ۇلگى.

Abai.kz