2026 جىلعى 15 شىلدەدەگى جاعداي بويىنشا، ەسەپتى اپتادا قازاقستاندا الەۋمەتتىك ماڭىزى بار بىرقاتار ازىق-تۇلىك تاۋارلارىنىڭ باعاسى تومەندەدى.ەڭ كوپ ارزانداعان ءونىم – قيار، ونىڭ باعاسى 4,6% تومەندەدى. سونىمەن قاتار قىزاناق پەن ءسابىز (ارقايسىسى - 3,2%), جۇمىرتقا (-0,4%), ۇن (-0,3%), تاۋىق ەتى (-0,2%) باعاسىنىڭ تومەندەۋى تىركەلدى.

وڭىرلەر بولىنىسىندە باعانىڭ تومەندەۋ ءۇردىسى ەلىمىزدىڭ بىرقاتار قالاسىندا بايقالدى. الەۋمەتتىك ماڭىزى بار ازىق-تۇلىك تاۋارلارىنىڭ جالپى باعا دەڭگەيى ءبىر اپتا ىشىندە اقتاۋدا (-0,7%), قوناەۆتا (-0,3%), جەزقازعان مەن پەتروپاۆلدا (ارقايسىسى -0,2%), تاراز، قاراعاندى جانە تۇركىستاندا (ارقايسىسى -0,1%) تومەندەدى. ال استانا، شىمكەنت، قىزىلوردا، وسكەمەن، پاۆلودار جانە سەمەي قالالارىندا باعالار وتكەن اپتا دەڭگەيىندە ساقتالدى.

رەسپۋبليكا بويىنشا قياردىڭ ورتاشا باعاسى ءبىر كەلىسى ءۇشىن 524 تەڭگەنى قۇرادى. ەڭ تومەن باعا تاراز قالاسىندا تىركەلىپ، ءبىر كەلىسى 357 تەڭگە بولدى.
تازارتىلعان كۇرىشتىڭ ورتاشا باعاسى رەسپۋبليكا بويىنشا ءبىر كەلىسى ءۇشىن 534 تەڭگەنى قۇرادى. ەڭ قولجەتىمدى باعا قىزىلوردادا – 456 تەڭگە، الماتىدا – 478 تەڭگە.

اق قاۋداندى قىرىققاباتتىڭ ورتاشا باعاسى رەسپۋبليكا بويىنشا ءبىر كەلىسى ءۇشىن 198 تەڭگەنى قۇرادى. ەڭ تومەن باعا تۇركىستان قالاسىندا، ءبىر كەلىسى 137 تەڭگە.
I ساناتتاعى 10 دانا جۇمىرتقانىڭ ورتاشا باعاسى رەسپۋبليكا بويىنشا 561 تەڭگەنى قۇرادى. ەڭ تومەن باعا قىزىلوردادا (464 تەڭگە) جانە ورالدا (476 تەڭگە) تىركەلدى.

الەۋمەتتىك ماڭىزى بار ازىق-تۇلىك تاۋارلارى باعالارى يندەكسىنىڭ كورسەتكىشى اپتا سايىن ەسەپتەلەدى. باعالاردى باقىلاۋ بارلىق وبلىس ورتالىقتارىندا، رەسپۋبليكالىق ماڭىزى بار قالالاردا جانە استانادا جۇرگىزىلەدى. الەۋمەتتىك ماڭىزى بار ازىق-تۇلىك تاۋارلارى باعاسىنىڭ ديناميكاداعى وزگەرىستەرىن قازاقستان رەسپۋبليكاسى ستراتەگيالىق جوسپارلاۋ جانە رەفورمالار اگەنتتىگى ۇلتتىق ستاتيستيكا بيۋروسىنىڭ سايتىنان جانە «تالداۋ» اقپاراتتىق-تالداۋ جۇيەسىنەن كورۋگە بولادى.

الەۋمەتتىك ماڭىزى بار ازىق-تۇلىك تاۋارلارىنىڭ تىزبەسى قازاقستان رەسپۋبليكاسى ساۋدا جانە ينتەگراتسيا ءمينيسترىنىڭ 2025 جىلعى 23 جەلتوقسانداعى №362-نق بۇيرىعىمەن بەكىتىلگەن جانە 31 اتاۋداعى ازىق-تۇلىك ونىمدەرىن قامتيدى.

Abai.kz