بۇگىن وسك توراعاسى نۇرلان ءابدىروۆتىڭ توراعالىعىمەن قازاقستان رەسپۋبليكاسى قۇرىلتايىنىڭ دەپۋتاتتارىن سايلاۋ ناۋقانى اياسىنداعى ورتالىق سايلاۋ كوميسسياسىنىڭ ءتورتىنشى وتىرىسى ءوتتى.

كۇن تارتىبىنە سايكەس 2026 جىلعى 23 تامىزعا تاعايىندالعان قازاقستان رەسپۋبليكاسى قۇرىلتايىنىڭ دەپۋتاتتارىن سايلاۋعا قاتىسۋ ءۇشىن «جالپىۇلتتىق سوتسيال-دەموكراتيالىق پارتياسى» رەسپۋبليكالىق قوعامدىق بىرلەستىگىنىڭ پارتيالىق ءتىزىمىن تىركەۋ ماسەلەسى قارالدى.

وتىرىستى اشقان وسك توراعاسى نۇرلان ءابدىروۆ ورتالىق سايلاۋ كوميسسياسى قۇرىلتاي دەپۋتاتتارىن سايلاۋعا قاتىسۋعا 7 ساياسي پارتيا جىبەرىلگەندىگىن اتاپ ءوتتى. سونداي-اق ول بيىلعى جىلعى 9 شىلدەدە ورتالىق سايلاۋ كوميسسياسىنا جالپىۇلتتىق سوتسيال-دەموكراتيالىق پارتياسى پارتيالىق ءتىزىمىن ۇسىنۋ تۋرالى قۇجاتتارىن تاپسىرعاندىعىن بولاتىن. سايلاۋ تۋرالى زاڭناماعا سايكەس ورتالىق سايلاۋ كوميسسياسى كانديداتتاردىڭ قازاقستان رەسپۋبليكاسىنىڭ كونستيتۋتسياسى مەن «قازاقستان رەسپۋبليكاسىنداعى سايلاۋ تۋرالى» قازاقستان رەسپۋبليكاسىنىڭ كونستيتۋتسيالىق زاڭىندا بەلگىلەنگەن تالاپتارعا سايكەستىگىن ايقىنداۋ راسىمدەرىن جۇرگىزدى.

كۇن تارتىبىندەگى ماسەلە بويىنشا بايانداما جاساعان ورتالىق سايلاۋ كوميسسياسىنىڭ مۇشەسى ميحايل بورتنيك «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭنىڭ 89-بابىنا سايكەس ءاربىر ساياسي پارتيادان تەك ءبىر عانا پارتيالىق ءتىزىم تىركەۋگە جىبەرىلەتىنىن اتاپ ءوتتى. سونىمەن قاتار پارتيالىق تىزىمدەگى ءۇش ساناتتاعى وكىلدەردىڭ، ياعني ايەلدەردىڭ، جاستاردىڭ جانە مۇگەدەكتىگى بار ادامداردىڭ جيىنتىق ۇلەسى كەمىندە 30 پايىزدى قۇراۋى ءتيىس.

«جالپىۇلتتىق سوتسيال-دەموكراتيالىق پارتياسىنىڭ پارتيالىق تىزىمىنە 33 ادام ەنگىزىلگەن. ونىڭ ىشىندە 14 كانديدات ايەلدەر، جاستار جانە مۇگەدەكتىگى بار ادامدار ساناتىنا جاتادى، بۇل جالپى جيىنتىق بويىنشا 30 پايىزدان اسادى. زاڭدا بەلگىلەنگەن كۆوتا تالاپتارى ساقتالعان. ورتالىق سايلاۋ كوميسسياسى ۋاكىلەتتى مەملەكەتتىك ورگاندارمەن بىرلەسىپ كانديداتتارعا قاتىستى ءتيىستى تەكسەرۋ جۇرگىزدى. جۇرگىزىلگەن جۇمىستاردىڭ ناتيجەسى بويىنشا پارتيالىق تىزىمگە ەنگىزىلگەن بارلىق كانديدات قازاقستان رەسپۋبليكاسى كونستيتۋتسياسىنىڭ جانە «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭنىڭ تالاپتارىنا سايكەس كەلەدى دەپ تانىلدى»، - دەپ اتاپ ءوتتى ميحايل بورتنيك.

ورتالىق سايلاۋ كوميسسياسىنىڭ مۇشەسى سونداي-اق جالپىۇلتتىق سوتسيال-دەموكراتيالىق پارتياسى 2023 جىلعى 19 ناۋرىزدا وتكەن قازاقستان رەسپۋبليكاسى پارلامەنتى ءماجىلىسى دەپۋتاتتارىنىڭ سايلاۋىندا سايلاۋشىلاردىڭ 5 پايىزدان استام داۋىسىن جيناعانىن اتادى. وسىعان بايلانىستى زاڭناماعا سايكەس اتالعان پارتيا سايلاۋ جارناسىن تولەۋدەن بوساتىلادى.

ورتالىق سايلاۋ كوميسسياسىنىڭ مۇشەلەرى ءتيىستى حاتتامالارعا قول قويعاننان كەيىن 2026 جىلعى 23 تامىزعا تاعايىندالعان قازاقستان رەسپۋبليكاسى قۇرىلتايىنىڭ دەپۋتاتتارىن سايلاۋعا «جالپىۇلتتىق سوتسيال-دەموكراتيالىق پارتيا» رەسپۋبليكالىق قوعامدىق بىرلەستىگىنىڭ پارتيالىق ءتىزىمىن تىركەۋ تۋرالى قاۋلى قابىلداندى. تىركەلگەن كانديداتتارعا ءتيىستى كۋالىكتەر تابىستالدى.

وتىرىس قورىتىندىسى بويىنشا پارتيا باسشىلىعى ءداستۇرلى بريفينگ بارىسىندا بۇقارالىق اقپارات قۇرالدارى وكىلدەرىنىڭ سۇراقتارىنا جاۋاپ بەردى.

Abai.kz